1 Kolɛtenya 2 - Nouveau Testament bété de Gagnoa

Pɔle 'sɛ Klise -ye 'wa -kole klowa "klo -wɛ 'na 'de

¹ -Nyɔsɔwanye, -ame 'nabhɛ, -sɔɔdɛku 'e -yi 'anyɛɛ moɔ -wɛ, 'e -tua 'anye Lagɔ 'na 'dlekununaweli 'ylime. "Ne -see 'a 'cɛ 'no -wɛ 'ye 'e -bhulɛ -lɔ. -Mɔ, 'e "ne 'se 'nyɔkpɔ 'sɛku 'na 'ylimeyamalesɛ -bhulɛ.

² "Naa-, 'anye 'glɛme, 'e "ne 'yɔbhɔ nɛ -gbɔ 'e "kɛ -bɛɛ' 'na -vinɛ yibhlele-, 'ɛ "mɔ Zezu Kli, Zezu Kli -ye 'wa -kole klowa "klo -wɛ yɔ ne.

³ -Ame 'nabhɛ -ye 'e -ko nɛ 'anyɛɛ -moɔ -wɛ ne, 'neɛ 'kwɛme -plɛ nɛ fo, "ne 'e tɛtɛle nɛ nyanɔ za,

⁴ 'neɛ bhulɛweli -nyɛ 'neɛ sloasɛ "bhaa "ne nɛ 'yukwli "me meniaweli -ɛ 'bhale 'nyakpa 'sɛku 'na 'ylimeyamaleɛ "me yɛ. -Mɔ, Zuzu Wlewle 'na 'bhɛloɛ 'wlole nɛ -lɔ "ɛ -ye 'e bhulɛ -wɛ "me zɔ gbɛklɛklɛ.

⁵ -Se 'anyɛɛ 'dlekukɛleɛ te -ka -la 'nyakpa 'sɛku 'na 'ylimeyamaleɛ 'sɛku ko "me, -mɔ Lagɔ 'na 'bhɛloɛ 'ye 'ɛ 'na ko "me.

Lagɔ 'na 'ylimeyamaleweli

⁶ "Naa-, 'ɛ soɔ 'na 'ylimeyamaleɛ -wɛ 'ye -a sloa -lɔ 'klecɛnya 'na -wa 'ya 'klecɛzoɛ "me 'gwlɛ 'dlekukɛleɛ "me -wɛ. -Mɔ, "ɛ 'ylimeyamaleɛ ne, 'ɛ "ne dodo ne "ku 'na 'ylimeyamaleɛ yɛ, "ne 'ɛ "ne dodo ne "ku 'na "yitia 'na 'ylimeyamaleɛ -ye 'wa "kɛ 'ce "ku 'bhia -wɛ yɛ.

⁷ -Anye, -a -sloa Lagɔ 'na 'ylimeyamaleɛ -ɛ zizɔ- 'awɔ "ku -wɛ. -Mɔ, zikpɛ "ne 'awɔ -le, "ne Lagɔ 'sɛa -lɔ lɔbhɔ 'ɛ 'ylimeyamaleɛ ne -se 'ɛ -kɛ -anye 'ŋlu 'kwa.

⁸ Dodo ne "ku 'na "yitia 'na 'glɛme 'na -bholo "ne "ɛ 'ylimeyamaleɛ ne -yibhlele, 'wa 'cɛ nɛ -yibhlele ne, 'wa kɛ 'awɔ Anyinɛnyɔ, 'Ŋlumenyɔ klowa "klo kole-.

⁹ "Naa-, sɛne 'ye 'ɛ -kɛle -lɔ Lagɔbɔgo "me nɛɛ: «-Li 'na -bedi -ko lɔbhɔ -ye 'yli "ne 'ye-. -Ye 'yukwli "ne 'no-, "ne -ye dodo ne "ku 'na 'nyakpa -na 'ce -zɛ "ku 'dlepɔ. Zaa, 'ɛ soɔ 'na -li -wɛ, Lagɔ -sɛ -lɔ lɔbhɔ -wa -kɛ 'ɔnɛɛ 'ŋwɛnɛ "me -wɛ za.»

¹⁰ -Anye 'ye Lagɔ -tuɛ -lɔ 'ylime Zuzu Wlewle "me, "naa-, Zuzu Wlewle -yi -li 'klekle, 'ɛ kɛ 'se -ɛ -ko Lagɔ 'na 'dlezɔ -wɛ yɛ -ce.

¹¹ -Ɔ -yi bhɔ -ɛ -ko 'nyɔkpɔ 'na 'dlezɔ 'a? 'Nyɔkpɔ "ne -yi. 'Ɛ "mɔ -kɛ zuzu -ɛ -ko 'nyɔkpɔ "me -wɛ yɛ. 'Ɛ sɛbhele -wɛ, -ɔ -yi bhɔ -ɛ -ko Lagɔ 'na 'dlezɔ 'a? 'Nyɔkpɔ "ne -yi. 'Ɛ "mɔ -kɛ Lagɔ 'na Zuzu yɛ.

¹² -Anye dodo ne "ku 'na zuzu 'ye -a "ne -kɛ -yle, -mɔ, Zuzu 'na -ɛ 'bhale Lagɔ "me -wɛ 'ye -a -yle -lɔ. -Se -a "kɛ -kɛ Lagɔ 'na -li 'na -li -ye 'ɔ 'je -anye kɔ -wɛ yibhlele-.

¹³ -A -na -kɛ -li 'na -li -ye 'ɔ 'je- -anye kɔ ne 'nyakpa 'na 'ylimeyamale sɛku sloa. Lagɔ Zuzu 'na -ye 'ɔ -sloa -anye -wɛ "me 'ye -a sloale -lɔ, "ne -a sɛ -lɔ -ɛ 'bhale Lagɔ Zuzu "me -wɛ zɔ, 'ɛ -nyɛ weli -ɛ 'bhale 'ɛ Zuzu "me -wɛ "bhaa.

¹⁴ 'Nyɔkpɔ 'na -ɔ 'pɔ 'nyakpa 'sɛku 'dle -wɛ, 'ɔ nyɔɔ' 'yɔbhɔ -ɛ 'bhale Lagɔ 'na Zuzu "me -wɛ. 'Ɔnɛɛ dɛku "kukwɛ yɛ -lɔ, "ne ɔɔ' -cɛ "me 'no. "Naa-, Zuzu Wlewle 'ɛyikɔ 'bhle -lɔ "ɛ soɔ 'na 'gbo -wɛ 'wɔ.

¹⁵ "Ne 'nyɔkpɔ 'na -ye Zuzu Wlewle -ko "me -wɛ 'bhɛle- -lɔ -se 'ɔ "kɛ 'ɛyi 'klekle 'bhle. -Mɔ, 'ɔyi, 'nyɔkpɔ "ne 'bhɛle- "ne 'ɔ "kɔ 'gbobhlele-.

¹⁶ "Naa-, sɛne 'ye 'ɛ kɛleɔ- -lɔ Lagɔbɔgo "me nɛɛ: «-Ɔ -yi bhɔ Anyinɛnyɔ 'na 'dlepɔsɛ 'a? "Ne -ɔ "kɔ bhɔ 'deme "zo 'a?» -Mɔ, -anye, Klise 'na 'dlepɔsɛ 'ye -a -kɛ -lɔ.