1 Tesalonikenya 4 - Nouveau Testament bété de Gagnoa

'A ko -see Anyinɛnyɔ 'yɔbhɔ -wɛ

¹ -Nyɔsɔwanye, -a -sloa 'anye -see 'a "kɛ -ko "ne 'a "kɛ Lagɔ -gɛ 'namale- -wɛ, "ne "ɛ soɔ -see 'a -ko -wɛ 'nɛne-. -Dɛmeda, -a -bhulɛle 'anye "ne -a "zo- 'anye 'de "me Anyinɛnyɔ Zezu 'na 'tɔ "me, 'a 'ple -na lɔbhɔ.

² "Naa-, 'a -yi 'de 'na -ye -a "zo- 'anye "me Anyinɛnyɔ Zezu 'na 'tɔ "me -wɛ zɛ.

³ Lagɔ 'yɔbhɔ -gbɔ 'a ko 'wlewle 'ɔyi 'yliku. Zaa, 'a te -kɛ gbo zlɛ.

⁴ -Ɔ kɔkokɔko yibhlele- 'ŋɔnɔ 'kwɔsɛ 'wlewle -koɛ "me "ne 'plomezoɛ "me.

⁵ Zaa, 'a te se 'anyɛɛ 'dle 'na -ye 'ɛ 'yɔbhɔ -wɛ "ku zia sɛgbɛɛ 'nyakpa 'na -wa "ne "zo Lagɔ -wɛ.

⁶ "Ɛ weli ne kɔ, 'nyɔkpɔ te 'ɔ "nɔwli "nyɛnye no -se 'ɔ 'to gbo 'wlime 'gbli. "Naa-, Anyinɛnyɔ ziɛ -kɛ -ɛwɛ 'klekle 'na gbo, sɛko -wɛ, -a -bhulɛle nɛ 'anye "ne -a "pleplele- nɛ lɔbhɔ "me.

⁷ "Naa-, Lagɔ "ne 'se -anye la- -gbɔ -a "kɛ -ayi 'fe 'pla-, -mɔ, 'ɔ 'yɔbhɔ -gbɔ -a ko 'wlewle.

⁸ Sɛko -wɛ, -ɔ sɛ 'demezoweli 'na lo -wɛ, 'nyɔkpɔ 'na lo 'ye 'ɔ 'na kɛ -sɛ, -mɔ, Lagɔ 'ɔyi -ɔ 'nyɛ- 'anye Zuzu Wlewle -wɛ 'na lo 'ye 'ɔ sɛ -lɔ.

⁹ 'Ɛ -ko sɔbhɔ, -mɔ, 'wa -ka 'se 'anye "ku 'kɛle "ne 'wa "kɛ 'anye -see 'a "kɛ wamalewamale -wɛ sloa. "Naa-, Lagɔ -sloɛ 'anye.

¹⁰ "Ne 'ɛyi 'ye 'a -no -lɔ "nowlia 'klekle -wa -ko Masedoane -glɔ "me -wɛ 'wli. -Mɔ, -nyɔsɔwanye, -a bhubhɔ 'anye, 'a 'ple -na lɔbhɔ 'tekeyi.

¹¹ Zaa, 'a tɛle- -see 'a "kɛ ko "ne 'a "kɛ "ku wɔtɔ -wɛ siɛ, 'a wlo -ye 'a 'bhe- -wɛ "ku, -mɔ 'a te 'alua 'na -li "me 'wlole-, -se 'a no 'ayigɛsɛ 'na libhɔ, -see -a no -gbɔ 'a 'sɛ -wɛ.

¹² -Se -wa "ne 'klecɛ 'waa -wɛ "kɛ 'ce 'anyɛɛ kosɛ 'plome "zo, -se 'a te 'ce 'alua lo ko.

-Wa "ku- -wɛ 'na "kukoweli

¹³ -Nyɔsɔwanye, -a 'yɔbhɔ -gbɔ -a "kɛ 'anye -wa "ku- -wɛ 'na "kukoweli bhulɛle- gbɛklɛklɛ, -se 'a te -kɛ "klo "nyɛne sɛgbɛɛ 'nyakpa 'na -wa "ne 'dletɛleɛ -kɛ kpolokpolo.

¹⁴ "Naa-, -a "kɛ 'dleku -kɛ -gbɔ Zezu "ku- "ne 'ɔ 'wlo- gluzɔ ne, "ɛ sɛbhele -wɛ 'ye Lagɔ "kɛ -lɔ -wa "ku- -wɛ gluzɔ 'wloa- -me Zezu "me.

¹⁵ -Ye -a bhulɛle 'anye ne lɛ, Anyinɛnyɔ 'na sloaweli "me: -Anye -wa -ko zikpɛ ne "ku -wɛ, -a yi "bhle ko -kaa "ne Anyinɛnyɔ "kɛ -lɔ yi, -mɔ, -a -ka -wa "ku- -wɛ 'yuku "ple.

¹⁶ "Nɔgɔzilɔ kɛ "me 'kpa-, "ne 'ɔ kɛ lɛglɛ -bhle, Anyinɛnyɔ 'ɔyigɛsɛ yi "nɔgɔ "me 'bha-. "Ne -wa -kɛ Klise 'dleku "ne 'wa "ku- -wɛ "kɛ 'ce -lɔ gluzɔ 'wlo tɛɛ.

¹⁷ "Ne -anye -wa -yɛ, "ne -a -to lɔbhɔ -wɛ, 'wayi 'wɔ "bhaa, -a "kɛ -da -lɔ "nɔgɔzlu "me Anyinɛnyɔ 'sibhɔle- -ka me, soɔ 'ye Anyinɛnyɔ "bhaa, -a "kɛ -lɔ "ku 'glile- -godogodo 'na dɛ.

¹⁸ Zaa, 'a 'tamatamalea- 'kwɛme "ɛ sloaweli ne "me.