1 Timote 2 - Nouveau Testament bété de Gagnoa

Bhubhɔsɛ "me

¹ -Ye 'e 'yɔbhɔle 'anye "me lo -noɔ -lɔ nɛɛ -li kleklee "me, 'a -zlɛ Lagɔ, -se 'a bhubhɔ, 'a "pɔlo kokomini yɔko, -se 'a bhɔlo 'nyakpa 'klekle za.

² 'A bhubhɔ -me "kɛ 'lelee -klɔgbɔnya -nyɛ 'kamalenya -wɛ 'wɔ za. -Se -anyɛɛ zikpɛ "kɛ -kɛ "ku -wɔtɔ 'tee, Lagɔ 'na 'dletɛleɛ "me, "ne -ayi 'na 'tee sluɛ "me.

³ -Bɛɛ' 'na -ɛ 'nɛne- -anyɛɛ Fuɔnyɔ Lagɔ -gɛ -wɛ -lɔ.

⁴ "Naa-, 'ɔ 'yɔbhɔ -gbɔ 'nyakpa 'klekle yle 'popoɛ, -se 'wa yibhlele- gbɛklɛklɛ.

⁵ "Naa-, Lagɔ -yle bholo -kpee, "ne -ɔ gbɔ 'nyakpa 'na dɛ Lagɔ yɔko -yle me 'lelee bholo, 'ɔ pa- -lɔ Zezu Kli, -ɔ yli 'nyɔkpɔ "me,

⁶ Lagɔ 'na 'yli -ye 'ɔ di- -wɛ ylɛ lɛ ne, 'ɔ -ple 'ɔnɛɛ zikpɛ, -se 'ɔ "kɛ 'nyakpa 'klekle 'na 'nyinyonoli 'na gbo fle. Klise 'na 'desɛweli "tɛnye 'na -ye Lagɔ -sɛ lɔbhɔ "me -wɛ -lɔ.

⁷ "Ne Lagɔ yi -lɔ -ame "guɔkwɔmenyɔ "ne Zezu 'na "kɔlepɔnyɔ "zoa- -gbɔ 'e me -se 'e 'cia 'nyakpa -na -wa "ne Zufonya -waa -wɛ, 'dlekukɛlesɛ -nyɛ gbɛklɛklɛ "bhaa, gbɛklɛklɛ 'ye 'e bhulɛ -lɔ. 'E -na yowlɛ.

'Widia "ne 'ŋwenea 'na kosɛ

⁸ 'E 'yɔbhɔ -gbɔ 'widia 'na -dee 'wa "mɔ -ko "ne -dee 'wa kɛ -ko, 'wa -gla 'sɔ "nɔgɔ 'glɛ, -se 'wa bhubhɔ 'dle -wɔtɔ "me, -se weli toa 'dlezɔ ko.

⁹ 'E 'yɔbhɔ 'lelee -gbɔ 'ŋwenea -pla "me 'tee, -se 'wanɛɛ "meplakoti te 'nuɔsɔbhɔledɛ kɛle-, -se 'wa te 'wanɛɛ 'nyi visɛ gbɛte. 'Wa te -badlɛ 'gɔgɔ -nyɛ "nyɛne "bhaa sɔ "me 'pɛle-, -se 'wa te 'koti 'na 'ɛ 'tɛ- 'kpɛ "ku -wɛ "me pla-.

¹⁰ -Mɔ, 'wanɛɛ -kosɛ "me 'ye 'wa "kɛ -lɔ 'wanɛɛ "nanoɛ yibhlele-, "ne 'wa "kɛ -lɔ 'ŋwenea 'na 'wa -kɛ Lagɔ 'na 'ŋwɛnɛ "me -wɛ yibhlele- -me 'lelee.

¹¹ 'Wa kɛ 'sloa dɛku -ko, 'ŋwenea -ko 'vlee, -se 'wa 'fo 'yukwli 'plomezosɛ.

¹² 'E "ne 'yɔbhɔ -gbɔ 'ŋwenea sloa, "ne 'e "ne 'yɔbhɔ 'lelee -gbɔ 'wa bhulɛle 'widia 'wanɛɛ -ye 'wa kɛ no -wɛ. -Mɔ, 'wa 'tli "ku 'vlee.

¹³ "Naa-, Lagɔ 'wlɛ- lɛ Ada "bhuɔ ne, "ne 'ɔ yi -da -lɔ Ɛvo 'wlɛ.

¹⁴ -Mɔ, Ada "ne 'awɔ -kɛ "ɛ "mebeamɔ -bhlile, -mɔ, Ɛvo yɔ 'awɔ -lɔ. 'Ɔ -bhlile 'awɔ -lɔ "mebeamɔ, "ne 'ɔ yi 'awɔ -lɔ Lagɔ 'plome sɛ-.

¹⁵ -Mɔ, Lagɔ yu 'fuɔ, 'ɔ kɛ 'ce yua 'gwɛle. "Ne 'ɔ kɛ Lagɔ 'dletɛle-, "ne 'ɔ kɛ 'ŋwɛnɛ "me -kɛ, "ne 'ɔnɛɛ 'dle kɛ 'wɔtɔ-, "ne 'ɔ kɛ 'wlele -ko, 'ɔ yi 'ce 'po.