1 Tesalonikenya 1 - Nouveau Testament bété de Gagnoa

Bhɛleweli

¹ -Ame, Pɔle -nyɛ Silase "ne Timote "bhaa, -a 'kɛle Tesalonikenya 'na Lagɔgligbɛ -ɛ -noɔ To Lagɔ "ne Anyinɛnyɔ Zezu Kli -nɛ yɛ -wɛ "ku. Zaa, Lagɔ "pɔ 'anye 'ŋu -se 'ɔ 'nyɛ 'anye "kuwɛtɛ!

Pɔle -bhɛle 'klecɛnya

² -A 'bhɛle Lagɔ 'ayi 'klekle za, -a sɔbhɔle 'anyɛɛ 'tɔ -anyɛɛ bhubhɔweli "me -godogodo.

³ -A To Lagɔ 'yliku, -anyɛɛ 'dle sibhɔ 'ce 'anye "ku 'yiɛ. -Ɛɛ, 'anyɛɛ 'dletɛleɛ 'tɛ- "me, 'anyɛɛ -waleɛ gbɔ -lɔ "ne 'a no -lɔ -ɛwɛ 'wɔ, "naa-, Anyinɛnyɔ Zezu Kli 'na -see 'a -kɔ 'dleku -wɛ 'tɛ- "me kpɛnyee.

⁴ -A -yi sɛ -nyɔsɔwanye, Lagɔ -wa 'anye, za 'ɔ -sɛ -lɔ lɔbhɔ 'anye.

⁵ "Naa-, 'Denaade -ye -a -sɛle 'anye -wɛ, bhulɛweli 'ɛyikɔ "me 'ye 'ɛ "ne 'anye "ku -ylɛ, -mɔ, Zuzu Wlewle 'na 'bhɛloɛ "ne 'ɔnɛɛ 'kwɛlekwɛleɛ "me yɛ -me -lɔ. "Naa-, -ye -a bhulɛ nɛ -wɛ, -a -cɛ nɛ 'dleku -gbɔ "ɛ 'Denaade -wɛ 'diɛɛ yɛ -lɔ. Sɛko -wɛ, 'a -yi -see -a -su nɛ -ayi "ku 'anye 'glɛme, 'a "kɛ nɛ -kɛ 'tee ko 'na 'ylime.

⁶ Zaa, 'anye, 'a 'didale- -anye "ne Anyinɛnyɔ. 'A 'sa Lagɔweli kɔ 'gbapeɛ "yitɛ "me, 'ɛ -nyɛ Zuzu Wlewle 'na 'ŋwɛnɛ -ye 'ɔ "zo- 'anye "me -wɛ "bhaa.

⁷ 'Ɛ -gbɔ "ne 'a "zo- -lɔ 'dlekukɛlenya 'na -ye 'wa "kɛ didale- Masedoane "ne Akayi -glɔ "me.

⁸ "Naa-, 'anyɛɛ moɔ 'ye Anyinɛnyɔ 'na weli 'bhale- -lɔ, 'ɛ "ne -kɛ Masedoane -nyɛ Akayi -glɔ "me 'na 'nyakpa 'wayikɔ yɛ, -mɔ, 'nyakpa 'klekle -yi sɛ -gbɔ 'a -kɛ Lagɔ 'dleku, zaa, 'nyɔkpɔ "ne -la 'bhɛle- "ne 'ɔ 'cɛ bhulɛ.

⁹ 'Nyakpa sɛ -see 'a "zolea- -anye 'yliku 'anyɛɛ moɔ -wɛ 'na 'de. -See 'a -glɛ Lagɔ "klo, "ne -see 'a 'tale- "fu 'na Lagɔ yi, "ne 'a yi -diɛnadiɛ 'na Lagɔ, -ɔ -yɛ 'gbligbli "ku lɔbhɔ- -wɛ 'na 'de,

¹⁰ -se 'a "kɛ wo-, -se 'ɔ yowli "kɛ "nɔgɔ "me 'bhale-. "Ɛ yu -wɛ, Zezu -ye Lagɔ -sɛ -glukonya 'glɛme, "ne -ɔ "kɛ -anye Lagɔ 'na gbobhleleɛ, -ɛ "ne dɛtlo -wɛ 'wlime -sɛ yɔ -lɔ.