1 Piɛle 3 - Nouveau Testament bété de Gagnoa

'Ŋwenea "ne 'wanɛɛ 'widia

¹ 'Anye 'ŋwenea 'lelee, 'a 'kwlilea- 'ayi "ku 'a 'luwlia 'yliku. "Ne -e 'luwli "mɔ 'se "ɛ Lagɔweli 'dleku -kɛ -ce, -neɛ' -kosɛ yi gbɔ "ne 'ɔ 'yi 'dleku kɛle-. "Ne -eyi, -e "ne -da bhulɛweli -kɛ,

² "naa- 'ɔ yi -neɛ' -kosɛ 'wlele "ne -neɛ' 'plomezosɛ 'ylime 'ye.

³ 'Anyɛɛ nanoɛ te kɛ -vidɛ 'bhale-: Sɛgbɛɛ 'anyɛɛ 'nyi 'na tɛletɛleɛ, -badlɛ -gɔgɔ', "meplakoti 'na -ɛ 'tɛ- 'kpɛ "ku -wɛ.

⁴ 'Anyɛɛ nanoɛ zizɔle- -kɛ 'anye 'nabhɛ "me. 'Dlewɔtɛ, -zigbadlekɛleɛ, "nanoɛ 'na -ye Lagɔ 'kwa 'ŋlu -wɛ -lɔ, 'ɛyi -wɛ 'tɛ- -lɔ 'kpɛ "ku Lagɔ 'yliku, "ne 'ɛyi -wɛ "ne bhiɛ "ku kplokplo.

⁵ Bhlɛme, 'dlekukɛle -ŋwenea -wa tɛle- 'awɔ Lagɔ 'dle -wɛ 'nɛne 'awɔ "ɛ soɔ, "naa-, 'wa "zo 'awɔ 'wa 'luwlia 'plome.

⁶ 'A -gɛyli, Sala "zo 'awɔ 'ɔ 'luwli Ablame 'plome, "ne 'ɔ lɔ 'awɔ -lɔ 'na «"Bhenyɔ.» -Nyanɔ "mɔ 'anye ku "me ko "ne 'a kɛ -li 'na -li no 'ɔnɛɛ 'ŋuyua 'ye 'a -noɔ -lɔ.

⁷ 'Anye, 'widia 'lelee, -dee 'a -kole "ku -wɛ, 'a slu- 'anyɛɛ 'ŋwenea 'tee. 'Ŋwenea 'na ku "ne "me 'tɛ-, 'a yibhlele- -kɛ sɛ. 'A "zoa 'plome. "Naa-, 'anyɛɛ sɛ, Lagɔ yua 'ce zikpɛ 'na -ɛ -ka "kubhiɛ kɔ 'je. 'A 'cɛ soɔ 'sa ne, -ɛ "kɛ 'anyɛɛ 'bhubhɔweli 'nyegbea- "ne -le.

'A kole- "ku, -se 'a 'pɔ sɛbhele 'dle

⁸ 'A kole- "ku, -se 'a 'pɔ sɛbhele 'dle. 'A wale- "nowlia 'nasɛ. 'A komale- 'nɛne, 'a 'kwlialea- 'ayi "ku 'alua 'yliku.

⁹ -Ɔ no 'anye "nyɛnye 'wli -wɛ, 'a 'to "nyɛnye 'wli no -me, "ne -ɔ 'yli 'anye -wɛ 'a 'to 'yli -me. -Mɔ, 'a no -gbɔ: «Lagɔ "pɔ -eyi 'ŋu!» "Naa-, -sɔɔdɛku Lagɔ la- 'anye -wɛ, 'ɔ "kɛ 'anye 'ŋu "pɔ za yɛ -lɔ.

¹⁰ Sɛne Lagɔbɔgo gbɔ -lɔ nɛɛ: «'Nyɔkpɔ kɛ no -gbɔ 'ɔnɛɛ zikpɛ "kɛ 'tee ko, -se 'yli 'klekle "me 'ŋwɛnɛ "kɔ 'lɔbhɔ ne, 'ɔnɛɛ 'nuɛgwe te -kɛ "nyɛnye bhulɛ -se 'ɔnɛɛ 'nuɛgwe te -kɛ yo wlɛ-,

¹¹ 'ɔ 'ylile- "nyɛnye 'guɔ, -se 'ɔ no -li 'na -li, 'ɔ tɛle- "kuwɛtɛ 'siɛ, -se 'ɔ te "kuwɛtɛ 'na 'siɛtɛle -za 'diɔle-.

