1 Timote 6 - Nouveau Testament bété de Gagnoa

'Juyua

¹ 'Nyakpa 'na -wa -noa 'juyua 'waa -wɛ, 'wa yibhlele- sɛ -gbɔ 'wa yi 'wanɛɛ "bhenya "zo. 'Ɛ dɛku 'nyakpa -ka -lɔ Lagɔ 'na 'tɔ -nyɛ sloaweli "bhaa 'dii ziɛ-.

² 'Wanɛɛ "bhenya kɛ Lagɔ 'na 'dlekukɛlenya 'waa ne, 'wa te no nɛɛ 'wa -ko Lagɔgligbɛ 'bhle "me zaa 'wa -koa "zo, -mɔ, "nowlia 'wa -noɔ. Lɔbhɔ 'na dɛku, 'wa yua "ku lɔbhɔ 'tee 'nabhɛ. "Naa-, "ɛ "bhenya -ye 'wa lɔbhɔ "ɛ soɔ "ku -wɛ, Lagɔ 'na -wawayua 'waa -lɔ zɛ. -Ye -e "kɛ sloa "ne -ye 'wa "kɛ 'kɔkɛle ne lɛ.

Sloaweli 'na -ɛ "ne 'gbaa "me -ko

³ 'Nyakpa 'na -bedia -ko lɔbhɔ "ne 'wanɛɛ sloaweli "ne gbɛklɛklɛ "me -ko. 'Wa "ne Anyinɛnyɔ Zezu Kli 'na -diɛnadiɛ 'na weli gɛle "ne 'wanɛɛ sloaweli "ne kpɔmalea- Lagɔ "ku.

⁴ Bhabha -za, 'wanɛɛ 'yli "ne le -da. "Ɛ 'nyakpa -wɛ "ne -bɛɛ' -yi, 'wa "ne -yɛ, "ne 'wa 'kpɛle -lɔ, "ne 'wa slɛ -lɔ. "Ɛwɛ 'wɔ nɛme -lɔ lɔbhɔzonoɛ, 'slɛslɛɛ, 'yliyliɛ "ne 'dlepɔsɛ -nyɛnye -wɛ 'wɔ.

⁵ 'Kpɛlekpɛleɛ -ɛ "ne nenidɛ -kɛ, 'nyakpa 'wa "ne "nɛ -wɛ 'glɛme. 'Wanɛɛ 'dlepɔsɛ "ne 'tee -ko. 'Wa "ne -ɛ -ko gbaa -yi. 'Wa "pɔ 'dle -gbɔ Lagɔ 'na 'dlekukɛleɛ "koa -lɔ -klɔgbɔnya "zoa-.

⁶ Lagɔ 'na 'dlekukɛleɛ, -klɔgbɔ "yitɛ yɛ -lɔ 'diɛɛ. -Mɔ, 'ɛ "ne -kɛ "fu yɛ: -Li 'na -ye -e -kɛ -wɛ -noɔ -lɔ -neɛ' yɛ.

⁷ -A "ne dodo ne "ku -bɛɛ' -nɛme. "Ne -a -ka 'lelee -bɛɛ' kɔme.

⁸ Zaa, -a kɛ lili -bɛɛ' -kɛ, "ne -a kɛ "me pla- -koti -kɛ, -anyɛɛ dɛku 'ɛ zu-.

⁹ -Mɔ, 'nyakpa 'na -wa no -gbɔ 'wa "kɛ -klɔgbɔ "pɔ -wɛ, "mebeamɔ 'wa bhlile -lɔ. Nonoli -kwleyi -nyɛnye soa- -gbotu 'nasɛ, "ne 'ɛ nyimoa -lɔ, "ne 'ɛ 'kɔmoa -lɔ 'kwiɛ 'na -gwe "ku.

¹⁰ 'Kpilɛkpilɛ 'klekle 'na 'bhaledɛ -noɔ -lɔ 'dlasi 'na 'ŋwɛnɛmekɛleɛ yɛ. 'Nyakpa -wa "kɛ soɔ "ɛ 'dlasi 'na 'ŋwɛnɛ "me -wɛ 'kwlɛ 'wa bhli -lɔ, "ne 'wa "ne -la Lagɔ 'dleku -kɛ. 'Wa 'gbape "yitɛ "ku, -ye 'wa -tɛle 'siɛ yɛ -lɔ.

Pɔle -zo Timote 'de "me

¹¹ -Mɔ -eyi lagɔnyɔ, 'bha- -kɛ -li -nyɛnye -wɛ 'wɔ 'na -gwe "ku. Ŋwinɛle- -kɛ "me, te -kɛ Lagɔ guɔ 'ylile-, kɛle- Lagɔ 'dleku, wamale- -elua, 'piɛ- "bhle 'dle, -bɔŋo 'dle.

