1 Kolɛtenya 5 - Nouveau Testament bété de Gagnoa

'Nyinyonoli -ɛ -ko Kolɛte 'na 'klecɛnya 'glɛme -wɛ

¹ -Nyɔsɔwanye, -a 'no- moɔ 'klekle "me -gbɔ 'anyɛɛ moɔ, -bedia -su 'wanɛɛ zikpɛ 'kpɛtɛkli, "ne -see 'wa -su 'wanɛɛ zikpɛ "ku -wɛ -noɔ "nyɛnye yɛ, soɔ -noa, 'wa -koa -kɛ -wa "ne "zo Lagɔ -wɛ 'na zoku ylele- gou. -A 'no -me -kɛ "me -gbɔ 'anye 'glɛme 'na -bholo -sɛ 'ɔ 'to 'ŋɔnɔ kɔ.

² "Ne 'anye 'a zia 'ayi "ku, -mɔ, "klo 'ye 'a "kɛ nɛ -lɔ 'nyɛne -tia, "ne 'a "kɛ nɛ -lɔ 'ɛ soɔ 'na 'nyɔkpɔ -ɔ -su 'ɔnɛɛ zikpɛ 'ɛ soɔ "ku -wɛ, 'anyɛɛ -zakpɛ "me 'kpeti-.

³ -Ame, Pɔle, 'e 'tlole 'anye 'dɛ, -mɔ, 'neɛ 'wugɔŋo -ko 'anye yɔko. -Tia, 'nyɔkpɔ -ɔ -no -ɛwɛ -wɛ, 'e -bhlolo gbo "bhuɔ, sɛgbɛɛ 'e -ko me nɛ 'anye 'glɛme.

⁴ 'A "zo 'wli Anyinɛnyɔ Zezu 'na 'tɔ "me. 'E yi 'anyɛɛ 'didi "me ko 'dlepɛɛ "me "ne Anyinɛnyɔ Zezu 'na 'bhɛloɛ yi 'ylime 'yeɔ-.

⁵ 'A 'plele- 'ɛ soɔ 'na 'nyɔkpɔ -wɛ Sata kɔ. -Se 'ɔnɛɛ 'nyinyonoli no -ku -wɛ "kɛ "kubhiɛ, -se Anyinɛnyɔ 'na yizle, 'ɔnɛɛ 'wugɔŋo kɛ 'ce "po.

⁶ 'A "ne nɛ 'bhɛle- "ne 'a "kɛ nɛ 'ayi "ku 'kpɔmalea-. 'A "ne bhɔ 'sɛ -yi -gbɔ manyɔ 'tekeyi 'yolia 'tatagonyi "ne 'ɛ 'flu?

⁷ Sɔbhɔ za, 'a -sɛ 'ayi 'nyinyonoli 'glɛme, 'ɛ -ko sɛgbɛɛ manyɔ -gɔgɔ. 'A kɛ sɔbhɔ "zo, 'a yi 'wlele ko. 'A yi ko sɛgbɛɛ 'tatagonyi -lele -ɛ "ne lɛ manyɔ "me -ko, -see 'a -ko nɛ "kle -wɛ. "Naa-, Klise -ye 'wa -kole klowa "klo -wɛ "zo -lɔ -anyɛɛ Paake 'na Zɛbhlɛbhlɛyu.

⁸ Zaa, 'a -ya 'gwlɛle- 'se Paake "ɛ -nyɛ "fɔlɔ -ɛ "ne manyɔ "me -ko -wɛ, 'dle 'wlele kɔ. -Mɔ, -a te -kɛ "fɔlɔ -ye 'wa "zo- manyɔ -gɔgɔ "me -wɛ li. "Nyɛnye 'na manyɔ "ne nonoli 'gbeyi 'na manyɔ yɛ -lɔ.

⁹ 'E 'pɔ- 'awɔ 'anye "bɔgo "ku, "ɛ "bɔgo -wɛ "me, sɛne 'ye la 'awɔ -lɔ nɛɛ: «'Gbozlɛnya "bhaa, 'a te "ku kole-.»

¹⁰ 'E "ne 'yɔbhɔ nɛ -gbɔ 'e "kɛ dodo ne "ku 'na 'gbozlɛnya 'na "kukoweli bhulɛ. 'E -na kɛ 'winya 'na "kukoweli bhulɛ, "ne -wa "ne 'ŋunu -bɛɛ' 'ple gbo, "ne -wa bɔbɔ "fu 'na lagɔ -wɛ 'na "kukoweli 'ye 'e -na -kɛ bhulɛ. 'Ɛ -kɛ nɛ -kɛ sɔbhɔ yɛ ne, 'a yi nɛ "ɛ zikpɛ ne "ku 'bha-.

¹¹ 'E kɛle- nɛ 'anye "ku -gbɔ: «'Klecɛnyɔ -ɔ -noɔ 'gbozlɛnyɔ yɔ -wɛ "bhaa 'a te "ku kole.» 'E -bhulɛ nɛ 'klecɛnyɔ 'na -ɔ -noɔ 'winyɔ yɔ, "ne -ɔ bɔbɔ "fu 'na lagɔ, "ne -ɔ 'yli 'ɔlua, nogbinɔmɔnyɔ, "ne 'ɔ 'tɛ- -wɛ. Sɔbhɔ 'na nyɔ -wɛ "bhaa 'a te 'gɔme lile- gou!

¹² -Ame, 'mɔɔ "kɛ bhɔ -wa "ne 'klecɛnya 'waa -wɛ 'gbobhlele-? 'Wayi -wɛ Lagɔ "koa -lɔ 'gbobhlele. -Mɔ, 'Anye, 'anyɛɛ Lagɔgligbɛ "me -noa 'ye 'a "kɛ -lɔ 'gbobhlele.

¹³ -Mɔ, -wa "ne Lagɔ -noa 'waa -wɛ, Lagɔ "koa -lɔ 'gbobhlele. "Naa-, Lagɔbɔgo nɛɛ: «'A 'kpeti- 'nyɔkpɔ -nyɛnye 'anyɛɛ -zakpɛ "me.»