1 Kolɛtenya 3 - Nouveau Testament bété de Gagnoa

Lagɔ 'na "kulɔbhɔnya 'na libhɔ

¹ -Nyɔsɔwanye, -ame, Pɔle, 'e "ne 'anye -bhulɛle sɛgbɛɛ 'nyakpa 'na -ye Zuzu Wlewle -ko lɛ "me, -mɔ, 'e -bhulɛle 'anye 'nyakpa -wa "ne "me 'tɛ- -wɛ 'nasɛku, "ne 'klecɛnya 'na -wa -noɔ -na yua 'wa 'dlekukɛleɛ "me -wɛ 'nasɛ.

² 'See- 'e -bhulɛle 'anye -wɛ -ko sɛgbɛɛ yua 'lelea 'wa 'nyɛ -na 'nyeteŋu, 'wa -ka lilɛ 'na -ɛ 'tɛ- "ku -wɛ li zɛ. -Mɔ, 'nyakpa "yitia 'na Lilɛ 'ye 'e "ne -kɛ 'anye 'nyɛ-, sɛko -wɛ 'a "ne nɛ 'bhɛle-. "Ne -dɛme ne, 'a "ne -nazɛ 'bhɛle- 'yiɛ!

³ Sɛko -wɛ, 'a -namlɛ "me "tamale- zɛ. "Naa-, lɔbhɔzonoɛ, yɔkotɛkpɔtɛkpɔleɛ -ko 'anye 'glɛme. 'Ɛ kɛ soɔ -ko ne, 'nyakpa 'na -wa "ne "me 'tɛ- 'na -li 'ye 'a -na bhɔ no 'a? 'Anyɛɛ kosɛ "ne -na bhɔ -zɛ dodo ne "ku 'na 'nyakpa 'nasɛ -ko bha?

⁴ 'Anye 'glɛme 'na -bholo kɛ no -gbɔ: «-Ame, Pɔle, -nɔ 'ye 'e -noɔ -lɔ», "Ne -ɔwɛ kɛ 'lelee no nɛɛ: «-Ame, Apolɔse -nɔ 'ye 'e -noɔ -lɔ», "Ɛ weli -wɛ "ne bhɔ 'nyakpasɛku 'na bhulɛsɛ yɛ bha?

⁵ Apolɔse, 'nyɔ yɔ bhɔ? "Ne Pɔle sɔɔ 'nyɔ yɔ bhɔ? -Anye, Lagɔ 'na "kulɔbhɔnya 'ye -a -noɔ -lɔ -tia. "Naa-, -anye -gbɔ za 'a "zo- -lɔ 'dlekukɛlenya. -Ɔkɔkokɔko 'na -jɔlo -ye Anyinɛnyɔ 'jo- kɔ 'na libhɔ 'ye 'ɔ -no -lɔ.

⁶ -Ame, 'glo 'ye 'e -glo -lɔ, "ne Apolɔse 'yi -lɔ 'ŋu "ku 'slu, -mɔ, Lagɔ 'gbɛ- -lɔ 'kwɛle.

⁷ Sɔbhɔ za, -ɔ glo -wɛ "ne -bɛɛ' "me -ko, "ne -ɔ 'slu 'ŋu "ku -wɛ "ne -bɛɛ' "me -ko. -Mɔ, Lagɔ -ɔ 'gbɛ- 'kwɛle -wɛ 'no -lɔ 'klekle.

⁸ Gloglonyɔ "ne 'ŋukuslunyɔ 'glɛme, -bɛɛ' "ne -la lɔbhɔ -bɛɛ' -zi. -Mɔ, Libhɔ -ye -e -no -wɛ 'na 'peɛleɛ 'ye Lagɔ 'je -lɔ -eyi kɔ.

⁹ "Naa-, 'gɔme 'ye -a nole -lɔ Lagɔ 'na libhɔ. "Ne 'anye -noɔ -lɔ Lagɔ 'na 'lɛɛ 'waa. 'Anye -noɔ 'lelee -lɔ Lagɔ 'na -bhudu 'waa.

¹⁰ -Jɔlo -ye Lagɔ 'je -ame kɔ -wɛ, 'ɛ gbɔ "ne 'e yi -lɔ 'ɛnɛɛ -kpulu 'jilɛ, -bhudusɔbhɔnyɔ 'na "namanɔ 'nasɛ. 'Nyɔkpɔ yi "ne 'ɔ 'sɔbhɔle "klo. -Mɔ -ɔkɔkokɔko 'luɔle- -kɛ 'ɔnɛɛ 'sɔbhɔsɛ "ku.

