1 Piɛle 5 - Nouveau Testament bété de Gagnoa

Lagɔ-gligbɛɛ "me 'na "yitia 'na 'demezoweli

¹ -Dɛmeda, 'e bhulɛle "yitia -wa -ko 'anye 'glɛme -wɛ. -Ame "yitɔ 'ye 'e -noɔ -me -lɔ 'anyɛɛ sɛ. 'E 'ye- Klise 'na 'gbapesɛ 'na dɛ, "ne 'e yi 'ɔnɛɛ 'ŋlu -ɛ "kɛ yi -wɛ 'na dɛ 'ye me.

² 'A slu- -kɛ 'nyakpa -ye Lagɔ -kulɛle 'anye "ku -wɛ 'tee -see wliagɛlenyɔ -su 'ɔnɛɛ wlia 'tee -wɛ. 'Ɛ "ne -kɛ "klepaa yɛ, -mɔ, 'dlewɔtɛ "me, -see Lagɔ 'yɔbhɔ -wɛ. 'A 'cɛ no, 'ɛ te -kɛ 'dlasi za "zo, -mɔ, 'dle 'na 'dle kɔ.

³ Nyakpa -ye Lagɔ -kulɛle 'anye "ku -wɛ, 'a 'toa 'wlime 'gbli, -mɔ, 'a "zo -kɛ wliagɛlenya 'na -ye 'wa "ciɛle lɛ yɔko.

⁴ Lɔbhɔ 'na dɛku -zle wliagɛlenyɔ 'na "cifi -kɛ 'ce -yi, 'a yi 'ce 'peɛleɛ 'na -ɛ me 'ŋlu -godogodo yle-.

⁵ 'Anye, 'teyigba, 'a "zo "yitia 'plome, "ne 'anye 'klekle, 'a 'kwlialea- 'ayi "ku 'nyakpa 'yliku. 'Naa-, Lagɔbɔgo nɛɛ: «Lagɔ "ne wolo- -wa bha -wɛ "ku 'tee, -mɔ, 'ɔ -ko 'nɛne, -wa 'kwlialea 'wayi "ku -wɛ za.»

⁶ 'A 'kwlialea- 'ayi "ku, Lagɔ 'na 'bhɛloɛ 'yliku, -se 'ɔ "kɛ 'anye 'wli "ku 'libhi -zle lɔbhɔ kɛ 'ce -ylɛ.

⁷ 'Anyɛɛ 'dlepɛɛ 'klekle, 'a 'je Lagɔ kɔ, "naa-, 'ɔ -su -lɔ 'anye 'tee zɛ.

⁸ 'A -mana nonoli 'klekle "me, 'a 'luɔle- -kɛ 'ayi "ku! 'Anyɛɛ -gblenyɔ, Sata, 'ɔ klu "ne 'ɔ bli "ku sɛgbɛɛ gbi, 'ɔ 'tɛle -ye 'ɔ "kɛ li -wɛ 'siɛ.

⁹ 'A "tamale- "me 'dlekukɛleɛ "me -se 'ɔ te -kɛ 'anye lu. 'A -yi sɛ -gbɔ -glɔ ne zɔ, 'a "nowlia "ne 'a "nɔyoa 'klecɛnya 'gbape me 'anyɛɛ sɛ.

¹⁰ 'Anyɛɛ 'gbapeɛ -ka "me 'gwlɛ. -Mɔ, Lagɔ -ɔ -wa 'anye -wɛ, 'ɔ la- -lɔ 'anye -se 'a "kɛ 'ɔnɛɛ 'ŋlu -ɛ "ne "nenidɛ -kɛ -wɛ 'na dɛ 'ye, Zezu Kli "bhaa 'na "kukoleɛ "me. "Naa-, 'ɔ yi gbɔ "ne 'a -ka 'nuɔsɔbhɔledɛ kɛle-, "ne 'a yi "me "tamale-, "ne 'a yi 'kwɛme "tamale-, "ne 'wa -ka 'ce -la 'anye 'siɛ 'bhle.

¹¹ 'Ɔyi, 'ɔɔ 'bhe- -lɔ 'bhɛloɛ -godogodo. Amɛn!

Bhɛleweli

¹² 'Anye 'ye 'e 'kɛle lɛ "bɔgo -ye 'e -slua Silase ne "ku. -Ame 'neɛ dɛku, "nɔwli 'na -ɔ "tɛle -ame 'dle yɔ -lɔ. 'Anye 'ye 'e 'pɔ lɛ "bɔgo ne "ku, -se 'e "kɛ 'anye 'kwɛme "tamalea-, -se 'e "kɛ 'lelee 'anye bhulɛle nɛɛ: Lagɔ 'na -diɛɛ 'na diɛɛ 'na -jɔlo ne lɛ, 'a 'kɛle- -kɛ "ɛ -jɔlo -wɛ kɔ klekle!

¹³ Lagɔgligbɛ -ɛ -ko Babilɔne -wɛ bhɛle 'anye. Lagɔ -tɔ -me -lɔ 'anyɛɛ sɛ. Malke, -ame yowli bhɛle -me 'lelee 'anye.

¹⁴ 'A bhɛlebhɛlele-, 'a tutule- -nayuasɛ "ku. "Kuwɔtɛ ko 'anye 'klekle "ku, 'anye -wa -kole lɛ "ku Klise "me ne.