1 Tesalonikenya 5 - Nouveau Testament bété de Gagnoa

'Nyɔkpɔ "ne -kɛ Anyinɛnyɔ 'na yizle -yi

¹ -Nyɔsɔwanye, 'ɛ kɛ -kɛ 'yli, "ne -sɔɔdɛku Anyinɛnyɔ "kɛ yi -wɛ yɛ, 'a te -kɛ no -gbɔ 'wa 'kɛle 'anye "ku.

² "Naa-, 'anye 'nabhɛ 'a -yi sɛ 'tee -gbɔ "Bhenyɔ 'na yizle yi 'ce ko sɛgbɛɛ 'winyɔ 'nɔŋo- 'sabo.

³ -Sɔɔdɛku 'nyakpa "kɛ 'ce no nɛɛ -a -yle -la "kuwɛtɛ, "ne gbo -ka -la -dɛme lele-, "ɛ 'doɔ cuu, 'ye "gbɛsɛto "koa -lɔ 'vule-, sɛgbɛɛ 'gwɛlelɔbhɔŋɔnɔ -ye gwɛle -bhlile "ku, 'ɛ -ka 'ce 'nyɔkpɔ 'tle-.

⁴ -Mɔ, -nyɔsɔwanye, 'anye, 'a "ne titiɛ "me -ko zaa, "ɛ zle -wɛ -kɛ 'anye 'vu sɛgbɛɛ 'winyɔ.

⁵ "Naa-, 'anye 'klekle 'napɛ "ku 'na yua 'ye 'a -noɔ -lɔ, "ne 'a -noɔ 'lelee -lɔ zle "ku 'na yua 'waa, -anye, -a "ne 'sabo -nyɛ 'gutitiɛ "bhaa "me -noa 'waa.

⁶ Zaa, 'a -ya te -kɛ ŋɔŋo -wawɛ 'nasɛ, -mɔ, -a ple 'yli, -se -a ko lɔbhɔ, -se -a 'slu- -ayi 'tee.

⁷ -Mɔ, -wa ŋɔŋo -wɛ, 'sabo 'wa ŋɔŋo -lɔ, "ne -wa nɔmɔ -wɛ, 'sabo 'wa nɔmɔ -lɔ kpɛnyee.

⁸ Zaa, -anye -wa -noɔ zle "ku -noɔ 'waa -wɛ, -a 'slu- -ayi 'tee, -se 'dlekukɛleɛ -nyɛ 'ŋwɛnɛmekɛleɛ "bhaa "zo -anyɛɛ "meplakoti, -se -a 'gbli 'dletɛleɛ 'na dagbulɛ 'wlime, -se -a "kɛ -kɛ 'po me.

⁹ "Naa-, Lagɔ "ne -anye la- -gbɔ 'ɔ "kɛ -anye gbo 'wlime 'gbli, -mɔ, -a "kɛ Anyinɛnyɔ Zezu Kli 'na 'tɔ "me 'popoɛ ylele-.

¹⁰ "Naa-, Zezu "ku- -anyɛɛ 'tɔ "me, zaa, yamayamaleɛ "me "ne 'kwiɛ "me, 'ye -a "kɛ -lɔ 'gɔme yamale- "ne -a "kɛ -lɔ bhlea "zo.

¹¹ 'Ɛza, 'a "kɛ -lɔ 'kwɛme 'tamatamalea-, "ne 'a "kɛ -lɔ Lagɔ 'na -gligbɛ 'gɔme sɔbhɔle, -see 'a 'sɛ "kle -wɛ.

