1 Kolɛtenya 7 - Nouveau Testament bété de Gagnoa

Pɔle -sɛ 'suɛ 'plɛ weli keyi

¹ -Dɛmeda, 'anyɛɛ "bɔgo -ye 'a kɛle- -ame "ku -wɛ 'ye 'e sɛ lɛ keyi. 'Nyɔkpɔ "mɔ 'ŋɔnɔ -kɛ ne, -bɛɛ' 'na -bɛɛ' yɛ -lɔ.

² 'Za, 'a kɛ -no -gbɔ 'a "kɛ 'ayi 'tutuliɛ "guɔ 'ylilea- ne, 'widi 'kwɔ 'ŋɔnɔ -se 'ŋɔnɔ 'kwɔ 'widi.

³ 'Widi te -kɛ 'ɔnɛɛ 'ŋɔnɔ 'na 'wli yɔkokplaleɛ- 'na lo -sɛ, -se 'ŋɔnɔ te -kɛ 'lelee 'ɔnɛɛ 'widi 'na 'wli yɔkokplaleɛ- 'na lo -sɛ.

⁴ 'Ŋɔnɔ "ne 'bhɛle- "ne 'ɔ "kɛ 'ɔnɛɛ ku -see 'ɔ 'yɔbhɔ -wɛ 'slu-. 'Ɔ "luwli 'bhe- -lɔ zɛ. "Ne 'widi "ne 'bhɛle- "ne 'ɔ "kɛ 'ɔnɛɛ ku -see 'ɔ 'yɔbhɔ -wɛ 'slu-, 'ɔ 'nɔŋɔɔ 'bhe- -lɔ zɛ.

⁵ 'A te 'wli yɔkokplaleɛ 'na lo -sɛ. 'Anye "sɔkpɔsɔkpɔ, 'a "mɔ "ku "me 'nonole- -gbɔ 'a "kɛ Lagɔ 'bhubhɔ 'tekeyi ne. 'Ɛyi -wɛ "kɛ 'ple- "bhuɔ ne, 'a yi -la 'wli yɔkokplalea-. "Ɛ "mɔ sɔbhɔ yɛ, "ne 'a "mɔ -kɛ "bhle 'dle -piɛ 'bhɛle- ne, Sata yi -kɛ 'anye "me 'bea-.

⁶ -Ye 'e bhulɛ ne, 'e -na -kɛ no -gbɔ 'a no "klepaa, -mɔ, -ɛ "kɛ -noɔ -me -wɛ, 'ɛyi 'ye 'e bhulɛle me -kɛ -lɔ 'anye.

⁷ 'E 'yɔbhɔ nɛ -gbɔ 'nyakpa 'klekle ko 'neɛ sɛne, -mɔ, Lagɔ 'nyɛ -ɔkɔkokɔko 'na -jɔlo -ɛ -ŋwɔ "ku -tia -wɛ, 'ɛza, -ɔwɛ -kɛ 'ɔnɛɛ nosɛ, "ne -ɔwɛ -kɛ 'lelee 'ɔnɛɛ nosɛ.

⁸ -Mɔ, 'ɛ -ko sɔbhɔ, "ne 'e no -lɔ nɛɛ: 'Ŋwenea -nyɛ 'widia -wa "ne 'suɛ -plɛ -nyɛ "kwiziŋwenea "bhaa kɛ 'neɛ sɛne -ko, -bɛɛ' 'na -ɛ 'nɛne 'wanɛɛ dɛku yɛ -lɔ.

⁹ 'Widi -nyɛ 'ŋɔnɔ "bhaa 'wa "mɔ 'bhɛle- 'wa "kɛ soɔ ko ne, 'ŋukwɛ -nyɛ 'widikwɛ "bhaa 'nɛne "ne 'ɛ -zi 'widito "ne 'ŋuto "kɛ -eyi lɔbhɔ -wɛ "ku.

¹⁰ -Wa -kɛ 'ŋwenea, "ne -wa -kɛ 'widia -wɛ, -ye 'e no -gbɔ 'wa no ne lɛ, 'ɛ "ne -kɛ -ame yɔ, -mɔ, Anyinɛnyɔ yɔ "kɛ -lɔ: 'Widi te -kɛ 'ɔnɛɛ 'ŋɔnɔ 'kpeti-, -se 'ŋɔnɔ te -kɛ 'ɔnɛɛ 'widi yɔko 'bha-.

