1 Piɛle 2 - Nouveau Testament bété de Gagnoa

Lagɔ 'na 'dlekukɛlenya 'wlewle

¹ 'A 'tale -ɛ -noɔ -konyinɛ yɛ 'klekle -wɛ 'yi, 'a te 'nyɔkpɔ ylo no, 'a te -jijigbɛlɛ "zo, -se 'a te lɔbhɔzo no, -se 'a te 'alua 'na weli -nyɛnye bhulɛ.

² Sɛgbɛɛ yua 'lelea 'na -ye -wa -gwɛle -dɛme ne, Lagɔ 'na bhulɛweli -ɛ -le sɛgbɛɛ 'nyeteŋu -wɛ 'na to -na lɔbhɔ 'anye. 'Ɛ -noɔ -lɔ 'nyeteŋu 'na -ɛ -ko 'wlele -wɛ yɛ, "naa-, 'a 'cɛ 'nɛmɔ-, 'a yi 'bhoɔ "ne 'a yi "po.

³ "Naa-, Lagɔ-bɔgo nɛɛ: «'A 'ye- -see Anyinɛnyɔ -ko 'nɛne -wɛ 'ylime.»

⁴ 'A 'nyiɔ- Anyinɛnyɔ Zezu yɔko. 'Ɔɔ -noɔ -lɔ -yɛyɛ -tiyi yɔ. 'Nyakpa 'pɔ- 'kwlɛ "me, -mɔ, Lagɔ -tɔ. "Ne 'ɔ 'kɛlele Lagɔ gbo.

⁵ Zaa, 'a 'nyiɔ -mo yɔko. -See 'anye 'lelee, -yɛyɛ -tiyi 'nasɛ, 'a "kɛ Zuzu Wlewle 'na -bhudu sɔbhɔ. -Se 'a "kɛ bɔbɔnya 'wlewle 'na -gligbɛ -duku 'jilɛ, -nyɔ 'na bɔbɔli 'ye Lagɔ 'sa- kɔ Zezu Kli za -wɛ.

⁶ "Naa-, Lagɔ-bɔgo "me, Lagɔ nɛɛ: «'A 'wolo "ku! 'E -tɔ 'tiyi 'na -ɛ -kɛ 'neɛ 'dle kɔ. 'Ɛɛ -kɛ -lɔ -bhudu kɔ sɛgbɛɛ -jijɛgblɛ, "ne 'e "zo- -lɔ Sinyɔ -du "me. -Ɔ 'cɛ 'dleku -kɛ, zu -kɔ 'lɔbhɔ.»

⁷ 'Anye -wa -kɛ 'dleku -wɛ, "ɛ 'tiyi ne 'kwa -lɔ 'anye 'ŋlu. -Mɔ, -wa "ne 'dleku -kɛ -wɛ, «'Tiyi 'na -ye -bhudusɔbhɔnya 'pɔ- 'kwlɛ "me -wɛ, 'ɛɛ "zo- -da -lɔ -bhudu 'na jijɛtiyi.»

⁸ "Ne -vidɛ ŋwɛnɛɛ: «'Tiyi 'na 'ye 'wa 'gɔzɔ, 'ɛɛ "zo- -lɔ 'tiyi 'na -ɛ 'bhle 'siɛ.» 'Nyakpa 'gɔzɔ, "naa-, 'wa -sɛ Lagɔ 'na weli 'na 'dleku -kɛle -lo, 'ɛwɛ "koa nɛ -lɔ yle.

⁹ -Mɔ, 'anye, 'anye -noɔ -lɔ 'ɔnɛɛ 'nyakpa -ye 'ɔ -tɔ 'waa, 'anye -noɔ -lɔ -klɔgbɔnyɔ 'na bɔbɔnya 'na -gligbɛ 'waa. 'Anye -noɔ -lɔ 'nyakpa 'wlewle 'waa. 'Anye -noɔ -lɔ 'nyakpa 'ye Lagɔ -tɔ 'waa, -se 'a "kɛ -li 'na "yitɛ -ye 'ɔ no -wɛ 'na 'de -sɛ. 'Ɛza, 'ɔ la- -lɔ 'anye -gbɔ 'a 'bha- titiɛ "me, -se 'a "kɛ 'ɔnɛɛ zle -namanɔ "ku yi.

¹⁰ -Watɔ -ce, 'a "ne 'awɔ Lagɔ 'na -gligbɛnya 'waa, -mɔ, -dɛmeda, 'anye -noɔ -lɔ 'ɔnɛɛ -gligbɛnya 'waa. -Watɔ -ce, Lagɔ "ne "pɔ 'awɔ 'anyɛɛ 'nyɛzedle, -mɔ, -dɛmeda, 'ɔ 'pɔ 'anyɛɛ 'nyɛzedle.

'A slu- 'ayi Lagɔ 'na "kulɔbhɔnya 'nasɛ

¹¹ -A 'titoa 'wanye, 'pleplenya -nyɛ 'lowlinya "bhaa 'ye 'a -noɔ -lɔ -dodo ne "ku, zaa, 'e 'yɔbhɔ 'anye lo nɛɛ: 'A te 'dlepɔsɛ -nyɛnye 'ɛ 'gwele 'anye "me -wɛ -gɛlele.

¹² -Wa "ne Lagɔ -yi -wɛ -glɛme, 'a slu- 'ayi 'tee. Lɔbhɔ 'na dɛku, 'wa kɛ 'anyɛɛ "ku 'na weli -nyɛnye bhulɛ -gbɔ 'a no "nyɛnye ne, 'wa yi 'ce 'anyɛɛ -li -namanɔ -ye 'a no -wɛ 'ylime 'ye, "ne -zle Lagɔ -kɛ 'wanɛɛ zipkɛ "me -plɛ, 'wa yu 'ce 'ŋlu 'kwa-.

