1 Tesalonikenya 2 - Nouveau Testament bété de Gagnoa

Pɔle 'na libhɔ -ye 'ɔ -no Tesalonike ne lɛ

¹ "Nowlia 'wanye, 'anye 'nabhɛ 'a -yi sɛ -gbɔ "fu 'ye 'a "ne -anye 'tee 'sa-.

² "Naa-, 'a -yi sɛ -see -a 'gbape-, "ne -see 'wa -yli -anye Filipodu "me, -mɔ, Lagɔ nyɛ- -anye 'kwɛmetamaleɛ "ne -a yi -lɔ 'anye 'ɔnɛɛ 'Denaade -sɛle 'gbapegbapeɛ "me.

³ Zaa, -anyɛɛ bhulɛweli "ne yo "me -ko, "ne -anyɛɛ 'dlepɔsɛ "ne "nyɛnye yɛ, "ne -a -na 'lelee no -gbɔ -a "kɛ 'anye ylo no.

⁴ -Mɔ, Lagɔ -yi sɛ -gbɔ -a 'bhɛle- 'ɛza 'ɔ -tle -lɔ -anye 'ɔnɛɛ 'Denaade yɔko, zaa, -ye -a bhulɛ -wɛ 'ɛ "ne no -gbɔ -a "kɛ 'nyakpa -gɛ 'namale- za yɛ. -Mɔ, -a "kɛ Lagɔ -ɔ -gɛ 'dlezɔ 'yli -wɛ -gɛ 'namale-.

⁵ "Ne -a -yi 'lelee sɛ -gbɔ -a -na 'ce -zɛ 'nyakpa ylo no, "ne Lagɔ -yi sɛ -gbɔ -a -na 'ce -zɛ 'dle "pɔ -gbɔ 'wa 'je -anye 'dlasi kɔ.

⁶ -A -na nɛ -kɛ 'lelee 'nyakpa 'na 'ŋlukwɛɛ siɛ tɛle-, 'ɛ "zo 'anyɛɛ 'du "me 'na 'nyakpa, "ne 'ɛ "zo -me 'lelee 'du 'na -vidɛ 'na 'nyakpa.

⁷ 'Ɛ "mɔ nɛ -kɛ sɔbhɔ yɛ ne, -anye Zezu Kli 'na "kɔlepɔnya -a yi nɛ -kɛ 'anye "ku 'nɔŋole-, -mɔ 'bhɔ! 'Anye 'glɛme -a -wetia -anyɛɛ 'dle, sɛgbɛɛ gwaŋɔnɔ -ɔ "zolea 'ɔnɛɛ yua 'yliku.

⁸ -See -a 'nɛne 'anyɛɛ za 'dleku -wɛ za, -a -yele nɛ kɔ 'ɛ "ne nɛ -kɛ 'Denaade 'ɛyikɔ za yɛ, -mɔ, -a yi nɛ 'lelee -anyɛɛ zikpɛ 'anye kɔ 'je me. 'Anyɛɛ 'ŋwɛnɛ -ye -a -kɛ "me -wɛ 'kpɔmale- kpɛnyee!

⁹ Zaa, 'a "pɔ libhɔ -ye -a -no "ne -a 'kplɛ- -wɛ "ku 'dle. "Nowlia 'wanye, -a -no libhɔ 'ylokwɛ "ne 'sabo, "ne -a "ne 'ce 'anyɛɛ 'glɛme 'na -bholo 'kpla-, soɔ 'ye -a -sɛle -lɔ 'anye Lagɔ 'na 'Denaade.

¹⁰ 'Anye -wa -kɛ Lagɔ 'dleku -wɛ -see -a -su nɛ -ayi "ku 'anyɛɛ za -wɛ, 'ɛ 'ŋwinɛle- "me "ne 'ɛ "ne nuɛsɔbhɔledɛ -kɛ. 'Anye -nyɛ Lagɔ "bhaa 'anye -noɔ -lɔ 'ɛnɛɛ -wayeɛdɛ 'waa.

¹¹ "Ne -a -yi 'lelee sɛ -gbɔ -a -su 'anye -bholo -bholo sɛgbɛɛ 'to 'ɔ -su 'ɔnɛɛ yua.

