1 Tesalonikenya 3 - Nouveau Testament bété de Gagnoa

Pɔle -lebhele Timote Tesalonike

¹ -Ɛwɛza, -a "ne -da 'bhɛle- "ne -a "kɛ wo-, "ne -a yi -lɔ -ayikɔ Atɛnedu "me to-.

² -A -lebhele 'anye Timote -a "nɔwli, -ɔ -nyɛ Lagɔ "bhaa 'wa nole 'gɔme libhɔ -wɛ "ku, -se 'ɔ "kɛ Klise 'na 'Denaade -sɛ. -A -lebho -se 'ɔ "kɛ 'anyɛɛ 'dlekukɛleɛ "me "tamalea-, -se 'ɔ "kɛ 'anye 'kwɛme "tamalea-,

³ 'gbapegbapeɛ -ye 'a -ko "me -wɛ te -kɛ 'anye geji "ku -sɛ. "Naa-, 'anye 'nabhɛ 'a -yi sɛ -gbɔ -ye Lagɔ wɔkɔ -anyɛɛ za -wɛ, 'gbapegbapeɛ -ko me "me.

⁴ -Sɔɔdɛku -a -ko nɛ 'anyɛɛ moɔ -wɛ, -a -bhulɛle 'awɔ 'anye "kle -gbɔ -a yi nɛ -kɛ 'gbape. Lɔbhɔ -ylɛ lɛ, 'a -yi sɛ.

⁵ 'Ɛnɛɛ za, 'e "ne nɛ -da 'bhɛle- -se 'e "kɛ wo. "Ne 'e yi -lɔ Timote 'lebhe- -se 'ɔ "kɛ 'anyɛɛ 'dlekukɛleɛ 'na 'de -ame -sɛle. 'E gu nɛ -bɛɛ' -bholo -gɛ zɛ. "Mebeanyɔ -no -ka -lalɛce 'anye ylo, -a te nɛ -kɛ "fu kɔ ylɔ- zɛ.

⁶ Timote 'bha- 'anyɛɛ moɔ, 'ɔ -ylɛ -dɛme 'du. 'Ɔ -sɛle -anye -see 'a -kɛ Lagɔ 'dleku, "ne 'a -wa 'alua -wɛ 'na 'de "namanɔ. 'Ɔ -bhulɛ -me -see 'a "ne -anye "ku -dlu -wɛ 'na weli. "Naa-, 'a 'yɔbhɔ -gbɔ 'a "kɛ -anye 'ylime 'ye, -see -anye -a no 'lelee -gbɔ -a "kɛ 'anye 'ylime 'ye -wɛ 'na weli.

⁷ -Ɛwɛ 'wɔ za, -nyɔsɔwanye, -anye 'glɛme 'na "tɛtɛ, -zizi "ne -badego -ɛ -ylɛ lɔbhɔ -wɛ, 'anyɛɛ 'dlekukɛleɛ "tamalea- -lɔ -anye 'kwɛme.

⁸ 'Ɛza, -dɛmenadɛ "ku, -a -yɛ gbligbli, sɛko -wɛ, 'anyɛɛ 'kwɛme 'tɛ- Anyinɛnyɔ za.

⁹ -See -a "kɛ bhɔ Lagɔ bhɛle- 'anyɛɛ za 'a? -See -a "kɛ bhɔ Lagɔ bhɛle- 'ŋwɛnɛ 'klekle -ɛ lɔbhɔ -anye 'anyɛɛ za Lagɔ 'yliku -wɛ 'a?

¹⁰ -A kɛ bhubhɔ -se zle 'ze "ne titiɛ yi -wɛ, "ne -a 'cɛ "ku piɛle ne, -ye -a zlɔ ne lɛ: 'Ɔ "kɛ -kɛ -anye 'bhɛloɛ 'nyɛ, -se -a "kɛ -kɛ 'anye 'ylime 'ye, -se 'e "kɛ -kɛ 'anyɛɛ 'dlekukɛleɛ "ku zimalea.

¹¹ Lagɔ 'ɔyigɛsɛ, -a To "ne -anyɛɛ "Bhenyɔ Zezu Kli jijalea- -anyɛɛ -gwe 'wli, -se -a "kɛ "bhle 'anye ylele-!

¹² Anyinɛnyɔ 'kpɔmalea- 'ŋwɛnɛ -ye 'a -kɛ 'alua za, "ne 'nyakpa 'klekle za "me -wɛ "ku 'yiɛ! "Ɛ -waleɛ -wɛ 'ɛ 'wlole- -kɛ -see -anye -a -wa 'anye -wɛ!

¹³ Sɔbhɔ 'ye 'ɛ "kɛ -ko, "ne Anyinɛnyɔ "kɛ 'ce -lɔ 'anye 'dleku 'tamalea. -Sɔɔdɛku Anyinɛnyɔ Zezu -nyɛ 'ɔnɛɛ 'nyakpa -wa -noɔ 'ɔnoa 'waa -wɛ "bhaa kɛ 'ce -yi, 'a yi 'ce 'wlewle ko -a To Lagɔ 'yliku, "ne -a -ka 'ce 'nuɔsɔbhɔledɛ -yle.