1 Kolɛtenya 4 - Nouveau Testament bété de Gagnoa

Klise 'na "kɔlepɔnya 'na libhɔ

¹ 'Wa 'wolo- -anye "ku sɛgbɛɛ Klise 'na "kulɔbhɔnya. -Anyɛɛ libhɔ -noɔ -lɔ -gbɔ -a -sɛ Lagɔ 'na 'gbɛklɛklɛweli -ɛ zizɔ- "ku -wɛ 'na 'de.

² -Ye 'wa 'yɔbhɔle -tia "ɛ libhɔ -wɛ 'na 'yukugɛlenya "me lo -noɔ -lɔ 'dletɛleɛ yɛ.

³ -Ame, 'a 'bhlele -ame gbo 'oo, 'nyakpa 'bhlele -ame gbo 'oo, 'neɛ gbo "ne "bhle -ko, "naa-, 'e "ne -kɛ 'ayi 'nabhɛ 'gbobhlele- zɛ.

⁴ 'E "ne 'pɔ 'dle -gbɔ 'e "ne 'nuɔsɔbhɔledɛ -kɛ, -mɔ, sɛne 'ye 'ɛ -na -kɛ zɔ -sɛ -gbɔ 'e "ne -bɛɛ' -no, -mɔ, 'neɛ 'gbobhlelenyɔ, Anyinɛnyɔ yɔ -lɔ.

⁵ Anyinɛnyɔ -namlɛ yi, zaa 'a te -mlɛ 'se 'nyɔkpɔ 'gbobhlele. -Mɔ, 'ɔ kɛ -yi ne, 'ɔɔ "kɛ -lɔ -ɛ zizɔ- titiɛ "me -wɛ "ku 'lea-, "ne 'ɔɔ "kɛ -lɔ 'dlepɔsɛ zle "ku 'lea-, lɔbhɔ 'na dɛku, Lagɔ yi -ɔkɔkokɔko 'ŋlu 'kwa- -se 'ɔ 'yɔbhɔ -wɛ.

⁶ -Nyɔsɔwanye, 'anyɛɛ za, 'e libhi- -lɔ Apolɔse, "ne -ayi 'nabhɛ "ku -se -a "kɛ 'anye 'sloa-, -se 'a "kɛ -anye 'didale-, 'e -no -ɛwɛ -se 'e "kɛ 'anye "ɛ nunɛ ne 'na zɔ 'sloa-. -Ɛ kɛleɔ- Lagɔbɔgo "me -wɛ, 'a te -kɛ yɔko "me 'ple, zaa, 'nyɔkpɔ te -kɛ 'ɔyi "ku zia- 'nyakpa 'na "me 'dlidlileɛ "me.

⁷ Zaa, -ɔ 'kpɔmalea bhɔ -eyi "ku -elua 'yliku 'a? -Ye -e -kɛ 'klekle -wɛ, Lagɔ 'je- -lɔ -eyi kɔ, 'ɛ "ne bhɔ sɔbhɔ yɛ? Zaa, -e 'cɛ -yle ne, sɔɔbɛɛza -e zia bhɔ -eyi "ku sɛgbɛɛ -e "ne -yle 'a?

⁸ 'A -kɛ "kle -ye 'a 'yɔbhɔ 'klekle -wɛ! 'A 'pɔ "kle -klɔgbɔ! 'A "zo- -klɔgbɔnya, -mɔ, -anye, -a "ne kamalenya 'waa! 'A kɛ nɛ -kɛ 'diɛɛ kamalenya 'waa ne, 'anye "bhaa -a yi nɛ 'gɔme 'kamale-!

⁹ -Mɔ, 'neɛ dɛku, Lagɔ -no -lɔ -gbɔ -anye "kɔlepɔnya -a bhiɛle- 'be, sɛgbɛɛ -wa -ko 'kwiɛ 'na -jiɛ "me. 'Diɛɛ, -a -ko sɛgbɛɛ -zejilɛ -ye -glɔ 'klekle, "nɔgɔzilia "ne 'nyakpa 'ylɛ.

