1 Kolɛtenya 15 - Nouveau Testament bété de Gagnoa

Klise 'wlo gluzɔ

¹ -Nyɔsɔwanye, 'Denaade -ye 'e -sloa 'anye -wɛ, 'ɛ za 'e "lua -lɔ 'anye. 'A no- "me, "ne -zeka 'na -zle ne "me, 'a -cɛ kɔ.

² 'Ɛ 'Denaade ne, 'ɛ 'fuɔ -lɔ 'anye, za, 'a 'cɛ kɛ -se 'e -sloa 'anye -wɛ kɔ -kɛ 'yiɛ ne, 'ɛ 'nɛne, -mɔ, 'ɛ "mɔ kɛ sɔbhɔ yɛ ne, 'anyɛɛ 'dlekukɛleɛ "ne -kɛ -bɛɛ' "me -ko.

³ "Ɛ 'Denaade -wɛ -ye 'wa -sloa -ame -wɛ, 'ɛyi 'ye -ame 'nabhɛ -sloa -lɔ 'anye tɛ: -Gbɔ Klise -ku -anyɛɛ 'nyinyonoli 'na 'gbo "me. -Se "ɛ Lagɔbɔgo -gbɔ 'awɔ -wɛ -yɛ -lɔ.

⁴ 'Wa 'piɔ -biɛ "me, "ne 'yli ta -zle, Lagɔ yu -lɔ glusɛ-, sɔbhɔ 'ye Lagɔbɔgo la -lɔ.

⁵ "Ne 'ɔ yi -lɔ 'ɔyi Sefase -ye 'wa la "me Piɛle -wɛ 'ylime -tua 'ɛ -nyɛ "kɔlepɔnya kogbɔ "sɔ -wɛ "bhaa.

⁶ "Ne 'ɔ yi 'lelee -lɔ 'ɔyi 'ɔnɛɛ gɛlenya 'na glo 'umgbu (500) 'ylime -tua zle -bhele -wɛ, 'wanɛɛ 'glɛme 'na 'klweyia -yɛ -namlɛ -dɛme, "ne -bedia "ku-.

⁷ "Ne 'ɔ yi -lɔ 'ɔyi Zake, "ne "kɔlepɔnya 'klekle 'ylime tua-.

⁸ 'Bebhiɛle dɛku, 'wawɛ nɛ "bhalɛ lɔbhɔ "bhuɔ ne, "ne 'ɔ 'yi 'lelee -lɔ -ame 'ɔyi 'ylime tua-, -ame 'mɔɔ "ne -bɛɛ' "me -ko ne.

⁹ -Ame Pɔle, Zezu 'na "kɔlepɔnyɔ 'na 'tekeyi -nɔ 'ye 'e -noɔ -lɔ. 'Neɛ 'tɔ "ne -mlɛ -kɛ 'kɔle -tɔ 'nabhɛ "ku -ŋwa, sɛko -wɛ, 'e -gbapea -kɛ Lagɔgligbɛ kpɛnyee zɛ.

¹⁰ -Mɔ, Lagɔ 'na -se 'ɔ -wa -ame -wɛ za, 'e "zo- -lɔ -zeka 'nyɔkpɔ "ne 'a -gɛ -lɔ -ame 'yli, "ne 'ɔnɛɛ 'ŋwɛnɛ -wɛ yi -lɔ -ame -li 'na -li noa-, 'e -no libhɔ "ne 'ɛ -zi "kɔlepɔnya 'klekle -nɛ "ku. 'Mɔɔ "ne -kɛ "ɛ libhɔ -wɛ no, -mɔ, Lagɔ 'na -jɔlo 'gbɔ- -lɔ.

¹¹ -Lalɛce, -ame 'ye 'ɛ 'bhale "me 'o, 'wayi 'ye 'ɛ 'bhale "me 'o, -mɔ, 'Denaade -ye -a -sɛle 'anye "ne 'a 'kɛle- 'dleku -wɛ -lɔ.

