1 Piɛle 4 - Nouveau Testament bété de Gagnoa

'Klecɛnya 'na zikpɛ -lele

¹ Klise 'gbapele- 'ɔnɛɛ ku "me. Zaa, 'anye 'lelee, 'ɛ ko sɔbhɔ 'anye 'wlime -gbɔ 'a yi 'gbape -me: 'Klecɛnyɔ -ɔ 'gbapele 'ɔnɛɛ ku "me Zezu Kli za -wɛ, 'ɔ 'tale- 'nyinyonoli 'yi. 'Anyɛɛ dɛku, "ɛ 'dlepɔsɛ -wɛ, 'anyɛɛ 'togweli 'ye 'ɛ "kɛ -lɔ "zo.

² "Tɛnye -ɛ -to "bhle "ne 'a "kɛ -mlɛ zikpɛ ne "ku ko, 'a te 'nyakpasɛ 'na 'dlepɔsɛ -nyɛnye gɛlele-, -mɔ, 'a gɛlele- Lagɔ 'na -ye 'ɔ 'yɔbhɔ -wɛ.

³ 'Diɛɛ, -watɔ -ce, 'a 'yɔbhɔ 'awɔ -gbɔ 'a "kɛ 'ayi slu- sɛgbɛɛ -wa "ne "zo Lagɔ 'nasɛ. 'A -su 'awɔ 'ayi -see 'a 'yɔbhɔ 'awɔ -wɛ, 'a -noɔ 'awɔ lɔbhɔzononya 'waa, no -gbi-nɔmɔnya 'waa. 'A mlɛ 'awɔ kpɛnyee, 'a -noɔ 'awɔ nogbinɔmɔnya 'waa, 'a "zo 'awɔ "fu 'na Lagɔ, -ɛ "ne lɛ 'nɛne gou.

⁴ -Dɛmeda, 'ɛ -nyea "ɛ 'nyakpa -wɛ. 'Wayi 'wɔ "bhaa 'a "ne -da 'nɔŋo-, 'a "ne -da 'wanɛɛ zikpɛ "me 'na nonoli -ɛ labha zu -wɛ "me -ko -me, 'ɛza, 'wa 'yli -lɔ 'anye.

⁵ -Mɔ, 'wa yi 'ce 'wanɛɛ -ye 'wa -no -wɛ 'na 'de Lagɔ -sɛle, -ɔ -bhɛme -se 'ɔ "kɛ -wa -yɛ "ne -wa "ku- -wɛ gbobhlele.

⁶ 'Ɛnɛɛ za, 'wa -sɛle -lɔ 'Denaade -glukonya 'nabhɛ. 'Wa -bhleloa gbo 'wanɛɛ nonoli za, 'nyakpa klekle 'nasɛ. -Mɔ dɛmeda, Zuzu Wlewle 'na 'bhɛloɛ "me, -see Lagɔ 'yɔbhɔ -wɛ, 'wa yi zikpɛ yle.

'A slu 'anyɛɛ -jɔlo -ye Lagɔ -dlilea 'anye -wɛ 'tee

⁷ Zikpɛ 'na "kubhiɛzle "ne -la dɛtlo. Zaa, 'a 'yamale- 'ylime, 'a te kɛ nonoli "me 'diɔle-, -se 'a "kɛ -kɛ bhubhɔ.

⁸ -Li 'klekle "me, 'a wale- 'dle 'na -dle kɔ, "naa- «-walewaleɛ 'wale -lɔ 'nyinyonoli 'na 'gbagbo "ku.»

⁹ 'A -kɛle 'anyɛɛ -bhudu -ɔkɔkokɔko za, -se 'a te "me 'ŋuŋwɔŋuŋwɔle-.

¹⁰ 'A 'kwɛle-kwɛlele, -se -ɔkɔkokɔko 'na 'bhɛloɛ -ye Lagɔ 'jo- kɔ, 'ɔ no 'ɔlua za. 'A ko sɛgbɛɛ Lagɔ 'na "kulɔbhɔnya 'namanoa, -wa -su Lagɔ 'na 'bhɛloɛ -kwleyi -ye 'ɔ 'nyoa- -wɛ 'tee.