¹² 'Diɛɛ, Anyinɛnyɔ 'na 'yli -ko -wa ŋwinɛle- "me -wɛ "ku, 'ɔ fo 'wanɛɛ 'bhubhɔweli 'yukwli. -Mɔ, Anyinɛnyɔ "ne 'ŋunule- "nyɛnyenonya.»

'A kɛ 'gbape -li 'na -li 'na no za

¹³ 'Anyɛɛ 'dle 'klekle "me, 'a kɛ -li 'na -li 'na nonoɛ 'siɛ tɛle- ne, -ɔ "kɛ bhɔ 'anye "nyɛnye 'wli no?

¹⁴ "Ne -zlewɛ, 'a kɛ 'gbape, -li 'na -li -ye 'a no -wɛ za ne, -ɛ -noɔ bhɔ "ɛ -jɔlo yɛ! 'A te 'nyakpa -gɛ "gu -se 'dle te 'anye 'nuɔ 'yiɛ!

¹⁵ -Mɔ, 'a yibhlele- 'dlezɔ sɛ nɛɛ Klise, 'ɔyikɔ -bholo -ko -lɔ 'wlewle, "ne 'ɔ -noɔ -lɔ Anyinɛnyɔ yɔ. 'Wa kɛ 'anye lo 'yɔbhɔ -gbɔ sɔɔbɛɛza 'a 'tɛlo- bhɔ 'dle, 'a te "me 'cece -se 'a "koa zɔ 'sibhalea-.

¹⁶ 'A nole- 'dlewɔtɛ "me, 'plomezoɛ "me, -se 'dlezɔ ko 'anye foo. -Se 'nyakpa kɛ 'anyɛɛ 'tɔ nyimɔ -see 'a -noɔ 'klecɛnya 'wa -wɛ za, zu "koa 'ce 'lɔbhɔ.

¹⁷ 'Diɛɛ, Lagɔ kɛ "ku 'ŋunu- "ne -e kɛ 'gbape -li 'na -li 'na no -za ne, 'ɛ 'nɛne "ne 'ɛ -zi -ɔ -no "nyɛnye "ne 'ɔ 'gbape -nɛ -wɛ "ku.

Klise -lu 'gazoɛ to "me

¹⁸ "Naa-, Klise 'ɔyigɛsɛ "ku- "ku -bholo, 'nyakpa 'na 'nyinyonoli za. 'Ɔyi, -ɔ "ne 'nyinyonoli -no -wɛ "ku- -wa -no "nyɛnye -wɛ 'na 'ylime, -se 'ɔ "kɛ 'anye Lagɔ 'na -gwe "ku 'sibha-. Klise, 'wa 'lɔbhɔ- "ne 'ɔ "ku-, "ne Zuzu Wlewle yu -lɔ golia-.

¹⁹ "Ne 'ɔ yi -lɔ -glukonya -wa -ko nɛ -jiɛ "me -wɛ 'Denaade -sɛle -ka me.

²⁰ "Ɛ 'kwia -wɛ, 'nyakpa -wa -sɛ 'awɔ bhlɛme Lagɔ 'plome -wɛ 'waa -lɔ, -sɔɔdɛku Lagɔ 'piɛ- 'awɔ "bhle 'dle 'nyakpa za -wɛ. -Sɔɔdɛku Nowe tɛle 'awɔ 'ɔnɛɛ gɔlo didigbeglwi -wɛ yɛ 'awɔ -lɔ. 'Nyakpa 'na yɛ 'gbɔɔta cuu -plɛ 'awɔ -lɔ "ɛ gɔlo -wɛ "me, 'waa- 'po- 'awɔ -lɔ, 'ŋu "noa 'awɔ 'lɔbhɔ -me.

²¹ 'Anye 'lelee, batɛme -ɛ 'fuɔ -zeka 'anye -wɛ 'na didale yɛ -lɔ -tiaa. Batɛme ku yɔko 'na 'fe 'ye 'ɛ -na -kɛ lɔbhɔ -sɛ, -mɔ, Batɛme 'na yleyleɛ, Lagɔ 'na laweli 'na "kuŋunuɛ 'dlewɔtɛ "me yɛ -lɔ. Batɛme 'fuɔ -lɔ 'anye, sɛko -wɛ Zezu Kli 'wlo- -glukonya 'glɛme zɔ zɛ.

²² 'Ɔ 'gblɛ- "nɔgɔ "me, 'ɔ 'gli- Lagɔ 'na lilikwlɛ -gbɔsɔ "ku. -Dɛmeda, 'ɔ -kɛ 'bhɛloɛ "ne 'ɔ zi "nɔgɔzilia 'klekle -nyɛ zuzu 'klekle -wa 'kamalea "ne -wa -kɛ 'bhɛloɛ -wɛ "bhaa "ku.