1 Kolɛtenya 9 - Nouveau Testament bété de Gagnoa

Pɔle -sɛ Lagɔ 'na 'Denaade

¹ -Ame 'lelee, 'e "ne bhɔ 'bhɛle- -se 'e "kɛ -ye 'e 'yɔbhɔ -wɛ no? 'E "ne bhɔ Zezu 'na "kɔlepɔnyɔ yɔ? 'E "ne bhɔ Anyinɛnyɔ Zezu 'ylime 'ye-? Lagɔlibhɔ -ye 'e -no -wɛ, 'anye "ne bhɔ "ɛ libhɔ 'ye 'e -no -wɛ 'waa?

² 'Nyakpa 'na -bedia 'na dɛku 'e "mɔ Zezu 'na "kɔlepɔnyɔ yɔ, 'anye, 'a -yi sɛ -gbɔ 'ɔyi 'ye 'e -noɔ -lɔ. "Naa-, "kɔlepɔlibhɔ 'ye 'e -no Anyinɛnyɔ za -wɛ, 'anye -noɔ -lɔ 'wayi 'waa.

³ -Ye 'e -bhulɛle -wa lua -ame gbo ne lɛ:

⁴ Libhɔ -ye 'a -no Anyinɛnyɔ za ne, 'nyɔkpɔ "ne nɛ bhɔ 'bhɛle- -se 'ɔ "kɛ 'anye lilɛ -nyɛ 'ŋu "bhaa "nyɛ?

⁵ -A "ne nɛ bhɔ 'bhɛle- -se -a "kɛ 'anyɛɛ 'klecɛŋwenea -nɛme sɛgbɛɛ Zezu 'na "kɔlepɔnya 'na -bedia, Anyinɛnyɔ 'ɔ "nowlia "ne Sefase!

⁶ Banabase, "ne -ame Pɔle, -ayikɔ cuu "ne -a "kɛ nɛ bhɔ libhɔ -no "ne -a "kɛ nɛ bhɔ -ayi 'slu- 'a?

⁷ E "kɛ "sloja "me -ko, -ee' -sɛ -la 'dlasi "slojalibhɔ -ye 'e -no -wɛ za. -Ɔ 'glo bhɔ su "ne 'ɔ -ka bhɔ "ɛ "bhuɛ li 'a? "Ne 'nyɔkpɔ 'na -ɔ -gɛlele bhɔ -bhilia "ne 'ɔ -ka bhɔ -bhilinyeteŋu 'nɔmɔ 'a?

⁸ 'E kɛ soɔ bhulɛ ne, 'nyakpa 'na nosɛ "me 'ɛyikɔ yɛ bha, "naa-, Lagɔ 'na -Lɔ gbɔ me "ɛ soɔ.

⁹ "Naa-, Moyize 'na -Lɔ -wɛ "me, sɛne 'wa lɛ -lɔ nɛɛ: «-Bhili kɛ lilɛ yo ne, 'wa "ne 'gwa 'ɔnɛɛ nuɛ.» "Ɛ -lɔ -wɛ kɛ soɔ lɛ ne, Lagɔ 'na gbo -ko bhɔ -bhilia "klo 'a?

¹⁰ -Bɛsɛza, -anye 'ye 'ɔ -na bhɔ doɔ 'ga 'a? 'Diɛɛ, "ɛ weli -wɛ -anyɛɛ za 'wa 'kɛle- -lɔ. -Ɔ 'pɔ kofi -wɛ -kɛ 'dleku -gbɔ 'ɔ yi -bɛɛ' "me ylele- zɔ 'pɛ -lɔ. -Ɔ no libhɔ -wɛ kɛ 'dleku -gbɔ 'di dɛku kɛ -ylɛ, 'ɔ yi -bɛɛ' "me ylele-.