¹⁰ -A -noɔ "kukwɛnya 'waa Klise za, -mɔ, 'anye, 'klecɛnya 'na -wa "nɛ- -wɛ 'ye 'a -noɔ -lɔ. -Anye, -a "ne "me 'tɛ-, -mɔ, 'anye, 'a 'tɛ- "me. 'Ɛza, 'wa "zo -lɔ 'anye 'plome kpɛnyee, "ne 'wa "ne -lɔ -anye -bɛɛ' "me 'tɔle-.

¹¹ -Kaa -dɛme ne, ŋɔŋo -nyɛ 'ŋuto "bhaa lɔbhɔ -anye, "ne -a "ne "meplakoti -kɛ. 'Wa no -anye "nyɛnye 'wli, "ne -a "ne 'bhɛle- "ne -a "kɛ 'dɛ 'bhle 'gli.

¹² -A 'kplɛle libhɔnoɛ kɔ. 'Wa 'yli -anye, -mɔ, -anye, -a 'poa 'ŋu. 'Wa 'gbapea -anye, -mɔ, 'ɛ -ko "ɛ soɔ "ne -a 'ŋunu "ku.

¹³ 'Wa bhulɛ -anyɛɛ weli -nyɛnye, -mɔ, -anye, -a "tamalea -bedia 'kwɛme. 'Nyakpa 'na dɛku, -kaa -dɛme, dodo ne "ku 'na -didi 'ye -a -noɔ -lɔ, sɛgbɛɛ -bɛɛ' 'na -ɛ -kɛ 'fe "ne 'nyakpa 'klekle sɛ lɛ 'ɛnɛɛ lo ne.

¹⁴ Zu "kɛ 'anye lɔbhɔ za 'e "ne -na -kɛ 'anye "ku 'kɛle. -Mɔ, 'neɛ -wawayua 'ye 'a -noɔ -lɔ, 'ɛ za 'e 'sɛ -kɛ -lɔ 'anye 'yukwli 'fete "me.

¹⁵ "Naa-, 'nyakpa -wa -sloa 'anye Klise 'na "kukoleɛ -wɛ, 'wa "kɛ 'se 'nyakpa 'na -glo 'umgbu 'na 'wukwɛ kogbɔ -yle -ce (10.000) 'a "ne To 'na 'gbagboa -kɛ. -Ye 'e -sɛle 'anye 'Denaade -wɛ, Klise Zezu 'na zikpɛ 'ye 'e 'je- -lɔ 'anye kɔ.

¹⁶ Zaa, 'e 'bhubhɔ 'anye: 'A -gɛlele 'neɛ kosɛ.

¹⁷ 'Ɛnɛɛ 'ylime za 'e -lebhele -lɔ 'anye 'neɛ -wawayu Timote, -ɔ tɛle- Anyinɛnyɔ 'dle -wɛ "ku. -Se 'ɔ "kɛ 'anye 'dle 'luɔle, -see 'e -su 'neɛ zikpɛ "ku Klise "me -wɛ. 'Soɔ 'e sloa -lɔ moɔ 'klekle, Lagɔgligbɛ 'klekle "me.

¹⁸ -Bedia 'pɔ nɛ 'dle -gbɔ 'e -ka nɛ "kusɔ 'anyɛɛ moɔ yi, "ne 'wa zia -lɔ 'wayi "ku 'ɛza.

¹⁹ -Mɔ, Anyinɛnyɔ 'cɛ "ku 'ŋunu- ne, lɔbhɔ -ka "me 'gwlɛ "ne 'e "kɛ -lɔ 'anyɛɛ moɔ yi, -ɛ "ne -kɛ bhulɛweli -kwleyi -ɛ 'bhale 'bhabhanya nu -wɛ za yɛ, -mɔ, 'e "kɛ -ye 'wa 'bhɛle- -gbɔ 'wa "kɛ no -wɛ 'ylime 'ye.

²⁰ "Naa-, Lagɔ 'na 'Kamalezikpɛ "ne -kɛ bhulɛweli 'ɛyikɔ yɛ, -mɔ, Lagɔ 'na 'bhɛloɛ yɛ -lɔ.

²¹ Zaa, -ye 'a 'yɔbhɔ bhɔ -tia? 'E 'slu- -kple -se 'e "kɛ bhɔ 'anyɛɛ moɔ yi, -mɔ, 'e 'slu- 'ŋwɛnɛ 'dle -nyɛ 'dlewɔtɛ "bhaa 'a?