1 Timote 4 - Nouveau Testament bété de Gagnoa

Lagɔ 'na nonoli 'klekle 'nɛne 'ɛ 'nɛne

¹ Zuzu Wlewle -bhulɛ gbɛklɛklɛ nɛɛ: 'Bebhiɛle 'yli "me, -bedia -ka -la Lagɔ 'dleku 'kɛle-. "Ne 'wa "kɛ -da -lɔ 'dlepɔsɛ -gbeyi -nyɛ sloasɛ 'ɛ 'bhale zuzu -nyɛnye "me -wɛ "bhaa 'dle tɛle-.

² 'Nyakpa -gbeyia "ne Yowlɛnya yua 'wanɛɛ bhulɛweli "me ylo nole. "Ɛ 'nyakpa -wɛ, 'yo "mna 'wanɛɛ 'dlepɔsɛ 'wli "ku sɛgbɛɛ, leyi -sinɔ 'na -kpakpɛ.

³ 'Wa yi 'ce sue -plɛɛ "ku bhia, "ne 'wa yi 'ce 'lelee lilɛ 'na -bedi 'na liliɛ "ku bhia. "Ne Lagɔ 'wlɛ -lɔ "ɛ lilɛ. Zaa, 'dlekukɛlenya -wa -yi gbɛklɛklɛ -wɛ 'bhɛle- -se 'wa 'cɛ li, "ne 'wa yi Lagɔ 'ŋlu 'kwa-.

⁴ "Naa-, Lagɔ 'na -ye 'ɔ 'wlɛ 'klekle -wɛ 'nɛne. 'Ɛnɛɛ -ye 'wa "kɛ kwlɛ "me "pɔ -wɛ "ne -le, -mɔ, 'ɛyi 'klekle 'ye -a "kɛ -lɔ "ku 'libhi, "ne -a "kɛ -lɔ Lagɔ bhɛle.

⁵ "Naa-, Lagɔ 'na weli, "ne bhubhɔweli gbɔ -lɔ "ne 'ɛ -li -wɛ 'wɔ -ko -lɔ 'wlele.

«'Zo Zezu Kli 'na "kulɔbhɔnyɔ 'na "namanɔ»

⁶ 'Sloa -kɛ -ɛwɛ 'wɔ -e "nowlia -nyɛ -e "nɔyoa 'wɔ -wa -noɔ 'klecɛnya 'waa -wɛ 'ɛyi 'klekle. Lɔbhɔ 'na dɛku, -e yi Zezu Kli 'na "kulɔbhɔnyɔ 'na "namanɔ "zo, -see -e "koa 'ylime 'tua -gbɔ -e 'gɔbhɔle- Lagɔweli -ɛ 'nyɛ 'dlekukɛleɛ, "ne sloasɛ -ɛ ŋwinɛle- "me -wɛ "bhaa "me, 'ɛɛ "kɛ -lɔ gbɔ "ne 'wa "kɛ -lɔ 'sɛ yibhlele- -gbɔ -e tɛle- Lagɔ 'dle.

⁷ Zaa, 'tale -watɔ 'na nunɛ -nyɛ weli 'na -ɛ 'nɛme 'dlekukɛlesɛ -wɛ 'yi. -Mɔ, "tɔtɔle -eyi "kɔ -se -e "kɛ Lagɔ 'dle 'tɛle.

⁸ -E "kɛ -eyi "kɔ "tɔtɔle -se 'kwɛme "kɛ -eyi "tamale ne, 'ɛ 'nɛne, -mɔ, -e "kɛ -eyi "kɔ "tɔtɔle -se -e "kɛ Lagɔ 'dletɛle -wɛ 'nɛne "ne 'ɛ -zi -li 'klekle "ku. "Naa-, -ɔ "tɛle- Lagɔ 'dle -wɛ, zikpɛ 'na -ye Lagɔ 'sɛ lɔbhɔ -dɛme, "ne 'watɔ -wɛ, 'ɔnɛɛ yɛ -lɔ.

⁹ 'Ɛ -noɔ -lɔ weli -ye 'wa "kɛ 'dleku 'kɛle- "ne -ye 'nyakpa 'klekle "kɛ 'dletɛle- kpɛnyee -wɛ yɛ.

¹⁰ "Naa-, -a no libhɔ "nyɛnye "ku, "ne -a "tɔtɔle -ayikɔ, sɛko -wɛ, -a "zo- -anyɛɛ 'dlekukɛleɛ Lagɔ -ɔ -yɛ gbligbli -wɛ "me. "Naa-, 'ɔ -noɔ -lɔ 'nyakpa 'klekle 'na Fuɔnyɔ yɔ, -mɔ, 'wa -kɔ 'dleku -wɛ -nɔ yɔ -lɔ tiaa.

¹¹ -Ye -e "kɛ 'nyakpa bhulɛle-, "ne -e "koa 'sloa -wɛ -lɔ.

Pɔle "zo Timote 'de "me

¹² 'Nyɔkpɔ te -eyi 'dii ziɛ-, -se -e -noɔ 'teyigbɔ yɔ za. Zaa, -eyi, tua 'se 'dlekukɛlenya -neɛ' bhulɛweli "me, 'neɛ zikpɛ "me, -neɛ' 'ŋwɛnɛ "me, -neɛ' 'dlekukɛleɛ "me, -neɛ' 'wlewle -koɛ "me -se 'nyakpa "kɛ -neɛ' -gbudu gɛle.

¹³ Zaa, -bhle -a -wo 'neɛ yiyiɛ ne, gbɔ kɔ -se zɛle 'wa yi Lagɔ -wɛ za Lagɔbɔgo "me, -se -e "koa 'dleku "tamalea-, -se -e "koa Lagɔweli sloa.

¹⁴ Te -kɛ Zuzu Wlewle yɛle "ku plɛle-. -E -ylelo "guɔkwɔmenya 'na bhulɛweli kɔ, "ne -Gligbɛyitia yi -eyi 'sɔ 'wli 'piɛ -wɛ.

¹⁵ Zaa, no -kɛ "ɛ libhɔ -wɛ 'tee, -se 'bhale- -kɛ -eyi "me, -se -e 'cɛ -kɛ no gou, -se 'wayi 'klekle "kɛ -kɛ -neɛ' Lagɔlibhɔ 'na -se 'ɛ me 'yuku -wɛ 'ylime 'ye.

¹⁶ -See, luɔle -kɛ neɛ -kosɛ, "ne neɛ sloasɛ "ku. "Tɛle -kɛ 'dle 'klekle. "Naa-, -e kɛ "ɛ -soɔ no ne, -e yi "po, -e -nyɛ -wa fo -eyi 'yukwli -wɛ "bhaa.