1 Kolɛtenya 16 - Nouveau Testament bété de Gagnoa

Kɔlɛte 'na 'klecɛnya bi 'dlasi "ku -se 'wa kɛ Zeluzalɛme 'na Lagɔgligbɛ kwɛle-

¹ 'Dlasi -ye 'wa "kɛ Zeluzalɛme 'na 'klecɛnya za 'wli "zo -wɛ, 'e -bhulɛle -see 'ɛ "kɛ ylɛle- -wɛ 'na weli Galasi 'na Lagɔgligbɛ. 'Anye, 'a 'gɛle me 'lelee.

² -Se dimasi ylɛ -wɛ, -ɔkɔkokɔko yi 'ɔnɛɛ 'dlasi lɔbhɔ 'piɛ -see 'ɔ 'bhɛle -wɛ. 'Ɛ kɛ -soɔ -ko, 'wa -ka -la 'neɛ yiyiɛ wo- "ne 'wa yi "ɛ 'dlasi -wɛ 'wli "zo.

³ "Ne -zle, 'e kɛ yi, "ne 'e "kɛ -lɔ 'nyakpa -ye 'a -tɔ -wɛ Zeluzalɛme 'lebhele-. "Ne 'e "koa -lɔ -ye 'wa "kɛ no -wɛ 'na "bɔgo kɔ 'je. "Ne 'wa "kɛ -lɔ 'anyɛɛ -ye 'a -sɛ -wɛ -nɛme.

⁴ 'E kɛ no -gbɔ 'e yi "mɔme ne, 'wayi 'wɔ "bhaa 'gɔme 'ye -a "kɛ -lɔ mele-.

Pɔle bhulɛ 'ɔnɛɛ -glɔ "ku me weli

⁵ 'E 'yi Masedoane ylɛle- "ne 'e "kɛ -lɔ 'anyɛɛ moɔ 'yi, "naa-, Masedoane -glɔ "me 'ye 'e "kɛ -lɔ "ku "to.

⁶ 'E 'yi -lalɛce 'yli yɛ 'anyɛɛ moɔ -sɛ, wɔtlɔ "yitɛ 'na yi dɛku. Zaa, 'a "kɛ -kɛ -ame kwɛle- -se 'e "kɛ -kɛ 'neɛ -gwe bhli-.

⁷ 'E -na -kɛ no -gbɔ 'e "kɛ 'anye 'pleple 'sɛku 'bhɛle-, -mɔ, Anyinɛnyɔ 'cɛ -kɛ "ku 'ŋunu- ne, 'e yi 'anye 'yli yɛ yɔko -sɛ.

⁸ "Naa-, 'e 'yi Efɛze ko -kaa "ne Patekɔte 'na 'yli "kɛ -lɔ 'ylɛ.

⁹ 'Neɛ -gblenya -zu lɔbhɔ kpɛnyee, -mɔ, 'ɛ ko sɔbhɔ "ne 'e "kɛ -lɔ lɔbhɔ Lagɔ 'na libhɔ "yitɛ nole-.

¹⁰ Zaa, Timote kɛ -yi, 'a "sɔ 'tee -se nyanɔ 'to kɛ ku "me ko. "Naa-, Anyinɛnyɔ 'na libhɔ 'ye 'ɔ no "me -lɔ 'neɛ sɛ.

¹¹ 'Nyɔkpɔ 'to -kɛ 'gble, -mɔ, 'a 'kwɛlo -se 'ɔ "kɛ -kɛ -ame yɔko 'wlizɔ 'zi 'dlewɔtɛ "me. 'E -wo 'e -nyɛɛ "nowlia 'wɔ "bhaa.

¹² Ɛ kɛ -a "nɔwli Apolɔse yɔ, 'e "tamaleɔ 'kwɛme kpɛnyee -gbɔ 'ɔ 'yi 'anyɛɛ moɔ 'ɔ -nyɛ "nowlia 'na -bedia -wɛ 'wɔ "bhaa, -mɔ, 'ɔ nɛɛ 'ɔ -ka -dɛme "bhle 'yi, -mɔ, -zle, 'ɔ -wa -wɛ -ye 'ɔ "kɛ -lɔ "bhle 'yi.

'Bebhiɛle demezoweli -nyɛ Pɔle 'na bhɛleweli "bhaa

¹³ 'A 'gɛle- 'ylime, -se 'anyɛɛ 'dlekukɛleɛ "tamale "me! 'A "tamale 'dleku, -se 'a "tamale "me!

¹⁴ -Se -ye 'a no 'klekle -wɛ, 'a no -walesɛ.

¹⁵ 'E bhulɛle 'lelee 'anye, -nyɔsɔwanye, 'a -yi bhɔ 'sɛ 'a, Setefanase -nyɛ 'ɔnɛɛ -gligbɛnya 'wɔ "bhaa, Akayi -glɔ "me 'na tɛtɛ 'klecɛnya 'waa -lɔ, "ne 'wa yi -lɔ 'klecɛnya 'na -vinoa "ku lɔbhɔ-.

¹⁶ Zaa, 'a "zo 'ɛ -soɔ 'na 'nyakpa 'nyɔ 'wɔ "bhaa 'wa nole Lagɔ 'na libhɔ 'gɔme -wɛ 'plome.

¹⁷ Setefanase, Fɔletunatuse "ne Akayicuse 'na -ye 'wa -yi -ame "ku 'be ka -le -ame 'ŋwɛnɛ "ku. 'Wa -yi -ame yɔko 'anyɛɛ bhulɛ "me.

¹⁸ -Wa "tamalea- -ame 'dleku, 'wa "tamalea- -me 'lelee -lɔ 'anye 'dleku! Zaa, 'a yibhlele- 'sɛ -gbɔ "ɛ 'nyakpa -wɛ libhɔ 'na "namanɔ 'wa no -lɔ.

¹⁹ Azi -glɔ "me 'na Lagɔgligbɛ 'klekle "me 'na 'nyakpa 'bhɛle 'anye. Akilase "ne Plisile, "ne Lagɔgligbɛ "me 'na 'nyakpa -wa "zole 'wanɛɛ -dɛce 'wli -wɛ 'bhɛle 'anye Anyinɛnyɔ 'na 'tɔ "me.

²⁰ Lagɔnya 'klekle -wa -ko 'ɛ 'mɛne 'bhɛle 'anye. 'A 'bhɛlebhɛlele-, -se 'a 'tutule- "ku sɛgbɛɛ "nowlia -nyɛ "nɔyoa 'wɔ "bhaa.

²¹ -Ame, Pɔle, 'neɛ 'kwlɛ nu 'ye 'e "kɛlele- lɛ 'ɛ bhɛleweli ne: «-Ame, Pɔle, 'e bhɛle 'anye.»

²² 'Nyɔkpɔ "mɔ Anyinɛnyɔ -wa, 'wa "pɔ 'kwiaku! Malanata: 'Ɛ sɛ zɔ nɛɛ: Anyinɛnyɔ yi!

²³ Anyinɛnyɔ Zezu "pɔ 'anye 'ŋu!

²⁴ -Ame, Pɔle, 'e -wa 'anye 'klekle Zezu Kli 'na 'tɔ "me.