¹¹ 'Ŋɔnɔ "kɛ nɛ 'ɔnɛɛ 'widi yɔko 'bha- ne, 'ɔ ko soɔ, 'ɔ mɛ 'bhɛle- ne, 'widi "bhaa 'wa 'wale-. "Ne, 'widi te -kɛ 'ɔnɛɛ 'ŋɔnɔ 'kpeti-.

¹² 'Ɛ kɛ 'nyakpa 'na -wawɛ 'waa, -ye 'e bhulɛ ne lɛ, Anyinɛnyɔ "ne -kɛ 'ɛyi ne -bhulɛ: -Mɔ -ame 'mɔɔ -bhulɛ -kɛ lɛ. 'Klecɛnyɔ kɛ 'ŋɔnɔ 'na -ɔ "ne 'klecɛ yɔ -wɛ -kwɔ, "ne "ɛ 'ŋɔnɔ -wɛ kɛ -no -gbɔ 'wa yi "ku 'glile- 'yiɛ ne, 'ɔ 'to 'kpeti-.

¹³ "Ne 'klecɛŋɔnɔ kɛ 'widi 'na -ɔ "ne 'klecɛ yɔ -wɛ -kwɔ, "ne 'ɔ kɛ -no -gbɔ 'wa yi "ku 'glile- 'yiɛ ne, 'ɔ 'to yɔko 'bha-.

¹⁴ "Naa-, 'ɛ 'widi -ɔ "ne 'klecɛ yɔ -wɛ "ne Lagɔ 'dɛ 'tlole-, sɛko -wɛ, 'ɔ -nyɛ 'ɔnɛɛ 'ŋɔnɔ "bhaa 'wa kole- "ku zɛ. 'Ŋɔnɔ -ɔ "ne 'klecɛ yɔ -wɛ, "ne Lagɔ 'dɛ 'tlole-, sɛko -wɛ, 'ɔ -nyɛ 'ɔ "luwli "bhaa 'wa kole- "ku zɛ. 'Ɛ "mɔ sɔbhɔ yɛ ne, 'anyɛɛ yua yi ko sɛgbɛɛ yua 'na -wa 'ylile- Lagɔ "guɔ, -mɔ, 'diɛɛ, 'wa "ne Lagɔ 'dɛ 'tlole-.

¹⁵ 'Ɛ -ko sɔbhɔ, "ne -ɔ "ne 'klecɛnyɔ yɔ -wɛ kɛ -no -gbɔ 'ɔ "kɛ me, 'ɔ 'bhɛle- -se 'ɔ "kɛ me. Lɔbhɔ 'na dɛku, -ɔ -noɔ 'klecɛnyɔ yɔ -wɛ, 'widi "ne 'ŋɔnɔ 'ye 'ɛ kɛ 'se -noɔ -ce, 'wa "ne -la "me -kokole, "naa-, Lagɔ la- -anye -se -a "kɛ "kuwɛtɛ "me ko.

¹⁶ -Eyi -mɔɔ -noɔ 'klecɛŋɔnɔ yɔ -wɛ, -e "ne bhɔ 'sɛ -yi -gbɔ -e yi -e "luwli 'fuɔ? "Ne -eyi -mɔɔ -noɔ 'klecɛnyɔ yɔ -wɛ, -e "ne bhɔ 'sɛ -yi -gbɔ -e yi -e "nɔŋɔ 'fuɔ?

Kosɛ -ɛ 'nɛne Lagɔ -gɛ -wɛ

¹⁷ -Sɔɔdɛku Lagɔ la- -anye -wɛ, -see Anyinɛnyɔ no -gbɔ 'a ko -wɛ 'a ko sɔbhɔ. 'Ɛyi 'ye 'e 'sloa -lɔ Lagɔ-bhudu 'klekle "me me 'e -ylɛle -wɛ.

¹⁸ -Sɔɔdɛku Lagɔ la- -eyi -wɛ, -e diɔ- nɛ bhɔ "ku -a? -E kɛ "ku diɔ- ne, ko "ɛ soɔ! -E "ne nɛ -kɛ "ku diɔ-? Te -ka -la -eyi "ku di!

¹⁹ -E kɛ "ku diɔ-, 'ɛ "ne -bɛɛ' "me -ko. "Ne -e "mɔ "ku diɔ-, 'ɛ "ne 'lelee -bɛɛ' "me -ko. -Ɛ 'kpɔ -noɔ -lɔ -ye Lagɔ no -gbɔ 'wa no -wɛ yɛ.

²⁰ -Ɔkɔkokɔko 'na -see 'ɔ -ko "ne Lagɔ yu la -wɛ 'ɔ ko sɔbhɔ.