¹¹ -Ɛ 'pɛleɔ- glu "kle -wɛ -le: Zezu Kli yɔ -lɔ. 'Nyɔkpɔ -fu -kɛ -la 'ɛ -vinɛ glu 'pɛle.

¹² 'Wa 'bhɛle- 'wa "kɛ -ɛ 'pɛleɔ- glu "kle -wɛ, -badlɛ, 'dlasi, 'leyli 'tiyi, su, -piti sɔ "ne -vuɛ "klo 'sɔbhɔle,

¹³ 'Nyɔkpɔ 'na libhɔ -ye 'ɔ -no -wɛ yi 'ce 'ylime 'yeɔ-. 'Gbobhlezle -a 'yi 'ce yibhlele-. "Naa-, "ɛ -zle -wɛ -kosu 'na 'gbagbo yi lɔbhɔ ko, "ɛ -kosu -wɛ "kɛ 'ce -lɔ -ɔkɔkokɔko 'na libhɔ -ye 'ɔ -no -ɛ 'nɛne "ne -ɛ "ne 'nɛne -wɛ 'ylime tuɔ.

¹⁴ 'Nyɔkpɔ kɛ -bhudu 'sɔbhɔ- "ne 'ɛ "kɛ -kosu "me -ylɛle "ne 'ɛ "mɔ -si ne, 'ɔyi 'ce 'ɛnɛɛ 'peɛleɛ yle.

¹⁵ -Mɔ, -ye "ɛ 'nyɔkpɔ -wɛ 'sɔbhɔ- -wɛ kɛ -si 'fefe ne, kɔ 'ye 'ɔ -ylɔ -lɔ doɔ. 'Ɔyi, 'ɔ yi 'ce "po, -mɔ, 'ɔ yi 'ce ko sɛgbɛɛ 'nyɔkpɔ 'na -ɔ ylɛle- lɛ -kosu "me "ne 'ɔ 'bhɛ- nu.

¹⁶ 'Anye -noɔ -lɔ Lagɔ 'na "mebɔbɔlebhudu 'waa, "ne Lagɔ 'na zuzu -ko 'anye "me. 'A "ne bhɔ 'ɛnɛɛ za 'sɛ -yi bha?

¹⁷ 'Nyɔkpɔ kɛ Lagɔ "mebɔbɔle-bhudu -wlɛ, 'ɔyi -wɛ, Lagɔ yu "ku 'bhia-. 'Diɛɛ, Lagɔ 'na Lagɔ "mebɔbɔle-bhudu 'wlewle 'ye 'ɛ -ko -lɔ, "ɛ Lagɔ "mebɔbɔle-bhudu -wɛ, 'anye 'waa -lɔ.

¹⁸ 'Nyɔkpɔ te -kɛ 'ɔyi "gbi "toa, 'anye 'glɛme 'na 'nyɔkpɔ "kɛ 'ɔyi 'ylimeyamalesɛ -su dodo ne "ku 'na 'nyakpa 'nasɛ, 'ɔ no "kukwɛnyɔ 'na -li, -se 'ɔ "kɛ 'ylimeyamalenyɔ "zo!

¹⁹ "Naa-, dodo ne "ku 'na 'nyakpa 'na 'ylimeyamaleɛ, Lagɔ 'na dɛku "kukwɛ yɛ -lɔ. 'Ɛnɛɛ za sɛne 'ye 'ɛ kɛleɔ- -lɔ Lagɔbɔgo "me nɛɛ: «'Ylimeyamalenya 'na yowlɛ-gbotu -ye 'wa -ci, 'ɛyi 'ye Lagɔ "saloa -lɔ nu.»

²⁰ Sɛne 'ye 'ɛ kɛleɔ- -lɔ Lagɔbɔgo "me nɛɛ: «Anyinɛnyɔ -yi 'ylimeyamalenya 'na 'dlepɔsɛ, 'ɔ -yi sɛ -gbɔ 'ɛ "ne -bɛɛ' "me -ko.»

²¹ Zaa, 'nyɔkpɔ te fu bha 'ɔluyu -nyɔkpɔ za, "naa-, 'anye 'bhe- -lɔ -li 'klekle.

²² Pɔle 'oo, Apolɔse 'oo, Sefase 'oo, dodo 'oo, zikpɛ 'oo, 'kwiɛ 'oo, -dɛme ne 'oo, bhliji 'oo, 'ɛyi 'klekle 'anye 'bhe- -lɔ.

²³ Zaa, 'anye, Klise -noa 'ye 'a -noɔ -lɔ, "ne Klise, Lagɔ 'bho- -lɔ.