1 Timote 1 - Nouveau Testament bété de Gagnoa

Pɔle bhɛle Timote

¹ -Ame, Pɔle, Zezu Kli 'na "kɔlepɔnyɔ 'ye 'e -noɔ -lɔ, sɛko -wɛ, Lagɔ, -ɔ -noɔ -anyɛɛ "fuɔnyɔ yɔ, "ne Klise Zezu -ye -a "tɛle 'dle -wɛ -no -lɔ -gbɔ 'e "zo.

² Zaa, Timote, -eyi -mɔɔ -noɔ neɛ' yu gbaa yɔ 'dlekukɛleɛ "me -wɛ, -eyi 'ye 'e 'kɛle lɛ "ku. To Lagɔ "ne Zezu Kli -ɔ -noɔ Anyinɛnyɔ yɔ -wɛ "pɔ -eyi 'ŋu, -se 'ɔ 'tua- -eyi 'ɔnɛɛ 'ŋwɛnɛ 'ylime, -se 'ɔ 'nyɛ -eyi "kuwɛtɛ!

'A luɔle- -kɛ 'wa sloa 'gbeyi "ku -wɛ "ku

³ 'Ɛza, -ye 'e me nɛ Masedoane -glɔ "me -wɛ, 'e -bhulɛle nɛ -lɔ -eyi -gbɔ to- Efɛze -du "me. -Se 'e "kɛ "bhle 'na 'nyakpa 'na -bedia -wa sloa "gbitosɛ -wɛ bhulɛle -gbɔ 'wa te -la sɔbhɔ sloa.

⁴ 'Wa 'bha- gɔgɔ weli, "ne ŋeyi 'kwleyi 'na zɛlezɛleɛ 'beku, 'ɛ nɛme -lɔ weli 'na 'kwleyi, "ɛ -nyɛ -see Lagɔ no -gbɔ 'ɛ ko -wɛ "bhaa 'ɛ "ne "bhle yɛ. -Ɛwɛ -gbɔ -lɔ "ne 'wanɛɛ 'dlekukɛleɛ -ka -lɔ 'kpɔmale.

⁵ "Ɛ -ye 'e no -gbɔ no -wɛ, 'ɛ -noɔ -lɔ nɛɛ: 'Anyɛɛ -waleɛ "kɛ 'kpɔmale 'anye 'glɛme. "Ɛ -waleɛ -wɛ 'ɛ 'bhale- -kɛ 'dle -wɔtɔ "me, "ne 'diɛɛ 'na 'dlekukɛleɛ "me.

⁶ -Bedia 'bha- "ɛ -gwe -wɛ "ku, "ne 'wa -tole kpɛlekpɛleɛ -ɛ "ne -bɛɛ' "me -ko -wɛ 'beku.

⁷ Moyize 'na -Lɔ 'na 'tɔ "me, 'wa 'yɔbhɔ -gbɔ 'wa "kɛ -Lɔsloanya "zo, -mɔ, 'wa "ne -ye 'wa bhulɛ -wɛ -yi. "Ne -ye 'wa bhulɛ 'kwɛmetamalesɛ -gbɔ 'diɛɛ yɛ -wɛ, 'wa "ne -yi.

⁸ -Ɛɛ, -a -yi sɛ -gbɔ Moyize 'na -Lɔ 'nɛne, zaa, -a 'cɛle kɔ 'tee.

⁹ -Se 'a -ya "no 'se -bɛɛ' -bholo "me. -Wa ŋwinɛle- "me -wɛ za 'wa "ne no. -Mɔ, 'kpokponya -wa sɛ 'plome -zo lo -wɛ, konyinɛnya "ne "nyinyonolinonya, -wa "ne "zo Lagɔ, "ne 'ɔnɛɛ -li 'plome -wɛ, -wa lɔbhɔ 'wa 'to -nyɛ 'wa "nɔ 'wɔ "bhaa "ne 'wa "ku -wɛ, "ne 'nyakpa lɔbhɔnya za 'wa wlɛ- -lɔ.

¹⁰ 'Ɛ -Lɔ -wɛ -noɔ me 'nyakpa 'na -wa "ne gbezi 'ŋwenea "ne 'widia "me -wɛ nɛ yɛ, 'nyakpa 'na -wa 'tɛletɛle le siɛ -wɛ, "ne -wa pɔ 'juyua pɔloku -wɛ nɛ yɛ, 'ɛ noɔ me 'lele Yowlɛnya, "ne 'wa zligbɔ fu -wɛ nɛ yɛ. 'Ɛ noɔ me 'lelee -wa -su 'wayi 'kpetekli, "ne -wa "ne 'yɔbhɔ Lagɔweli 'na "meŋwinɛlesɛ 'na sloasɛ -wɛ.