²¹ -Sɔɔdɛku Lagɔ la- -eyi -wɛ, 'juyu 'ye -e -noɔ nɛ bha? 'Dlebhɛɛ te 'se -eyi 'ɛnɛɛ za 'lɔbhɔ! -Mɔ, -e kɛ -no -gbɔ -e yi 'galu 'yli 'bha- ne, 'bhɛ 'yli-!

²² "Naa-, 'juyu -ye Anyinɛnyɔ la- -wɛ 'bha- 'galu 'yli, Anyinɛnyɔ -nɔ yɔ -lɔ. 'Nyɔkpɔ, -ɔ 'bha- 'galu 'yli "ne Lagɔ la- -wɛ "zo -lɔ Klise 'na 'juyu.

²³ Lagɔ 'jetile- 'anye -bɛɛ' "yitɛ nu "ne 'ɔ yi -lɔ 'anye 'galu 'yli -sɛ, zaa, 'a te -la 'nyakpa 'na 'juyua "zo.

²⁴ -Nyɔsɔwanye, -ɔkɔkokɔko ko -kɛ -see 'ɔ -ko nɛ Lagɔ 'yliku "ne 'ɔ yu la -wɛ.

-Wa "ne sue -plɛ 'na "kukoweli

²⁵ -Wa "ne 'suɛ -plɛ -wɛ 'na dɛku, Anyinɛnyɔ "ne -ame -ye 'wa kɛ no -wɛ bhulɛle-. -Mɔ, 'neɛ 'dlepɔsɛ ne lɛ: 'Nyɔkpɔ -ye 'wa "kɛ 'dleku kɛle- 'na 'dlepɔsɛ yɛ -lɔ, "naa-, Anyinɛnyɔ komale- 'neɛ za 'nɛne.

²⁶ "Ɛ -see 'e 'pɔ dle -wɛ ne lɛ: -Dɛme 'na "kplɛkplɛɛ -wɛ 'wɔ za, 'nyɔkpɔ "mɔ 'sue -plɛ 'ɛ 'nɛne. -Ɔkɔkokɔko kɛ 'ɔnɛɛ -see 'ɔ -ko -wɛ -ko, 'ɛ 'nɛne.

²⁷ -E -kɛ bhɔ 'ŋɔnɔ -a? Te -kɛ no -gbɔ -e "kɔ 'kpeti-. -E "ne 'ŋɔnɔ -kɛ, te -kɛ no -gbɔ -e "kɛ 'ŋɔnɔ 'kwɔ.

²⁸ 'Ɛ -ko sɔbhɔ, "ne 'e kɛ sue -plɛ, 'nyinyonoli 'ye -e "ne -no, "ne 'ŋuyu -ɔ "ne 'widi -kɛ -wɛ kɛ sue -plɛ, 'nyinyonoli 'ye 'ɔ "ne -no. -Mɔ, 'nyakpa -wa -plɛ sue -wɛ yi 'ce 'gbape 'wanɛɛ zikpɛ "me -godogodo, "ne -ame 'e "ne 'yɔbhɔ -gbɔ -ɛwɛ 'wɔ yle 'anye.

²⁹ Zaa, -nyɔsɔwanye, 'e bhulɛle 'anye -gbɔ, lɔbhɔ "ne -la "me tlo, -dɛme 'na dɛne "ku, -wa -kɛ 'ŋwenea -wɛ 'ko sɛgbɛɛ -wa "ne 'ŋwenea -kɛ ne.

³⁰ -Wa 'tu -wɛ 'ko sɛgbɛɛ 'tu 'wa -na 'tu. -Ye 'ŋwɛnɛ lɔbhɔ -wɛ 'ko sɛgbɛɛ 'ŋwɛnɛ -noa 'lɔbhɔ. -Wa 'pea -wɛ 'ko sɛgbɛɛ 'wa "ne -bɛɛ' -kɛ.

³¹ -Wa -kɛ zikpɛ ne "ku 'na -li "ne 'ŋwɛnɛ 'lɔbhoa -wɛ no sɛgbɛɛ -wa "ne -bɛɛ' -kɛ, "naa-, -zeka 'na zikpɛ ne yi 'ple.

³² 'E "ne 'yɔbhɔ nɛ -gbɔ 'dlebhɛ 'lɔbhɔ 'anye. -Ɔ "mɔ sue -plɛ ne, Anyinɛnyɔ 'na libhɔ 'na 'dlebhɛ lɔbhɔ -lɔ. "Ne 'ɔ 'tɛle -lɔ -see 'ɔ "kɛ Anyinɛnyɔ -gɛ namale- -wɛ 'siɛ.