Lagɔ yi 'dlekukɛlenya glusɛ

¹² -A bhulɛle 'anye nɛɛ: Klise 'wlo- gluzɔ. -Mɔ, 'anye 'glɛme 'na -Bedia nɛɛ: «-Glukonya "ne 'wlo -la gluzɔ.» Sɔɔbɛɛza 'wa lɛ bhɔ -soɔ 'a?

¹³ -Glukonya "mɔ gluzɔ 'wlo ne, Klise "ne -lɔ gluzɔ 'wlo- me.

¹⁴ "Ne 'ɛ Klise "mɔ gluzɔ 'wlo- ne, -ye -a -bhulɛle 'anye -wɛ "ne -lɔ -bɛɛ' "me -ko, zaa, 'ye 'a -kɛ 'dleku -wɛ "ne 'lelee -bɛɛ' "me -ko -me.

¹⁵ -Glukonya "mɔ -diɛnadiɛ gluzɔ 'wlo ne, 'ɛwɛ 'ɛ 'sɛ zɔ -gbɔ nɛɛ Lagɔ "ne Klise -glukonya 'glɛme -sɛ, zaa, Lagɔ 'na 'Denaade -ye -a 'sɛ -wɛ 'yo yɛ -lɔ. -Ye Lagɔ -na no -wɛ 'na 'de -ye -a 'sɛ -lɔ nɛɛ Lagɔ 'wloa- Zezu -glukonya 'glɛme zɔ.

¹⁶ Zaa, -glukonya "mɔ gluzɔ 'wlo- ne, 'ɛ 'yi -ye Klise "ne 'lelee -lɔ gluzɔ 'wlo- -me.

¹⁷ "Ne Klise "mɔ gluzɔ 'wlo- ne, 'anyɛɛ 'dlekukɛleɛ "ne 'lelee -bɛɛ' "me -ko, "ne 'a -ko 'anyɛɛ 'nyinyonoli "me 'yiɛ.

¹⁸ Zaa, -wa -kɛ Klise 'dleku "ne 'wa -ku -wɛ, 'kwlɛ -wa -bhli -lɔ.

¹⁹ -A kɛ -anyɛɛ 'dletɛleɛ Klise "me "zo dodo ne "ku za ne, 'nyɛzenya 'na -wa -zi 'nyɛzenya 'klekle "ku 'ye -a -noɔ -lɔ.

Zezu 'wlo- -diɛnadiɛ gluzɔ

²⁰ -Diɛnadiɛ Klise 'wlo- gluzɔ. -Glukonya 'glɛme 'ɔ -noɔ -lɔ tɛtɛnyɔ 'na 'ɔ 'wlo- gluzɔ yɔ, -se -glukonya 'na -wawɛ 'wɔ "kɛ kɛ gluzɔ 'wlo -me.

²¹ "Naa-, 'nyɔkpɔ -ye 'wa la Ada -wɛ "me 'kwiɛ 'bhale -lɔ. 'Ɛ sɛbhele -wɛ 'ye 'nyɔkpɔ -ye 'wa la Klise -wɛ "me -glukonya 'wlo -lɔ gluzɔ.

²² 'Nyakpa 'klekle ku, "naa-, Ada "me 'ye -a 'bhale -lɔ zɛ. 'Ɛ sɛbhele -wɛ 'ye 'nyakpa "kɛ -lɔ zikpɛ yle, "naa-, Klise 'ye -a -glɛ -lɔ 'glɛ zɛ.

²³ -Mɔ, -ɔkɔkokɔko -kɛ ɔnɛɛ 'dɛle 'na de 'ɔ -gɛ. Klise -noɔ -lɔ tɛtɛnyɔ -ɔ 'wlo- gluzɔ yɔ. "Ne wa -nyɛ Klise "bhaa 'wa -kole "ku -wɛ "kɛ 'ce -lɔ gluzɔ 'wlo -me, -sɔɔdɛku 'ɔ "kɛ 'ce 'yi -wɛ.

