1 Timote 3 - Nouveau Testament bété de Gagnoa

Lagɔgligbɛ 'na slunya

¹ 'Dlekukɛleweli ne lɛ: 'Nyɔkpɔ kɛ no -gbɔ 'ɔ "kɛ Lagɔgligbɛ slu -me ne, libhɔ 'na -ɛ 'nɛne yɛ -lɔ.

² "Ɛ -soɔ 'na 'nyɔkpɔ -wɛ, 'ɔ te -kɛ 'nuɔsɔbhɔledɛ kɛle- "kpɛɛ. 'Ɔ kɛle- -kɛ 'ŋɔnɔ bholo -kpee. -Se 'ɔ yibhlele- -kɛ 'ɔyi 'na "ku piɛle -sɛ. -Se 'ɔnɛɛ 'dlepɔsɛ 'namale- -kɛ, -se 'ɔ 'sa 'nyakpa 'na -wa yu "ku plɛ -ka -wɛ 'tee. -Se 'ɔ 'bhɛle -kɛ slosloɛ.

³ -Se 'ɔ te -kɛ nogbinɔmɔnyɔ "zo. -Se 'ɔ te -kɛ 'lelee kpokponyɔ "zo, -se 'ɔ no 'ɔnɛɛ -li 'dlekɛlesɛ. -Se 'ɔ te -kɛ 'gbononyɔ "zo, -se 'ɔ te 'dlasi mamale!

⁴ 'Ɔ yibhlele- -kɛ 'lelee 'ɔnɛɛ -bhudu "me 'na 'nyakpa 'na slusɛ. -Se 'ɔnɛɛ yua "zo -kɛ 'nyakpa 'plome, -se 'wa 'fo -kɛ 'ɔnɛɛ weli 'yukwli.

⁵ 'Nyɔkpɔ "mɔ 'ɔnɛɛ -gligbɛnya 'na slu sɛ -yi ne, 'ɔ 'bhɛle bhɔ -se 'ɔ "kɛ Lagɔ 'na -gligbɛ slu bha?

⁶ -Eyi -mɔɔ no -gbɔ -e "kɛ Lagɔgligbɛɛ slu -wɛ, te -kɛ 'klecɛ -lele "zo, 'ɛ "kɛ sɔbhɔ yɛ ne, 'ɔ yi -kɛ 'ɔyi "ku zia. 'Ɛ "mɔ -kɛ sɔbhɔ yɛ ne, -see gbo -lu zuzu -nyɛnye -wɛ, gbo yu -kɛ sɔbhɔ lu -me.

⁷ 'Nyakpa 'na -wa "ne 'klecɛ 'waa -wɛ, 'wa 'pɔ me -kɛ 'ɔnɛɛ za 'tee 'dle. -Se 'nyɔkpɔ te -kɛ 'ɔnɛɛ weli -nyɛnye bhulɛ. Lɔbhɔ 'na dɛku, 'ɔ -ka -lɔ Sata 'na gbotu 'yli bhli.

Dlinya

⁸ Sɛbhele -wɛ, Dlinya "zo -kɛ 'nyakpa 'na -wa -ko 'plome 'tee 'walua 'glɛme -wɛ. Dlinya te -kɛ nogbinɔmɔnya "zo. -Se 'wa te -kɛ 'lelee 'dlasi 'na 'siɛtɛleɛ 'gbeyi "ku mamale.

⁹ Dlinya 'tɛle -kɛ gbɛklɛklɛ -ɛ 'bhale 'dlekukɛleɛ "me -wɛ 'dle. -See 'wanɛɛ 'dlepɔsɛ -ko kɛ 'wlele.

¹⁰ 'Wa -gba "koa dlinya "zoa ne, 'wa gɛleloa -kɛ 'yli 'be, -se 'wa te -kɛ 'nuɔsɔbhɔledɛ kɛle-, -se 'wa "koa -kɛ -la dlinya "zoa.

¹¹ "Ɛ sɛbhele -wɛ, 'ŋwenea -wa -noɔ -me dlinya 'waa -wɛ yi kɛ 'lelee, -see 'wa "koa 'plome "zo -wɛ 'na -li no -me. 'Wa te -kɛ 'walua 'na weli -nyɛnye bhulɛ. 'Wa yibhlele- -kɛ 'wayi 'na "ku piɛle sɛ. -Se 'wa no 'dlekukɛle -li, -li 'klekle "me.

¹² Dlidlinyɔ 'kwɔ 'ŋɔnɔ -bholo -kpee. 'Ɔ slu 'ɔnɛɛ yua -nyɛ 'ɔnɛɛ -gligbɛ "bhaa 'tee.

¹³ -Wa no 'wanɛɛ dlidli libhɔ 'tee -wɛ, 'wa yua 'plome "zo kpɛnyee. "Ne 'ɛ yua "ku "kpɔmalea, "naa-, 'wa -kɛ Zezu Kli 'dleku kpɛnyee, za, 'wa -ka -la 'gu.

Lagɔ 'na -diɛweli -ɛ zizɔ- 'Denaade "me -wɛ.

¹⁴ 'E 'kɛle -ɛwɛ 'klekle -eyi "ku, "naa-, 'e -kɛ 'dleku -gbɔ 'e yi -eyi 'ylime 'ye ka yi 'bhobhlo zɛ.

¹⁵ 'E "mɔ -na -kɛ -dɛme -yi, "ɛ "bɔgo ne "kɛ -kɛ -lɔ -eyi sloa, -neɛ' -see -e "kɛ -eyi slu "ɛ Lagɔgligbɛ ne "me. "Ɛ -gligbɛ ne, Lagɔ -ɔ -yɛ gbligbli nɛ yɛ -lɔ, "ne 'ɔ -kɛ -lɔ kɔ, "ne 'ɔ -kole -lɔ "klo, "ne 'ɛ -noɔ -lɔ gbɛklɛklɛ 'na 'gblɛ yɛ.

¹⁶ -Ɛɛ, -diɛɛ yɛ -lɔ. Lagɔ 'na -diɛweli -ɛ zizɔ- 'Denaade "me "ne -a yibhlele- 'dlekukɛleɛ "me -wɛ 'kpɔ kpɛnyee. Klise tua- -anye 'ɔyi 'ylime 'nyɔkpɔ sɛ; 'Ɔ ŋwinɛle- "me, Zuzu Wlewle 'ŋunu -me "ku, "nɔgɔzilia 'yo- 'ylime, "Ne 'wa -tuɔ -glɔ 'klekle 'ylime, 'Wa -kɛlo 'dleku dodo ne "ku, "Ne "nɔgɔ "me, 'ɔ -me 'ŋlu.