³³ -Mɔ, -ɔ -plɛ sue -wɛ, zikpɛ ne "ku 'na -li 'ye 'ɔ 'wolo -lɔ "klo, "ne 'ɔ 'tɛle -lɔ -see 'ɔ "kɛ "zo "ne 'ɔ "kɛ 'ɔ "nɔŋɔ -gɛ namale- -wɛ 'siɛ.

³⁴ 'Ɛza, 'ɔ ko mɛ "ne 'ɔ ko mɛ, 'ŋuyu 'na -ɔ "ne sue -plɛ -wɛ Anyinɛnyɔ 'na libhɔ 'na 'dlebhɛ lɔbhɔ -lɔ -se 'ɔnɛɛ ku -nyɛ 'ɔnɛɛ 'wugɔŋo "bhaa "kɛ -kɛ 'wlewle ko Anyinɛnyɔ "me. -Mɔ, 'ŋɔnɔ 'na -ɔ -plɛ sue -wɛ, zikpɛ ne "ku 'na -li 'ye 'ɔ 'wolo -lɔ "klo, "ne 'ɔ 'tɛle -lɔ -see 'ɔ "kɛ "zo, "ne 'ɔ "kɛ 'ɔ "luwli -gɛ 'namale- -wɛ 'siɛ.

³⁵ 'Anyɛɛ 'nɛne za 'e bhulɛ -lɔ "ɛ soɔ, -mɔ, "ɛ "ne -kɛ no -gbɔ 'e "kɛ 'anye weli 'na -gbotu 'cile- za yɛ, "naa-, 'e 'yɔbhɔ -gbɔ 'a 'tɔ- -ɛ 'nɛne -wɛ, -se 'a 'glɛ Anyinɛnyɔ 'ɔyikɔ 'glɛ.

-Wa li 'bheyi "ne -wa -sɛ suɛplɛlo -wɛ 'na "kukoweli

³⁶ 'Teyigbɔ "kɛ 'dle 'pɔ -gbɔ 'ɔ "mɔ 'ɔnɛɛ 'bheyi -kwɔ ne, "nyɛnye 'ye 'ɔ no -lɔ 'ɔnɛɛ 'bheyi -wɛ 'wli, 'wli yɔkokplaleɛ kɔ 'dlezɔ -ko ne, 'ɔ 'kwɔ -see 'ɔ 'yɔbhɔ -wɛ, 'ɛ dɛ -wɛ "ku ne, "nyɛnye 'ye 'ɔ ne -no.

³⁷ -Mɔ, 'ɔ yi 'dlezɔ bhulɛle- -gbɔ 'ɔ -ka sue plɛ, "ne 'ɔyi "bhaa 'wa -ka 'wli yɔkokplalea-. "Ne 'ɔ kɛ 'diɛɛ soɔ 'na weli 'dlezɔ -bhulɛle, "ne 'wa "mɔ -kɛ 'wlime -cicia, "ne 'ɔ kɛ 'ɔnɛɛ -ye 'ɔ 'yɔbhɔ -wɛ "ku "nɔŋo- ne, "ne 'ɔ "mɔ sue -plɛ, 'ɛ 'nɛne.

³⁸ 'Ɛ kɛ soɔ -ylɛle, 'ɔnɛɛ 'bheyi "bhaa 'wa kɛ sue -plɛ, 'ɛ 'nɛne. 'Ɔnɛɛ 'bheyi "bhaa 'wa "mɔ 'lelee sue -plɛ ne, 'ɛ 'nɛne "ne 'ɛ -zi "ku.

'Kwiziŋwenea 'na weli

³⁹ 'Ŋɔnɔ 'ɔ "luwli 'ye 'ɔ -glɛ -lɔ 'glɛ -sɔɔdɛku 'ɔ -yɛ -wɛ. 'Ɔ "luwli kɛ "ku-, 'ɔ yele- kɔ -se 'ɔ "kɛ 'nyɔkpɔ 'na -ye 'ɔ 'yɔbhɔ -wɛ 'kwɔ, -mɔ, "ɛ 'nyɔkpɔ -wɛ "zo -kɛ 'klecɛnyɔ.

⁴⁰ 'Ɛ kɛ soɔ -ko, 'neɛ dɛku, 'ŋwɛnɛ yu lɔbhɔ "ne 'ɛ yi "ku zi, -ɔ kɛ -see 'ɔ -ko -wɛ -ko, -Ame 'lelee, 'e 'pɔ 'dle -gbɔ Lagɔ zuzu -no -lɔ -gbɔ 'e lɛ sɔbhɔ!