1 Timote 5 - Nouveau Testament bété de Gagnoa

'Zo 'kleceɛnya 'klekle 'de "me

¹ Te -kɛ 'nyɔkpɔ -na 'ɔ -gɔ -wɛ 'kpokposɛ weli bhulɛle-, -mɔ, "zo 'de "me 'tee, sɛgbɛɛ -e 'to, -se "zo me 'teyigba 'de "me, sɛgbɛɛ -e "nowlia.

² "Zo me 'ŋwenea "yitia 'de "me sɛgbɛɛ -e "nɔ 'wɔ, "zo me 'lelee 'ŋuyua -digbia 'de "me sɛnasɛ sɛgbɛɛ -e "nɔyoa 'wɔ.

"Kwiziŋwenea 'na weli

³ Zolea "kwiziŋwenea -wa 'gli 'wayikɔ -wɛ 'yli "ku 'tee.

⁴ -Mɔ, "kwiziŋɔnɔ kɛ yua -kɛɛ, "ne 'ɔ kɛ yua 'na yua -kɛ ne, "ɛ yua -wɛ 'na -ye 'wa "kɛ 'ciɛ ne lɛ: Tɛtɛ dɛku: 'Wa yi 'wanɛɛ -gligbɛnya slu 'tee, "ɛ sɛbhele -wɛ 'ye 'wa "kɛ 'ce -lɔ 'wanɛɛ gwɛlenya nyɛ 'wanɛɛ gwɛlenya "yitia "bhaa slu. 'Wa 'cɛ -soɔ 'sa ne, -see 'wanɛɛ 'gwɛlenya -sua nɛ -wɛ 'ɛyi 'wa no -me -lɔ.

⁵ -Mɔ, "kwiziŋɔnɔ 'na -ɔ "ne 'nyɔkpɔ 'na -ɔ "kɔ slu -wɛ -kɛ, "ne 'ɔ gli- -ɔyikɔ gou -wɛ, Lagɔ 'ye 'ɔ "zo -lɔ 'ɔnɛɛ 'dle "ku. Zaa, -se zle ze "ne titiɛ yi -wɛ 'ɔ bhubhɔ 'ce Lagɔ 'yiɛ.

⁶ -Mɔ, "kwiziŋɔnɔ 'na -ɔ tɛle 'ɔnɛɛ zikpɛ 'na 'ŋwɛnɛ -lɛbhɛ 'ɛyi kɔ siɛ -wɛ, 'ɔyi -wɛ, 'ɔ "kɛ 'se -yɛ -ce, 'ɔ -ko sɛgbɛɛ -ɔ "ku- lɛ ne.

⁷ Zaa, titlile "ɛ "kwiziŋwenea -wɛ weli 'yukwli "me, -se 'wa te -kɛ 'nuɔsɔbhɔledɛ kɛle-.

⁸ 'Nyɔkpɔ 'na -ɔ "ne wlo 'ɔnɛɛ -gligbɛnya 'klo -wɛ, "ne 'ɔ "ne 'lele -tiaa 'ɔnɛɛ -bhudu "me 'na -konya -su me -wɛ, 'ɔyi -wɛ, 'dlekukɛleɛ 'na -gwe "ku 'ye 'ɔ 'bha- -lɔ, 'nyɔkpɔ -gbeyi yɔ -lɔ, 'ɔ -zi -ɔ "ne 'dleku -kɛ -wɛ "ku.

⁹ 'Ŋɔnɔ 'na -ɔ -kɛ 'ylobɛ glota "ne 'ɔ 'kwɔ- 'widi bholo -kpee, "ne "ɛ 'widi yi "ku- -wɛ, 'ɔyi 'wa zɛle -lɔ "kwiziŋwenea 'glɛme.

¹⁰ -Glɔnya -yibhlele sɛ -gbɔ 'nɛne -ko 'ŋɔnɔ yɔ -lɔ. 'Ɔ bhoa- 'ɔnɛɛ yua 'tee. -Wa yu "ku plɛ ka -wɛ, 'ɔ soa- 'tee. 'Ɔ -wɛle 'klecɛnya 'bho yɔko. 'Ɔ -kwɛle "nyɛzenya, "ne 'ɔ -no -li 'klekle -ɛ 'nɛne -wɛ.

¹¹ -Mɔ, -sɛ -kɛ "bhle 'kwiziŋwenea 'na -digbianoa -wɛ, 'wanɛɛ 'dle kɛ Klise keyi 'glɛ ne, 'widi 'kwɔdɛ 'wanɛɛ 'dle plele- -lɔ.

¹² Zaa, -wa "zo "ɛ soɔ -wɛ, 'wayi 'wa -nyimɔle -lɔ weli kɔ, sɛko -wɛ, weli -ye 'wa plele- Klise kɔ -wɛ, 'wa "ne 'dleku -kɛle zɛ.

