1 Kolɛtenya 8 - Nouveau Testament bété de Gagnoa

Nɛmea -ye 'wa -bɔbɔle "fu 'na lagɔ -wɛ

¹ Ɛ kɛ 'Nɛmea -ye 'wa -bɔbɔle "fu 'na lagɔ -wɛ 'na weli yɛ, 'diɛɛ yɛ -lɔ, «-A -yi 'klekle» -se 'a -gbɔ -wɛ. -Mɔ 'ɛ soɔ 'na -li 'na yibhleyibhleleɛ 'nyɛ -lɔ bhabhɛ. -Mɔ, -waleɛ "tamalea -lɔ Lagɔgligbɛ "me 'na konya "me.

² 'Nyɔkpɔ kɛ -no -gbɔ -bɛɛ' 'ye 'ɔ -yi, 'ɔ nyɔ -wɛ 'na yibhleleɛ -namlɛ -tia 'wli 'yiɛ.

³ -Mɔ, 'nyɔkpɔ kɛ Lagɔ -wa, Lagɔ -yu.

⁴ Zaa, 'wa yi bhɔ 'nɛmea -ye 'wa -bɔbɔle "fu 'na lagɔ -wɛ li? 'Bhɔ, "fu 'na lagɔ "ne zikpɛ ne "ku -le, -a 'yi 'sɛ -gbɔ Lagɔ yle -bholo -kpee.

⁵ 'Ɛ -ŋwa sɔbhɔ, "naa-, -bedia nɛɛ: Lagɔ 'wɔ -ko "nɔgɔ "me, "ne dodo ne "ku. 'Diɛɛ yɛ -lɔ, "naa-, 'wanɛɛ dɛku, lagɔ 'wɔ -zu "ne Anyinɛnyɔ 'wɔ -zu.

⁶ -Anye, -anyɛɛ dɛku, Lagɔ yle -bholo -kpee. 'Ɔ -noɔ -lɔ To yɔ. 'Ɔyi -li 'bhale -lɔ "me, 'Ɔnɛɛ za -a -yɛ -lɔ. "Ne Anyinɛnyɔ yle -bholo, 'ɔ -noɔ -lɔ Zezu Kli yɔ. 'Ɔyi "me 'ye -li -le -lɔ. "Ne 'ɔyi "me 'ye -a -yɛ -lɔ.

⁷ -Mɔ, 'nyakpa 'klekle "ne 'ɛ gbɛklɛklɛ ne -yi! -Dee -a -ko -na -dɛme ne, 'wa li -na zɛ bɔbɔbɔbɔ 'nɛmea, sɛgbɛɛ "fu 'na lagɔ 'wa bɔbɔle- 'diɛɛ. 'Wanɛɛ 'dlepɔsɛ "ne "me 'tɛ-, 'ɛza, 'wa -tɔle -gbɔ "ɛ lilɛ -wɛ -gbɔ "ne 'wanɛɛ 'dle "ne 'wlewle -ko Lagɔ 'yliku.

⁸ "Ne lilɛ -na -kɛ -anye Lagɔ yɔko "nyia. -A "mɛ -li ne, 'a -na -bɛɛ' bhlia-, -a 'cɛ 'lelee -li ne, -a -ka "bhle -bɛɛ' ylele-.

⁹ 'A yele- kɔ -se 'a "kɛ 'ye 'a 'yɔbhɔ -wɛ no. -Mɔ, 'a 'luɔ- -kɛ, "ɛ 'kɔyeleɛ -wɛ te kɛ 'klecɛnya -wa "ne "me 'tɛ- 'dlekukɛleɛ "me -wɛ 'nyinyonoli "me bhlialea-!

¹⁰ Zaa, -eyi -mɔ -yi gbɛklɛklɛ -wɛ, 'wa "kɛ -eyi "fu 'na lagɔ 'na "me bɔbɔle-bhudu "me 'na lilɛlidɛ "me 'ylime yele- ne, -ɛ "kɛ bhɔ lɔbhɔ ylɛ- 'a? -E yi gbɔ "ne 'nyɔkpɔ -nyɔ 'na 'dlekukɛleɛ "ne "me 'tɛ- -wɛ yi "ɛ "fu 'na lagɔ 'na bɔbɔle 'nɛme -wɛ li -me.

¹¹ "Ɛ -see -e -yi gbɛklɛklɛ -wɛ za, 'klecɛnyɔ, -ɔ "ne "me 'tɛ- -wɛ yi zɔ bhli-, 'ɔyi, -nyɔ 'na 'ylime Klise "ku- -wɛ!

¹² 'A "kɛ "ɛ soɔ 'na 'nyinyonoli 'a "nowlia -nyɛ 'a "nɔyoa 'wɔ "bhaa 'yliku -nole "ne 'a "koa soɔ 'wlime -nyimɔ ne, Klise 'ye 'a -no -lɔ 'nyinyonoli 'wli.

¹³ 'Ɛza, 'e kɛ 'sɛ -yi -gbɔ "ɛ lilɛ -wɛ yi -ame "nowlia -nyɛ -ame "nɔyoa 'wɔ "bhaa 'siɛ 'bhle ne, 'e -ka nɛ 'ɛ nɛmɛ -wɛ li, -se 'e 'toa kɛ 'siɛ 'bhle.