¹¹ -Ɔ bhulɛ -wɛ, 'ɔ bhulɛle- Lagɔ 'na 'tɔ "me. -Ɔ lɔbhɔ -wɛ, 'ɔ lɔbhɔle- Lagɔ 'na 'kwɛme-tamaleɛ -ye 'ɔ 'nyɔ -wɛ "me. -Se Zezu Kli "me Lagɔ "kɛ 'ŋlu me -li 'klekle "me. 'Ɔ 'bhe- -lɔ 'ŋlumeɛ, "ne 'bhɛloɛ -godogodo 'na dɛ! Amɛn.

'A kɛ 'klecɛ -gbo "me 'gbape, 'ŋwɛnɛ 'lɔbhɔ 'anye!

¹² 'Titoa -awale 'wanye, 'a -ko 'gbape-gbapeɛ 'na -kosu "me. 'Ɛ te 'anye geji "ku -sɛ, sɛgbɛɛ sɔbhɔ 'na -bɛɛ' -ka nɛ 'anye yle-!

¹³ -Mɔ, 'a kɛ -diɛnadiɛ Klise 'nasɛ 'gbape ne, 'ŋwɛnɛ 'lɔbhɔ 'anye. 'Naa-, 'ɔnɛɛ 'ŋlu kɛ zɔ 'wlo-, 'ŋwɛnɛ yi 'ce 'anye 'lɔbhɔ, "ne "ɛ 'ŋwɛnɛ -wɛ yi 'ce 'anye "ku yiɛ -blɛblɛ.

¹⁴ 'Wa kɛ 'anye 'yli- Klise 'na gɛle -gbo "me, -ɛ -le bhɔ "ɛ 'ŋwana "ku! Lagɔ Zuzu, 'ŋlume Zuzu -ko 'anye "ku!

¹⁵ 'Anye 'glɛme, 'nyɔkpɔ kɛ 'gbape ne, 'ɔ te -kɛ ko sɛgbɛɛ 'nyɔkpɔ 'ye 'ɔ 'lɔbhɔ-, sɛgbɛɛ 'wi 'ye 'ɔ 'yli-, sɛgbɛɛ "nyɛnye 'ye 'ɔ -no, "ne sɛgbɛɛ "ku 'ye 'ɔ -no bidibidi.

¹⁶ -Mɔ, 'ɔ -kɛ 'gbape -se 'ɔ -noɔ 'klecɛnyɔ yɔ -wɛ za, zu -kɔ 'lɔbhɔ. Lagɔ 'ye 'ɔ "kɛ -lɔ 'bhɛle- -tiaa -se 'ɔ -su Klise 'na 'tɔ -wɛ za.

¹⁷ 'Diɛɛ, -gbobhleɛ 'na "ku 'cile -dɛme yɛ -lɔ, "ne Lagɔ 'na -gligbɛnya 'ye 'ɛ 'cile -lɔ "ku. 'Ɔ kɛ -anye "ku 'cile ne, -wa -sɛ 'Denaade 'na 'dleku -kɛle -lo -wɛ -see 'wanɛɛ "kɛ bhɔ 'wlizɔ bhiɛle 'a?

¹⁸ Lagɔbɔgo nɛɛ: «'Nyakpa -wa no 'nɛne -wɛ "kɛ "po ne, -ɛ 'tɛ- "me. Zaa, -ye 'nyakpa -gbeyia "ne 'nyinyonolinonya "kɛ bhɔ "me 'ylile 'a?»

¹⁹ 'Ɛza, -wa no -ye Lagɔ 'yɔbhɔ "ne 'wa 'gbape -wɛ, 'wa yi 'wayi 'wanɛɛ 'Wlɛnyɔ, -ɔ "ne 'bha- 'ɔnɛɛ bhulɛweli "ku -wɛ "ku kulɛle-, -se 'wa "kɛ 'nɛne no 'yiɛ.