¹² 'Ɛza, -a "zo- -lɔ 'anye 'de "me, "ne -a "tamalea- -lɔ 'anye 'kwɛme. "Ne -a yi -lɔ 'anye kɔ 'titli- -gbɔ 'a ko -see Lagɔ 'yɔbhɔ -wɛ, 'ɔyi 'ɔɔ la- -lɔ 'anye -gbɔ 'a "kɛ 'ɔnɛɛ 'Kamalezikpɛ "me plɛ, -se 'a "kɛ 'ɔnɛɛ 'ŋlumeɛ 'na 'didi "me ko -me.

Tesalonike 'na 'nyakpa 'sa- Lagɔweli kɔ

¹³ 'A -gɛ 'yli, sɔɔbɛɛza -a 'bhɛle Lagɔ -godogodo -wɛ, -noɔ -lɔ nɛɛ: -Sɔɔdɛku -a -sloa 'anye Lagɔweli -wɛ, 'a no- "me. 'A "ne -kɛ 'nyɔkpɔsɛ "ku "me no-, -mɔ, Lagɔweli 'nasɛ 'ye 'a no- -lɔ "me, "naa-, Lagɔweli yɛ -lɔ 'diɛɛ, 'ɛ nole -lɔ 'anye libhɔ "me.

¹⁴ Sɛko -wɛ, Lagɔgligbɛ -ɛ -glɛ Zezu Kli glɛ "ne 'ɛ -ko Zude -glɔ "me -wɛ 'ye 'a didale -lɔ, "naa-, -see Zude 'na Lagɔgligbɛ 'gbapele- Zufonya kɔ -wɛ, -nyɔsɔwanye, sɔbhɔ 'ye 'a "nowlia 'wɔ 'gbapea- -me -lɔ 'anye.

¹⁵ 'Wayi Zufonya -wa 'lɔbhɔ- "Bhenyɔ Zezu -nyɛ "guɔkwɔmenya "bhaa -wɛ, "ɛ 'wayi bhlea -wɛ -zia -me 'lelee -lɔ -anye 'nyɛze, -ɛ "ne Lagɔ -gɛ 'nɛne, "ne 'wa yi -lɔ 'nyakpa 'klekle 'na -gbhlenya "zo-.

¹⁶ 'Wa 'titi -lɔ 'anye 'yliku -gbɔ -a te -wa "ne Zufonya 'waa -wɛ, Lagɔweli 'sloa, -se 'wa te -kɛ 'po me, "ne 'wa zimalea -lɔ 'wayigɛsɛ 'wanɛɛ 'nyinyonoli "ku, 'ɛza, Lagɔ 'pɔloa- -lɔ 'kɛle yɔko 'bebhiɛledɛ "ku.

'Ŋwɛnɛ lɔbhɔ Pɔle

¹⁷ "Nowlia 'wanye, yɔko -bhabhaleɛ, 'yli 'na dɛtlomaleɛ yɛ -lɔ, -mɔ, 'dlezɔ 'ye 'ɛ "ne -kɛ -noɔ, -a 'yɔbhɔ nɛ -gbɔ -a "kɛ 'anye 'ylime 'ye ka yi, "naa-, 'anyɛɛ to lɔbhɔ -anye zɛ.

¹⁸ 'Ɛza, -a 'yɔbhɔ nɛ -lɔ -gbɔ -a "kɛ 'anyɛɛ moɔ yi, -ame Pɔle 'nabhɛ "ku -vu 'na dɛ, "ne Sata yi -lɔ -anye -gwe "ku -sɛ.

¹⁹ -Ɛɛ, -anyɛɛ 'dletɛleɛ, -anyɛɛ 'ŋwɛnɛ, "ne -anyɛɛ 'peɛleɛ, 'anye 'waa -lɔ. -Sɔɔdɛku -anyɛɛ "Bhenyɔ Zezu "kɛ 'ce yi -wɛ, 'anyɛɛ za, -anyɛɛ "klo "kɛ -lɔ gbɛklɛklɛ 'pe 'ɔyi 'yliku.

²⁰ 'Diɛɛ yɛ -lɔ, 'anye -noɔ -lɔ -anyɛɛ 'ŋlumeɛ -nyɛ -anyɛɛ 'ŋwɛnɛ "bhaa 'waa!