¹¹ Lagɔ 'na weli -ye -a -sɛle 'anye -wɛ -ko sɛgbɛɛ Zuzu Wlewle 'na -bɛɛ' "namanɔ 'ye -a -glo 'anye "me, 'a kɛ 'anye 'ɛ -li "namanɔ -wɛ 'na 'cibhɛ "nyɛ -me ne, "nyɛnye yɛ bha?

¹² 'Nyakpa 'na -bedia kɛ libhɔ -ye 'wa -no 'anye 'glɛme -wɛ 'na 'peɛleɛ -yle ne, -anye -cɛ nɛ bhɔ yle me -a? -Mɔ, -anye, -a -sɛ 'ɛnɛɛ lo. 'Ɛ -ko sɔbhɔ "ne -a no 'klekle, -a te nɛ -kɛ Klise 'na 'Denaade 'yliku "titi zɛ.

¹³ 'Nyakpa -wa no "mebɔbɔlebhudu "me libhɔ -wɛ, "ɛ "mebɔbɔlebhudu -wɛ "me 'wanɛɛ lilɛ "kɛ -lɔ 'bhale-. 'Nyakpa -wa -yi Lagɔ bɔbɔ- -ka -wɛ, "ɛ -li -ye 'wa 'nɛme bɔbɔledɛ "me -wɛ, 'wanɛ -ko -me "bhle. 'A "ne bhɔ sɔbhɔ 'sɛ -yi -a?

¹⁴ "Ɛ sɛbhele -wɛ yɛ -me -lɔ, 'nyakpa -wa -sloa Lagɔ 'na 'Denaade -wɛ, "ɛ 'Denaade -wɛ "me 'wanɛɛ lilɛ "kɛ -lɔ 'bhale-. Anyinɛnyɔ -gbɔ -lɔ sɔbhɔ zɛ.

¹⁵ -Mɔ, 'Denaade -ye 'e 'sɛle 'anye -wɛ za, 'e "ne -na no -gbɔ 'wa 'je -ame -bɛɛ' kɔ, 'e "kɛ 'anye -ɛwɛ 'klekle za "ku 'kɛle ne, 'ɛ "ne no -gbɔ 'a -kɛ -ame -bɛɛ' kɔ 'je za yɛ. 'Denaade 'nasɛsɛ "me 'ye 'e ziale -lɔ 'ayi "ku. Zaa, 'kwiɛ 'nɛne "ne 'ɛ 'zi 'e "kɛ 'ayi "ku zia -wɛ "ku "ne 'nyɔkpɔ -kɛ -ame 'ɛyi -wɛ 'wlime -sɛ.

¹⁶ -Ame ɛ kɛ -noɔ, 'Denaade 'nasɛsɛ Lagɔ 'gwale- -lɔ -ame kɔ, 'e -ka 'ɛza 'ayi "ku zia. 'E "mɔ 'Denaade -glɔnya -sɛle, 'kpilɛkpilɛ yle -ame!

¹⁷ 'Mɔɔ kɛ nɛ -kɛ "ɛ libhɔ ne -tɔ, 'e yi nɛ no -gbɔ 'wa 'peɛle -ame. -Mɔ, -bɛɛ' 'na -ye 'e "kɛ no "kle yɛ -lɔ, zaa, 'e 'yi no.

¹⁸ Zaa, 'neɛ 'peɛleɛ 'dɛ -ko? 'Ɛɛ 'pa- -lɔ nɛɛ: 'E 'sloa- "fu Lagɔ 'na 'Denaade -glɔnya. 'E 'sloa- 'Denaade "ne 'na -ye 'e "kɛ nɛ yle -wɛ, 'e "ne no -gbɔ 'wa 'je -ame kɔ "klepaa.

¹⁹ 'Anye 'glɛme, 'e "ne 'nyɔkpɔ 'na 'juyu yɔ. Ɛ -ko sɔbhɔ, -ame 'nabhɛ 'mɔɔ 'ŋunu- -lɔ "ku, -se 'e "kɛ 'anye 'klekle "ku lɔbhɔ, -se 'nyakpa -gbagboa "kɛ Zezu lo 'yli 'neɛ za.