¹¹ "Ɛ sloaweli -wɛ, 'Denaade -ɛ sloa -anye Lagɔ 'na 'ŋlumeɛ 'dɛ -wɛ "me 'ye 'ɛ -ko -lɔ. "Ɛ Lagɔ -ɔ 'yɔbhɔ -anyɛɛ -jɔlo -wɛ, -ɔ 'tle- -lɔ -ame 'ɛ 'Denaade ne yɔko.

Pɔle bhɛle Klise

¹² 'E bhɛle Anyinɛnyɔ Zezu Kli. 'Ɔ -kɛ -ame 'dleku, zaa 'ɔ libhi- -ame 'ɔnɛɛ libhɔ "me "ku, "ne 'ɔ yi -lɔ -ame 'kwɛmetamaleɛ 'nyɛ.

¹³ -Mɔ, 'ɛ -ko sɔbhɔ "ne 'e 'ylu 'awɔ, "ne 'e -ziɔ 'awɔ 'nyɛze, "ne 'e -no 'awɔ kpokpo -li. -Mɔ, Lagɔ pɔ- 'na 'nyɛzedle. 'E no 'awɔ 'ɛ soɔ, -mɔ, 'e "ne 'awɔ -ye 'e no 'awɔ -wɛ -yi. "Naa-, 'e "ne 'awɔ Klise 'dleku -kɛ zɛ.

¹⁴ -Mɔ, 'neɛ -dɛku, Anyinɛnyɔ 'na 'dlekunamaleɛ 'kpɔmale- "yitɛ "ku. Zaa, -Dɛmeda, 'e -kɛ 'dleku, "ne 'e -kɛ 'lelee 'ŋwɛnɛ -ɛ 'bhale Zezu Kli "me -wɛ "me.

¹⁵ Weli -ye -a "kɛ 'dleku kɛle- "ne -ye 'nyakpa 'klekle "kɛ 'kɔsa ne lɛ: Zezu Kli -yi zikpɛ ne "ku -se 'ɔ "kɛ "nyinyonolinonya 'fuɔ. "Ne -ame, 'mɔɔ -noɔ -lɔ "nyinyonolinonya 'na tɛtɛnɔ yɔ.

¹⁶ -Mɔ, Lagɔ pɔ- 'na 'nyɛzedle, "ne Zezu Kli -piɛle 'dle "ku, -ame, tɛtɛ 'nyinyonolinonyɔ ne za, -see -wa kɔ 'ce 'dleku -kɛle ne 'wa "kɛ 'ce -lɔ Lagɔ zikpɛ yle -godogodo 'na dɛ.

¹⁷ 'Nyakpa 'klekle "zo Lagɔ, -se 'wa 'kwɔ- 'ŋlu, Lagɔ, -Klɔgbɔnyɔ -ɔ -yɛ -godogodo! 'Ɔ -ka 'ce "ku, 'nyɔkpɔ -kɔ 'ce 'ylime 'ye. 'Ɔ -noɔ -lɔ Lagɔ 'bholo -kpee yɔ -zeka "ne -godogodo. Amɛn!

¹⁸ Zaa, -ame yowli Timote, -see -e "kɛ sloa, "ne -ye 'e 'je- -eyi kɔ -wɛ -lɔ. "Guɔkwɔmenya 'na -ye 'wa -bhulɛ 'awɔ -neɛ' dɛku -wɛ "bhaa -bhele yɛ -lɔ. 'Ɛ weli -wɛ 'wɔ yi -eyi 'kwɛme "tamalea-, "ne -e "kɛ -lɔ to 'na -to gwe.

¹⁹ 'Dlekukɛleɛ "me, "ne 'dlepɔsɛ -namanɔ "me, -bedia "ne 'wanɛɛ 'dlepɔsɛ 'na 'yukwli fo gbo 'ŋunu-, sɔbhɔ za, 'wa "ne -la 'dleku -kɛ.

²⁰ 'Wayi 'glɛme, Yimene "ne Alɛzadle, 'e pleloa Sata kɔ. 'Ɛza, 'wa yi -da -see 'wa -ka Lagɔ yili -wɛ ciɛ.