1 Kolɛtenya 6 - Nouveau Testament bété de Gagnoa

Klecɛnya 'glɛme 'na 'gbobhleleɛ

¹ 'Gbo "kɛ 'anye 'glɛme -ko ne, sɔɔbɛɛza, 'a 'je bhɔ gbobhlenya 'na -wa "ne Lagɔ -yi -wɛ kɔ? 'A 'yi nɛ 'se 'nyakpa 'na -wa -noɔ Lagɔ -noa 'waa -wɛ kɔ 'je ne, sɔɔbɛɛza 'a "zo bhɔ "ɛ soɔ?

² 'A "ne bhɔ 'sɛ -yi -gbɔ 'anye -wa -noɔ Lagɔ -noa 'waa -wɛ, 'anye "kɛ dodo ne "ku 'na 'nyakpa 'gbobhlele? "Ne 'anye kɛ dodo ne "ku 'na 'nyakpa 'gbobhlele ne, 'a "ne bhɔ 'bhɛle- -se 'a "kɛ gbo -jejeyuɛ -wɛ 'wɔ 'bhle 'a?

³ 'A "ne bhɔ 'sɛ -yi -gbɔ -anye "kɛ "nɔgɔzilia 'wɔ 'gbobhlele? Zaa, -a yi 'se zikpɛ ne "ku 'na gbo 'bhle 'tee ne!

⁴ 'Anye, 'a kɛ soɔ 'na weli -kɛ ne, gbobhlenya 'na -ye Lagɔgligbɛ "ne -yi -wɛ 'ye 'a 'libhi -lɔ "ku!

⁵ -Ye 'e bhulɛ ne "ne bhɔ 'anye 'zu "ku -le? 'Nyɔkpɔ 'na -ɔ -yɛ 'ylime -wɛ "ne bhɔ 'anye 'glɛme ko -se 'ɔ "kɛ 'klecɛnyɔ -nyɛ 'ɔluyu "bhaa 'na gbo 'bhle?

⁶ -Mɔ, 'klecɛnyɔ 'nabhɛ -nyɛ 'ɔluyu "bhaa gbo "koa 'glɛme -ko, "ne 'wa me -lɔ gbobhlenya -wa "ne Klise -yi -wɛ 'yliku!

⁷ 'Gbo "kɛ 'anye 'klecɛnya 'glɛme -ko ne, 'a "ne Lagɔ 'na -gwe "ku 'nɔŋo! Sɔɔbɛɛza 'a "ne 'yɔbhɔ bhɔ -gbɔ 'wa 'gbapea 'anye 'a? Sɛko bhɔ "ne 'a "ne 'tale- bhɔ 'nyakpa 'yi -se 'wa "kɛ 'anye 'wlu 'di 'a?

⁸ -Mɔ, 'anye no -lɔ -li -ɛ "ne "me 'ŋwinɛle- -wɛ, "ne 'a 'yli -lɔ 'alua 'wi! "Ne "ɛ 'wayi -wɛ, 'a "nowlia, "ne 'a "nɔyoa 'klecɛnya 'waa nɛ -kɛ -lɔ "fu!

⁹ 'Nyakpa -wa no "nyɛnye -wɛ -ka 'ce 'glidɛ yle Lagɔ 'na 'kamale zikpɛ "me. 'A "ne bhɔ sɔbhɔ za 'sɛ -yi 'a? 'A 'no -kɛ welicibhɛ ne "me 'tee: 'Nyakpa 'na -wa -nyɛ 'kpeteklinya "bhaa 'wa go -wɛ, 'nyakpa 'na -wa "zo "fu 'na Lagɔ -wɛ, 'nyakpa 'na -wa zlɛ gbo, "ne 'nyakpa -wa -nyɛ 'walua "bhaa 'wa go -wɛ,

¹⁰ 'winya, -wa 'tɛ- -wɛ, nogbinɔmɔnya, -wa 'yli 'walua, 'kpokponya, sɔbhɔ -nɛɛ' 'nya -wɛ 'na 'glidɛ "ne 'ce Lagɔ 'na 'Kamalezikpɛ "me -ko!