¹³ 'A "zo 'kamalenya 'plome Anyinɛnyɔ 'na 'ylime: -Se 'a 'kwililea- 'ayi "ku -klɔgbɔnyɔ 'yliku, "naa-, 'ɔɔ -noɔ -lɔ 'nyakpa 'klekle 'na "cifi yɔ zɛ.

¹⁴ 'A 'kwlilea- 'ayi "ku -klɔgbɔnyɔ 'na 'bhulɛ "me -konya 'yliku. "Naa-, -klɔgbɔnya 'lebhoa- -lɔ -gbɔ 'wa "pɔ -wa no "nyɛnye -wɛ -jiɛ "me, -see 'wa "kɛ -wa no -li 'na -li -wɛ 'ŋlu 'kwa.

¹⁵ Lagɔ 'na -ye 'ɔ 'yɔbhɔ lo ne lɛ: 'Anyɛɛ -li 'na -li 'na nonoɛ "me, 'a 'gba 'nyakpa 'na 'wa "ne 'nɛne, "ne 'wa "ne -bɛɛ' -yi -wɛ 'na nuɛ "ku.

¹⁶ 'A slu- -kɛ 'ayi 'tee sɛgbɛɛ 'nyakpa 'na -wa -yele kɔ, -mɔ, 'anyɛɛ kɔyeleɛ -wɛ te -kɛ 'anyɛ nonoli -nyɛnye -wɛ "ku zizi. 'A slu- -kɛ 'ayi 'tee sɛgbɛɛ Lagɔ 'na "kulɔbhɔnya.

¹⁷ 'A "zo 'nyakpa 'klekle -bhlegbi "me. 'A wamale- 'a "nowlia "ne 'a "nɔyoa 'klecɛnya 'wɔ. 'A "gu Lagɔ -gɛ, -se 'a "zo -klɔgbɔnyɔ 'plome.

'A -gɛle Klise 'na -gbudu 'gbapegbapeɛ "me

¹⁸ 'Anye, "kulɔbhɔnya, 'a 'kwililea- 'ayi "ku 'anyɛɛ "bhenya 'yliku, -se 'a "zoa 'plome. "Ɛ 'plomezoɛ -wɛ, 'ɛ "ne -kɛ "bhenya 'na -wa -ko 'nɛne "ne -nyɔ 'wanɛɛ 'dle yɔle- -wɛ 'wayi kɔ 'waa, -mɔ, -wa 'kɛle yɔko -wɛ -ko -me 'lelee "bhle.

¹⁹ 'Kplɛkplɛɛ 'na -ɛ "ne 'anye nɛ yɛ -wɛ 'yele -lalɛce 'anye, "naa-, 'a 'yɔbhɔ -gbɔ 'a "kɛ Lagɔ 'dletɛle zɛ. 'Ɛwɛ -bɛɛ' 'na -namanɔ yɛ -lɔ.

²⁰ "Naa-, 'a kɛ "nyɛnye -no "ne 'ɛnɛɛ za 'wa kɛ 'anye 'sɛpɔ ne, 'ɛ yi bhɔ 'anye -bɛɛ' "ku -nɛme 'a? -Mɔ, -li 'na -li -ye 'a no -wɛ za, 'wa kɛ 'anye 'gbapea-, "ne 'a kɛ 'dleku 'tɛ-, -bɛɛ' 'na -namanɔ yɛ -lɔ Lagɔ 'yliku.

²¹ 'Diɛɛ, -ɛwɛza Lagɔ la- -lɔ 'anye. Klise 'nabhɛ 'gbape me 'lelee 'anyɛɛ za, -se 'ɔ "kɛ 'anye -gwe dɛ -sloa, -se 'a "kɛ 'ce 'ɔnɛɛ -gbudu bhli.

²² 'Ɔyi, 'ɔ "ne "nyɛnye no, "ne 'ɔ "ne 'ce 'nyɔkpɔ ylo no.

²³ 'Ɔyi, 'wa 'ylu lɛ ne, 'ɔ "ne 'ɛ 'yliweli -wɛ 'wlizɔ -zia. -Sɔɔdɛku 'wa 'gbapeɔ nɛ -wɛ, 'ɔ "ne 'ce 'nyɔkpɔ "gua-, -mɔ, 'ɔ 'je- 'ɔyi Lagɔ -ɔ 'bhle gbo "me ŋwinɛlesɛ -wɛ kɔ.

²⁴ Klowa "klo, 'ɔnɛɛ ku "me 'ɔ 'libhi- 'ɔyigɛsɛ -anyɛɛ 'nyinyonoli "ku. 'Ɛza, -a "kɛ -lɔ 'nyinyonoli 'na nonoku 'nyɔkɔ-. "Ne -a "kɛ -lɔ zikpɛ 'na -ɛ 'nɛne Lagɔ -gɛ -wɛ "ku -ko. "Naa-, 'ɔnɛɛ 'gbapegbapeɛ "me 'ye -a -yamale -lɔ zɛ.

²⁵ 'Diɛɛ, 'a -ko 'awɔ sɛgbɛɛ wlia 'na -wa -bhli 'kwlɛ, -mɔ -dɛmeda, 'a 'ylile- wliagɛlenyɔ 'na -ɔ "kɛ 'anyɛɛ zikpɛ -slu -wɛ lo.