²⁴ Zikpɛ 'na "kubhiɛ -dɛku, Klise 'yi zuzu "nyɛnyea 'na 'bhɛloɛ -ɛ 'gbli 'anye 'wlime -wɛ "ku 'bhia. "Ne 'ɔ "kɛ -la -lɔ 'ɔnɛɛ 'kamaleɛ To Lagɔ kɔ 'je.

²⁵ Lɔbhɔ 'na dɛku, Lagɔ 'yi 'ɔnɛɛ 'gbhlenya Zezu Kli 'bhozɔ "zo, -mɔ, lɔbhɔ -gba "kɛ ylɛ ne, Klise "mɔ -na -kɛ 'kamaleɛ 'na 'bhɛloɛ 'klekle yle "bhuɔ.

²⁶ 'Bebhiɛle 'gblenyɔ 'na 'ye Lagɔ "kɛ 'ce "ku 'bhia 'pa- -lɔ 'kwiɛ.

²⁷ Lagɔbɔgo "me, sɛne 'wa lɛ- -lɔ nɛɛ: «Lagɔ -zo Klise -li 'klekle 'bhozɔ» -Mɔ, -zle Klise -kɛ 'ce no nɛɛ: «-Dɛmeda, 'mɔɔ 'bhe- -kɛ -la -lɔ 'ɛ 'bhɛloɛ -wɛ», 'Ɛ 'sɛzɔ nɛɛ: 'Ɛyi 'klekle, -mɔ, Lagɔ "ne -kɛ 'bhle -ko me. "Naa-, Lagɔ 'je -lɔ Klise 'bhɛloɛ kɔ -li 'klekle "me zɛ.

²⁸ Lagɔ kɔ "ce -lɔ 'bhɛloɛ 'klekle kɔ 'je. Zaa, -zle Lagɔ Yowli -kɛ 'ce 'ɛ 'bhɛloɛ -wɛ -yle -li 'klekle "me ne, lɔbhɔ, 'ɔyigɛsɛ "kɛ -la -lɔ Lagɔ 'na 'bhɛloɛ zɔ ko, "ne Lagɔ "kɛ -lɔ 'nyakpa 'klekle kwlɛ 'wlime 'piɛ.

²⁹ -Bedia yle batɛme -wa "ku- -wɛ za. 'Ye 'ɛyi -wɛ "koa bhɔ "ku 'nɛme 'a? 'A -gɛyli, -glukonya "mɔ nɛ gluzɔ 'wlo- ne, sɔɔbɛɛza "ɛ 'nyakpa -wɛ -yle bhɔ batɛme 'wanɛɛ za 'a?

³⁰ "Ne 'anye, sɔɔbɛɛza -a 'pelia bhɔ -ayi 'kwiɛ 'yli "ne 'ɛ "ne bhɔ 'nɛnidɛ -kɛ 'a?

³¹ 'E -ko 'ce 'kwiɛ 'yli -godogodo. -Nyɔsɔwanye, -diɛnadiɛ; 'E zia 'ayi "ku 'anyɛɛ za Anyinɛnyɔ Zezu Kli "me.

³² 'Du -ye 'wa la Efɛze -wɛ 'na 'nyakpa "bhaa -a 'tɔkpɔtɔkpɔle- yɔko 'Denaade za, 'wa -ko sɛgbɛɛ 'nɛmea -nyɛnyea. 'Ɛ kɛ nɛ -kɛ 'nyakpa 'sɛku 'na 'dlepɔsɛ yɛ ne, -ye 'e -ylele bhɔ 'bhle 'a? Zaa, -glukonya "mɔ gluzɔ 'wlo- ne, «-a li -se -a 'nɔmɔ "naa- 'zegbɛ ku 'ye -a "kɛ -lɔ "ku -zɛ.»

³³ 'A "luɔ- -kɛ: «'Titoa 'na -bedia 'sile -me -kɛ 'walua "nyɛnyenoɛ "me.»