¹¹ Soɔ 'anye 'glɛme 'na -bedia -ko 'awɔ -lɔ bhlɛme. -Mɔ, Lagɔ -sɛ 'anye 'nyinyonoli "me, "ne 'a yi -lɔ 'wlele plɛ, "ne 'ɔ yi -lɔ 'anye "me ŋwinɛlenya "zoa- Anyinɛnyɔ Zezu Kli "ne Zuzu Wlewle 'na 'tɔ "me.

'Klecɛnyɔ 'na ku -noɔ -lɔ Zuzu Wlewle 'na -bhudu "yitɛ yɛ

¹² -Bedia nɛɛ: «'E yi -li 'klekle no.» Diɛ, -mɔ, -ame nɛɛ: -Li 'klekle "ne "kɛ 'anyɛɛ za 'nɛne. 'E yi 'lelee no nɛɛ: «'E yi -li 'klekle no. Diɛ, -mɔ, -ame, 'e "ne 'yɔbhɔ -gbɔ 'e "kɛ -bɛɛ' 'na 'juyu "zo.»

¹³ "Ne 'a no 'lelee -lɔ nɛɛ: «Lilɛ, 'go -nɛ yɛ -lɔ, "ne 'go -noɔ -lɔ lilɛ -nɛ yɛ.» 'Ɛyi -wɛ, 'diɛɛ yɛ -lɔ. -Mɔ, Lagɔ yi 'go -nyɛ lilɛ "bhaa "ku bhia-. 'Nyɔkpɔ 'na ku "ne lɔbhɔ ko 'tutu li za. Ku -le Anyinɛnyɔ za. "Ne Anyinɛnyɔ -le ku za.

¹⁴ Lagɔ 'golia- Anyinɛnyɔ -glukonya 'glɛme, -anye 'lelee, 'ɔ yi 'ce -anye -glukonya 'glɛme 'golia- -me 'ɔnɛɛ 'bhɛloɛ "me.

¹⁵ 'Anyɛɛ ku, Klise 'na ku 'na 'cibhɛ yɛ -me -lɔ. 'A "ne bhɔ sɔbhɔ za 'sɛ -yi 'a? Zaa, 'e yi bhɔ 'lelee Klise 'na ku 'na 'cibhɛ "ku 'libhi "ne 'e yi bhɔ 'tutu li -ku "zoa? 'Bhɔ -kɛ!

¹⁶ 'Nyɔkpɔ 'na -ɔ -nyɛ 'tutuŋɔnɔ "bhaa 'wa -kole "ku -wɛ, 'ɔ nyɔ "bhaa -bholo 'wa "zo -lɔ. 'A "ne bhɔ sɔbhɔ za 'sɛ -yi 'a? "Naa-, sɛne Lagɔbɔgo gbɔ -lɔ nɛɛ: «"Ɛ 'nyakpa "sɔ -wɛ, -bholo 'wa "zo -da -lɔ.»

¹⁷ -Mɔ, 'nyɔkpɔ 'na nyɔ 'na 'dle -glɛ Anyinɛnyɔ 'glɛ -wɛ, 'ɔ -nyɛ Anyinɛnyɔ "bhaa -ko sɛgbɛɛ 'nyɔkpɔ -bholo.

¹⁸ 'A 'ylilea- 'anyɛɛ ku 'tutuliɛ "guɔ. 'Nyinyonoli 'na -vinɛ -wɛ 'klekle -ye 'nyakpa 'bhɛle- 'wa "kɛ no -wɛ, 'wanɛɛ ku "me 'ye 'ɛ -na -noɔ leɔ-. -Mɔ, -eyi -mɔɔ -su -neɛ' ku 'tutuliɛ "me -wɛ, -bɛɛ' 'na "nyɛnye 'ye -e no -lɔ doɔ -neɛ' ku 'wli. "Naa-, -neɛ' ku "me 'ye 'ɛ no leɔ -lɔ.

¹⁹ 'A -yi sɛ -gbɔ 'anyɛɛ ku Zuzu Wlewle 'na -bhudu "yitɛ yɛ -lɔ, 'ɛ Zuzu Wlewle -wɛ -ko 'anye "me. "Ne Lagɔ 'jo- -lɔ 'anye kɔ. 'Anye "ne 'ayigɛsɛ 'ayi 'bhe-.

²⁰ Lagɔ -jeti 'anye "yitɛ "ku -se 'ɔ "kɛ 'anye gbo 'wlime -sɛ. Zaa, 'a 'kwɔ- 'ŋlu 'anyɛɛ nonoli "me.