1 Piɛle 1 - Nouveau Testament bété de Gagnoa

Bhɛleweli

¹ -Ame, Piɛle, Zezu Kli 'na "kɔlepɔnyɔ, 'mɔɔ 'kɛle lɛ Lagɔ 'na 'nyakpa -ye 'ɔ -sɛ lɔbhɔ "ne 'wa 'glile- 'lowlime "ne 'wa -ŋwɛne Pɔɔ, Galasi, Kapadɔse, Azi "ne Bitini -glɔ "me.

² To Lagɔ -tɔ 'anye "kle -see 'ɔ no -gbɔ 'ɛ -ko yɛ -lɔ. 'Ɔ "zoa- 'anye 'ɔnɛɛ -gligbɛnya 'wlewle 'ɔnɛɛ Zuzu Wlewle "me, -se 'a "kɛ Zezu Kli 'plome "zo, -se 'ɔnɛɛ 'dlu -ɛ slu- 'siɛ -wɛ 'a "kɛ -kɛ "me ko -me. Lagɔ 'pɔ 'anye 'ŋu, -se 'ɔ "nyɛ 'anye "kuwɛtɛ 'na -ɛ zi "ku -wɛ.

Zezu 'na 'dletɛleɛ -ɛ -ka lɛ "kubhiɛ ne

³ -A 'dile Lagɔ lo keyi, Anyinɛnyɔ Zezu Kli 'ɔ To! 'Ɔnɛɛ "nɛnekoɛ "yitɛ "me, 'ɔ -gwɛlele -anye "kusɔ, Zezu Kli 'na -gluzɔwloɛ "me. 'Ɛneɛɛ za -a -kɛ 'dletɛleɛ 'na -ɛ -ka lɛ "kubhiɛ ne,

⁴ "ne -a -wo ŋwɛnɛ "me -li 'na -li 'na -ye Lagɔ -sɛ lɔbhɔ 'ɔnoa za -wɛ. 'Ɔ -woleɛ -anye 'nɔgɔ "me, -dee 'ɛ -ka lɛ nyimɔ, "ne 'ɛ -ka lɛ 'fe plɛ "ne 'ɛ -ka lɛ 'ɛnɛɛ nanoɛ 'siɛbhle.

⁵ "Ne 'anye 'nabhɛ, 'a kɛ 'dleku -kɛ, Lagɔ -ɔ -kɛ 'bhɛloɛ -kole 'anye "klo -se 'ɔ "kɛ 'anye 'fuɔ. "Ɛ 'popoɛ ne, zikpɛ 'na "kubhiɛ -zle 'ye 'wa 'cɛ 'ce -lɔ yibhlele-.

⁶ 'Ɛnɛɛ za, 'ŋwɛnɛ 'yiɛ- -lɔ 'anye "ku, 'kleyeɛ kɛ 'mlɛ 'se -dɛme 'anye 'gbapea 'tekeyi 'na dɛ ne.

⁷ "Ɛ 'kleyeɛ ne 'gbɔ -lɔ "ne 'wa "kɛ -lɔ 'anyɛɛ 'dlekukɛleɛ 'na kosɛ 'ylime 'ye. -Badlɛ 'bhɛle- 'ɛ "kɛ 'nyimɔ, -mɔ, -ɛ -ko sɔbhɔ "ne 'wa "zo -kosu "me, -se 'wa 'cɛ 'ylime 'ye, 'ɛ kɛ -kɛ 'wlele -ko. 'Ɛ sɛbhele -wɛ 'anyɛɛ 'dlekukɛleɛ -ko -me -lɔ. 'Ɛ -zi -badlɛ "ku, -mɔ, 'ɛyi 'lelee 'wa 'beɛ- "me. Zaa, Zezu Kli kɛ 'ce "kusɔ yi -zle, 'wa 'yi 'ce 'anye -bhlegbi "me "zo, 'wa yi 'ce 'anye 'tɔ zɛle- "ne 'wa yi 'anye 'ŋlu 'kwa- -see 'anyɛɛ 'dlekukɛleɛ 'tɛ- "me za.

⁸ Zezu, 'a 'no 'ylime 'ye, 'ɛ -ko sɔbhɔ "ne 'a -wɔ. 'A -kɔ -na -dɛme 'ylime 'ye, -mɔ 'ɛ -ko sɔbhɔ "ne 'a -kɔ 'dleku. 'Ɛnɛɛ za, 'ŋwɛnɛ "yitɛ 'yiɛ- -lɔ 'anye "ku, 'ŋwɛnɛ "yitɛ -ɛnɛɛ' weli "ne 'bhulɛ -sɛ -kɛ -wɛ.

⁹ 'Ɛ 'ŋwɛnɛ ne 'a -cɛ, "naa- 'a -po zɛ. 'Anyɛɛ 'peɛleɛ -ye 'a ylele Zezu Kli 'na 'dlekukɛleɛ "me -wɛ -lɔ.

Lagɔ 'na Zuzu bhulɛle "guɔkwɔmenya "me

¹⁰ -Watɔ -ce, 'ɛ 'popoɛ ne za, "guɔkwɔmenya -tɛle 'awɔ 'siɛ kpɛnyee. 'Wa bhulɛ 'awɔ "kle 'nyɛnyɛ -bɛɛ' -ye 'a "kɛ yle -wɛ 'na weli.

¹¹ Klise 'na Zuzu -koa 'awɔ "me, "ne 'ɔ yu 'awɔ -lɔ Klise 'na 'gbapeɛ 'ylime -tua "kle, 'ɛ -nyɛ 'ɔnɛɛ 'ŋlumeɛ -ye 'ɔ "kɛ nɛ -yle -wɛ "bhaa. "Guɔkwɔmenya -tɛle -sɔɔdɛku "ne -see 'ɛ -li -wɛ 'wɔ "kɛ -ylɛle -wɛ 'siɛ.