¹³ 'Wa "ne nono -bɛɛ' -kɛ za, 'wa 'bha -bhudu 'na -ɛwɛ "me, "ne 'wa sibhɔ -bhudu 'na -ɛwɛ "me. 'Wayi, -wa "ne no libhɔ -wɛ, 'wa sɛ -lɔ kple. -Bɛɛ' 'na -ɛ "ne 'wanɛɛ yɛ -wɛ, 'ɛnɛɛ "kukoweli 'wa bhulɛ -lɔ. "Ne 'wa bhulɛ -lɔ -se 'wa 'yɔbhɔ -wɛ.

¹⁴ 'E 'yɔbhɔ -gbɔ "kwiziŋwenea 'na -digbianoa -wɛ 'wa 'kwɔle- "kusɔ 'widia -se 'wa "kɛ yua 'gwɛle-, -se 'wa "kɛ 'wanɛɛ 'suɛ tee slu -se -anyɛɛ 'gblenya te -kɛ -anye weli -nyɛnye bhulɛle-.

¹⁵ "Naa-, "kwiziŋwenea 'na -bedia -bhli 'kwlɛ -ye 'wa -gɛle Sata.

¹⁶ Zaa, 'ŋɔnɔ 'na -ɔ -kɛ Lagɔ 'dleku -wɛ, "kwiziŋwenea kɛ 'ɔnɛɛ -gligbɛ "ku -ko, 'ɔ yua kwɛle-. 'Ɛ "kɛ soɔ ylɛle ne, Lagɔgligbɛ "me 'na libhɔ 'ye 'ɔ -selia -lɔ "ku. -Mɔ, "kwiziŋwenea 'na -wa -ko 'wayikɔ -wɛ 'ye Lagɔgligbɛ "kɛ -da -lɔ kwɛle-.

Lagɔgligbɛ "me 'na "yitia

¹⁷ "Yitia kɛ Lagɔgligbɛ 'yliku "zolea- 'tee ne 'wa yi 'wanɛɛ peɛloɛ yle "kusɔ 'na dɛ. -Wa 'cɛ yle -tiaa -noɔ -lɔ -wa sɛ Lagɔ 'na 'Denaade "ne -wa sloɛ -wɛ.

¹⁸ "Naa-, Lagɔbɔgo nɛɛ: -Sɔɔdɛku -bhli no 'didi dɛku libhɔ -wɛ, "ne 'ɔ kɛ li ne, 'wa "ne -sɔ nu. "Naa-, libhɔnonyɔ -kɛ 'ɔnɛɛ peɛloɛ zɛ.

¹⁹ 'Nyakpa "sɔ "ne ta -wa 'ye- -li 'na dɛ -wɛ, 'wa -na ko lɔbhɔ -se 'wa "kɛ "yitɔ gbo 'wlime 'gbli. 'Ɛ "mɔ sɔbhɔ yɛ, 'a te "ku 'ŋunu -se 'wa 'to gbo 'wlime gbli.

²⁰ 'Nyakpa -wa "ne 'diɔle- 'nyinyonoli -no -za -wɛ, 'wa 'diloa -zejilɛ "me gbo. 'Ɛ dɛku -wa -ko lɔbhɔ -wɛ "kɛ -lɔ "nyɛnyenoɛ -gɛ "gu.

²¹ 'Wlo "ku -ye 'e 'yɔbhɔle 'ɛyi -tiaa 'noɔ -lɔ -gbɔ Lagɔ 'yliku, Zezu Kli 'yliku "ne "nɔgɔzilia 'yliku, te vi li -se "zo -ɛwɛ 'klekle 'plome. -Se te 'nyakpa "me dlidlile-.

²² Te -kɛ 'nyɔkpɔ -sɔ 'wli 'piɛ paa. Te -kɛ -elua 'na 'nyinyonoli 'na 'didi "me -ko "me. -Eyi 'nabhɛ slu -kɛ -eyi 'tee.

²³ -Se te -kɛ 'ŋu 'ɛyikɔ "nɔmɔ, -mɔ, "nɔmɔ me duvɛ 'tekeyi, -neɛ' 'mene -wɛ za, "naa-, gu 'lɔbhɔ 'lɔbhɔle -eyi "ku zɛ.

²⁴ 'Nyakpa 'na -bedia, 'wa -noa -mlɛ gbobhlele- "ne 'wanɛɛ 'nyinyonoli -ple 'yli. -Mɔ, -bedia nɛ lɔbhɔ "mɔ -na "me gwlɛ, "ne 'wa yibhlele -la -lɔ sɛ.

²⁵ Soɔ -li 'na "namanɔ 'yeɔ -lɔ 'ylime bhobhlo. "Ne 'ɛnɛɛ -ɛ 'yeɔ 'ylime bhobhlo -wɛ "ne 'bhɛle- "ne 'ɛ "kɛ "ku zizɔ-.