'Demezoweli -nyɛ bhɛleweli "bhaa

¹² -Nyɔsɔwanye, -ye -a 'yɔbhɔle 'anye "me lo ne lɛ: 'Nyakpa 'na -nyɔwɔ "bhaa 'a nole libhɔ 'gɔme, "ne 'wa 'kplɛ 'anyɛɛ za -wɛ, "ne -wa -noɔ 'anyɛɛ "klo "ku 'na "yitia 'waa -wɛ, 'a "zoa 'plome, "naa-, Anyinɛnyɔ -soa -lɔ lɔbhɔ -gbɔ 'a kɛ 'kwlɛ -bhli ne, 'wa "kɛ 'anye -gwe 'dɛ 'sloa-.

¹³ Zaa, 'a wamaloa- kpɛnyee -se 'a kɛle- 'wanɛɛ 'ŋwɛnɛ "me, libhɔ -ye 'wa no -wɛ za. "Kuwɔtɛ ko 'anye 'glɛme.

¹⁴ -Nyɔsɔwanye, -ye -a 'yɔbhɔle 'lelee 'anye "me ne lɛ: 'Nyakpa 'na -wa "ku- 'yliku -wɛ, 'a "zoa 'de "me, -se 'wa no libhɔ, "ne -wa "ne -tia 'dleku 'tɛ- -wɛ, 'a 'tamaloa- 'dleku. -Se -ye 'kwɛme yɔle- -wɛ, 'a 'tamaloa- 'kwɛme, -se 'a 'piɛ 'bhle 'dle 'nyakpa 'klekle za.

¹⁵ -Se 'a kɛ lɔbhɔ -ko ne, 'kpɛsɛdɛ te 'ce 'anye 'dlezɔ ko, -mɔ, 'a tɛle- -li 'na -li 'na nonoɛ 'siɛ 'anye 'glɛme "ne 'nyakpa 'klekle 'glɛme.

¹⁶ 'Ŋwɛnɛ 'lɔbhɔ 'ce 'anye -godogodo.

¹⁷ -Se 'a bhubhɔ- 'yiɛ.

¹⁸ -Dee 'a "mɔ -ko "ne -dee 'a kɛ -ko, 'a 'bhɛle- Lagɔ, "naa-, 'ɛyi 'ye Lagɔ 'yɔbhɔle -lɔ 'anye -wa -ko Zezu Kli "me -wɛ "me lo.

¹⁹ 'A te -kɛ Zuzu Wlewle 'na libhɔ 'nyegbea-.

²⁰ -Se 'a te -kɛ "guɔkwɔmenya 'na bhulɛweli keyi glɛ.

²¹ 'A 'pɔle "me 'dle 'tee, -se 'a "kɛ 'ɛnɛɛ -ɛ 'nɛne -wɛ lɔbhɔ -sɛ.

²² -Ɛ -noɔ "nyɛnye yɛ 'klekle -wɛ 'a 'ylile- 'guɔ.

²³ "Kuwɔtɔ Lagɔ, 'ɔyigɛsɛ 'ɔ 'pla- 'anye 'wlele, -se 'anyɛɛ zuzu, 'anyɛɛ 'wugɔŋo, "ne 'anyɛɛ ku te -kɛ 'nuɔsɔbhɔledɛ kɛle-, Anyinɛnyɔ Zezu Kli 'na yizle.

²⁴ -Ɔ la- 'anye -wɛ "kɛ 'ɔnɛɛ weli bhulɛ-, 'ɔ "ne 'bhɛ- "ku, zaa, 'ɔyi 'ce 'lelee -ɛ kɛ lɔbhɔ -ko no.

²⁵ Zaa, -nyɔsɔwanye, 'a bhubhɔ- -me -kɛ -anyɛɛ za Lagɔ.

²⁶ -Se 'a 'bhɛle- "nowlia 'klekle 'wɔ, -se 'a tuloa- "ku.

²⁷ -A bhubhɔ -kɛ 'anye Anyinɛnyɔ 'na 'tɔ "me, -gbɔ 'a zɛle -kɛ "ɛ "bɔgo ne "me, "nowlia 'klekle 'yliku.

²⁸ "Bhenyɔ Zezu Kli 'na -jɔlo ko 'anye "ku.