¹² -Ye Lagɔ -sloa ne lɛ: 'De -ye 'wa -sɛ 'awɔ -wɛ "ne nɛ 'wanɛɛ yɛ, -mɔ, 'anye nɛ yɛ -lɔ. -Dɛmeda, -wa -sɛle 'anye 'Denaade -wɛ -blialea 'ɛ 'de ne 'du, 'ɛ -nyɛ Zuzu Wlewle -ɔ 'bhale "nɔgɔ "me 'na 'bhɛloɛ "bhaa. "Ne 'ɛ weli ne, "nɔgɔzilia 'wayi -gɛsɛ 'wa 'yɔbhɔ -gbɔ 'wa 'cɛ yibhlele- -me kpɛnyee.

'A ko 'wlewle 'anyɛɛ -kosɛ 'klekle "me

¹³ 'Ɛnɛɛ za, 'a 'luɔ- -kɛ! 'A 'fo 'yukwli! -Se 'a "zo 'anyɛɛ 'dletɛleɛ 'nyɛnyɛ -bɛɛ' -ye 'a "kɛ yle -wɛ "me, -sɔɔdɛku Zezu Kli "kɛ 'anye 'yliku 'sibhɔ.

¹⁴ 'A "zo Lagɔ 'plome, 'a -namlɛ Zezu yibhlele- 'na 'dlepɔsɛ -nyɛnye -ye 'a -kɛ 'awɔ -watɔ -wɛ, 'a 'tale- 'yi.

¹⁵ Lagɔ, 'ɔ la- 'anye "ne 'ɔ -ko 'wlewle, zaa, 'anye 'lelee, 'a ko me 'wlewle 'anyɛɛ -kosɛ 'klekle "me.

¹⁶ 'Ɛ 'kɛleɔ- Lagɔbɔgo "me nɛɛ: «'A ko 'wlewle, "naa- -ame, 'e -ko 'wlewle zɛ.»

¹⁷ 'Anyɛɛ bhubhɔweli "me, Lagɔ 'ye 'a la -lɔ «To» -ɔ 'bhle -ɔkɔkokɔko 'na 'ye 'ɔ -no -wɛ 'na 'gbo, 'ɔ "ne 'dlidlile 'nyakpa "me. Zaa, 'a "zo Lagɔ 'plome 'dlekukɛleɛ "me, -sɔɔdɛku 'a -ko -mlɛ dodo ne "ku -wɛ.

¹⁸ 'A 'to 'wa 'to 'wɔ 'na kosɛ -nyɛnye -ye 'wa -sloa 'anye -wɛ "ne -bɛɛ' "me -ko. -Mɔ, 'a -yi -sɛ -gbɔ Lagɔ 'peɛle- "yitɛ "ku, "ne 'ɔ yi -lɔ 'anyɛɛ kosɛ -nyɛnye 'na 'galu 'di. "Naa-, 'ɔ "ne -li -ɛ nyimɔ -wɛ "me 'peɛle-, sɛgbɛɛ -badlɛ "ne 'dlasi.

¹⁹ -Mɔ, 'ɔ -sɛ 'anye 'galu 'yli Klise 'na 'dlu 'wlewle "me, -ɔ -ko sɛgbɛɛ 'bhlɛbhlɛyu -ɔ "ne lɛ 'nuɔsɔbhɔledɛ -kɛ, "ne -ɔ "ne "nyɛnye yɔko -kɛ.

²⁰ Lagɔ -namlɛ zikpɛ 'wlɛ "ne 'ɔ yu -lɔ -tɔ, "ne 'anyɛɛ 'nɛne 'na 'ylime, 'ɔ yu -la -lɔ -dɛme 'nyakpa sloa-, bebhiɛle "tɛnye ne "me.

²¹ Klise "me 'ye 'a -kɛ -lɔ Lagɔ 'dleku, -ɔ 'goliɔ- 'kwiɛ "me, "ne 'ɔ 'nyɔ- -lɔ 'ŋlumeɛ. 'Ɛnɛɛ za 'a "zo -lɔ 'anyɛɛ 'dlekukɛleɛ "ne 'anyɛɛ 'dletɛleɛ Lagɔ "me.

'A wama- -wamale

²² Gbɛklɛklɛ 'plome -zo za, 'a "zo- 'wlele, -se 'a "kɛ 'a "nowlia -wa -noɔ 'klecɛ 'waa -wɛ 'wamale-. 'A wama- -wamale kpɛnyee 'dle 'na 'dle kɔ.

²³ Lagɔ 'na weli -gwɛlelea 'anye "kusɔ. "Ne "ɛ weli -wɛ "ne -ko sɛgbɛɛ -gloglo yɛ 'ɛ "ku lɛ ne. 'Ɛ yɛ, 'ɛ 'gwlɛ -godogodo 'na dɛ.

²⁴ "Naa-, Lagɔ-bɔgo nɛɛ: «'Nyakpa 'klekle -ko sɛgbɛɛ -piti, "ne 'wanɛɛ "nanoɛ -ko sɛgbɛɛ 'kwlɛ -piti 'na -bhebhe. -Piti yɛ "ku, "ne -bhebhe slu 'siɛ,

²⁵ -mɔ, Anyinɛnyɔ 'na weli 'gwlɛ -godogodo 'na dɛ.» 'Ɛ Weli ne, 'Denaade -ye 'wa -sɛle 'anye -wɛ yɛ -lɔ.