²⁰ Zufonya "bhaa kɛ lɔbhɔ -ko ne, 'e -su 'ayi zufonyɔ 'nasɛ. 'Ɛɛ "kɛ -lɔ gbɔ "ne zufonya "kɛ -lɔ Zezu 'dleku kɛle-. -Wa "zo Moyize 'na -Lɔ 'plome -wɛ "bhaa -a kɛ lɔbhɔ -ko ne, -Lɔ 'ye 'e "zo -lɔ 'plome, "ɛ "kɛ -lɔ gbɔ "ne -wa "zo Moyize 'na -Lɔ 'plome -wɛ "kɛ -lɔ Zezu 'dleku kɛle-. -Mɔ, 'e "ne nɛ -kɛ 'ɛnɛɛ 'plomezosɛ -kɛ.

²¹ -Ɛɛ sɛbhele -wɛ, 'nyakpa 'na -wa" "ne Moyize 'na -Lɔ -yi -wɛ "bhaa kɛ lɔbhɔ -ko ne, 'e -su 'ayi sɛgbɛɛ -ɔ "ne ɛɛ -Lɔ -wɛ -yi. 'Ɛɛ "kɛ -lɔ gbɔ -se -wa "ne "ɛ -Lɔ -yi -wɛ "kɛ -lɔ Zezu 'dleku kɛle-. -Mɔ, 'e -su -kɛ "ɛ Lagɔ 'na -Lɔ, "naa-, 'e "zo Klise 'na -Lɔ 'plome zɛ.

²² 'Klecɛnya 'na -wa" "ne "me 'tɛ- 'dlekukɛleɛ "me -wɛ "bhaa kɛ lɔbhɔ -ko ne, -see 'wa -ko -wɛ sɔbhɔ 'ye 'e -ko -me -lɔ -se 'wa "kɛ Zezu 'dleku kɛle-. -See 'ɛ "mɔ -ko "ne -see 'ɛ kɛ -ko, 'e "kɛ -kɛ 'wa yɛ 'fuɔ zɛ.

²³ 'E no "ɛ -ɛwɛ 'klekle Lagɔ 'na 'Denaade za, -se 'ɛnɛɛ 'ŋupɛɛ 'na 'cibhɛ "kɛ -kɛ -ame "ku yi -me.

'Sokwɛpanya 'na 'ciɛsɛ

²⁴ 'A 'kplɛkplɛle yɔkɔ -se 'ɔ 'to 'wli "ku -wɛ "kɛ -ye 'wa 'piɛ- -wɛ "ku 'libhi. 'A "ne bhɔ sɔbhɔ 'se -yi -a? Zaa, 'a pa- -se 'a "kɛ -ye 'wa 'piɛ- -wɛ "ku 'libhi!

²⁵ 'Sokwɛpanya 'klekle kɛ "ciɛ ne, 'wayi 'wa 'tea -lɔ -li 'na 'gbagbo. 'Wa no -see 'wa 'cɛ -bɛɛ' 'na -ɛɛ 'bhiɛ "ku -wɛ "me ylele- zɛ. -Mɔ, -anye, -ye -a 'cɛ "me ylele -wɛ 'ɛ 'bhiɛ "ku -godogodo.

²⁶ -Ɛwɛza, -ame, 'e kɛ 'pa -dee 'e "kɛ 'ylɛ -wɛ 'neɛ 'yli 'pe -lɔ. -Ame, 'e -ko sɛgbɛɛ -kwligwenyɔ, 'e "ne "pɔ "fu 'neɛ -kulɛ.

²⁷ -Ame Pɔle, 'e -su 'ayi 'dlekutamalesɛ -se 'e 'te 'neɛ 'dle 'na -ye 'ɛ 'yɔbhɔ -wɛ gɛlele-. -Se -ame 'mɔɔ 'sɛle- 'Denaade 'nyakpa -wɛ, Lagɔ te -kɛ -ame 'kwlɛ "me 'pɔ.