¹² To 'na- -to 'ye -e 'na 'gwe -kɛ, Lagɔ 'na 'dleku 'kɛle- -to 'ye -e -na 'gwe -kɛ, -se Lagɔ "bhaa 'a "kɛ "ku kole- -godogodo 'na dɛ. -Ɛwɛza Lagɔ la- -lɔ -eyi -tiaa. 'Nyakpa -gbagboa 'yliku, -e 'ŋunu -gbɔ -e -kɛ Lagɔ 'dleku.

¹³ -Dɛmeda, -eyi 'ye 'e bhulɛle -lɔ Lagɔ 'yliku, ''ɔyi, -ɔ 'nyɛ -li 'klekle zikpɛ, "ne Zezu Kli 'yliku, 'ɔyi -ɔ "ne 'awɔ Pɔse Pilate 'yliku weli "ku zizi-.

¹⁴ Gbagbɛ ne -ye 'e 'je- -eyi kɔ ne, slu 'tee. Te -kɛ -eyi 'fe pla- -se te -kɛ 'nuɔsɔbhɔledɛ kɛle-. Te -kɛ 'gbeyi "ku ko -kaa -se Anyinɛnyɔ Zezu Kli "kɛ 'ce lɔbhɔ ylɛ.

¹⁵ Lɔbhɔ -kɛ -ylɛ, -a To Lagɔ "kɛ 'ce -lɔ Anyinɛnyɔ Zezu Kli -anye 'ylime 'tua. 'Ɔyi 'ye 'ŋupɛɛ 'klekle 'bhale -lɔ "me. "Ne 'ɔ zi -li 'klekle "ku. -Klɔgbɔnya 'glɛme 'na -klɔgbɔnyɔ, "Bhenya 'glɛme 'na "Bhenyɔ.

¹⁶ 'Ɔyi -bholo -kpee "ku- -lɔ, Zle -ye -a -ka "ku 'wlo "me 'ɔ -ko -lɔ. 'Nyɔkpɔ "no tɛtɛ 'ylime 'ye-. "Ne 'nyɔkpɔ "ne 'bhɛle "ne 'ɔ "kɔ 'ylime 'ye. 'Ɔɔ 'bhe- -lɔ 'ŋlumeɛ, "ne 'bhɛloɛ -dɛme "ne -godogodo 'yi -ze! Amɛn.

-Klɔgbɔnya 'na 'demezoɛ

¹⁷ Bhulɛle -glɔ ne zɔ 'na -klɔgbɔnya -se 'titliloa 'yukwli "me, 'wa te -kɛ bha. 'Wanɛɛ 'dlekukɛleɛ, 'wa "zo Lagɔ "me. -Mɔ, 'wa te -kɛ -klɔgbɔ -ɛ "ne gwlɛ -wɛ "me "zo. Lagɔ -bholo -kpee 'nyɛ -lɔ "fu -anye -li 'klekle -ye -a -su -wɛ -se 'ŋwɛnɛ "kɛ -anye lɔbhɔ.

¹⁸ 'Nyoa 'de -gbɔ 'wa no -li 'na -li 'nyakpa 'wli -se 'wanɛɛ 'nɛnoɛ zimale-. 'Wa nyɛle 'walua 'dlewɛtɛ "me. 'Wa yibhlele- dli sɛ.

¹⁹ 'Wa 'cɛ sɔbhɔ 'sa, 'wanɛɛ "nɔgɔklɔgbɔ 'na "namanɔ 'wa "zo -lɔ 'gbo "me, 'ɛ -ka 'ce "kubhiɛ "ne 'ɛ -ka 'ce nyimɔ. 'Wa yi 'ce -watɔ 'wanɛɛ zikpɛ 'na 'ɛ -ka "kubhiɛ yle.

Pɔle 'na 'cilɛcilɛweli

²⁰ Timote, -ye Lagɔ 'je- -eyi kɔ -wɛ, slu 'tee. 'Tale "fu 'na 'kpɛlekpɛleɛ -ɛ "ne bhli 'dlekukɛleɛ 'na -gwɛ -wɛ 'yi. 'Tale sloasɛ -nyɛnye -ɛ gbɔ "ne -a -ka gbɛklɛklɛ yibhlele- -wɛ 'yi.

²¹ -Wa -kɛle 'dleku -wɛ, -bedia 'bha- 'dlekukɛleɛ 'na -gwe "ku. Lagɔ "pɔ 'anye 'ŋu!