³⁴ Zaa, 'a "pɔ -kɛ 'dle 'tee, -se 'a "kɛ ko, "ne 'a -ka -kɛ 'nyinyonoli no -wɛ! "Naa-, 'anyɛɛ 'glɛme 'na -bedia "ne -kɛ Lagɔ -yi zɛ. -Ye 'e bhulɛ -dɛne -wɛ, 'anyɛɛ zu yɛ -lɔ.

-See -glukonya 'wlo bhɔ gluzɔ 'a?

³⁵ -Mɔ, 'nyɔkpɔ 'bhɛle 'ɔ "kɛ lo 'yɔbhɔ -gbɔ -see -glukonya 'wlo bhɔ gluzɔ 'a? "Ne -sɔ -ku 'wa "kɛ bhɔ -kɛle 'a?

³⁶ -Ɔ "ne "nɛ- -lɛ, -e "kɛ -bagu 'glo ne, 'ɛ 'mɛ -na "ku "bhuɔ "ne 'ɛ "zo -lɔ -piti 'na -yɛyɛnɛ.

³⁷ -Ye -e 'glo -wɛ -bagu yɛ "fu yɛ -lɔ, 'ɛ yi -bagu yɛ "zo "ne 'ɛ yi 'gloglo yɛ 'na 'vinɛ "zo, 'ɛnɛɛ 'kwɛle 'ye -e 'na 'glo.

³⁸ -Mɔ, Lagɔ 'je -lɔ -bagu su 'na 'ye 'ɔ 'yɔbhɔ -wɛ kɔ, "ne 'ɔ 'nyɛ "me 'lelee -lɔ 'yo 'na -bedia su 'na -ɛ -noɔ 'ɛnɛɛ yɛ -wɛ kɔ.

³⁹ Ku "ne 'bhle yɛ, 'nyakpa 'na ku -nyɛ 'nɛmea nɛ "bhaa, "ne 'zea -nyɛ zibhia "bhaa "ne -kɛ 'bhle yɛ.

⁴⁰ "Nɔgɔ "me 'na ku -le, "ne dodo ne "ku 'na ku -le. -Mɔ, "nɔgɔ "me 'na -ku 'na nanoɛ -nyɛ dodo ne "ku 'na ku 'na nanoɛ "ne 'bhle yɛ.

⁴¹ 'Ylo 'na nanoɛ -nyɛ 'ce 'na nanoɛ "bhaa "ne -bhele yɛ, "ne 'wanɛɛ nanoɛ "ne -zeli 'na nanoɛ "bhaa "ne 'bhle yɛ. -Zeli 'klekle 'na nanoɛ "ne 'bhle yɛ.

⁴² Zle -glukonya kɛ 'ce gluzɔ 'wlo-, 'ɛ sɛbhele -wɛ 'ye 'ɛ "kɛ 'ce -lɔ ko, "naa-, 'ye -wa "zo dodo "me sɛgbɛɛ -bagu yɛ -wɛ, ku 'na 'ɛ "kɛ 'zu yɛ -lɔ. -Mɔ, 'ɛ "kɛ -la gluzɔ 'wlo "bhuɔ ne, 'ɛ -ka -la 'zu.

⁴³ Zaa, -gɛzɛ -ye 'wa "zo dodo "me -wɛ "ne -la -bɛɛ' "me -ko "ne -ɔ "ne "me 'tɛ-. -Mɔ, 'ɔ kɛ -la gluzɔ 'wlo- ne, 'namale 'ye 'ɔ namale -lɔ "ne 'ɔ "tamale -lɔ "me.

⁴⁴ -Gɛzɛ -ye 'wa "zo dodo "me sɛgbɛɛ -bagu yɛ -wɛ 'ɔ "ne -bɛɛ' "me ko "ne 'ɔ "ne "me 'tɛ-. -Mɔ, 'ɔ kɛ gluzɔ 'wlo- ne, Zuzu Wlewle 'nyɔ -lɔ zikpɛ, zaa, dodo ne "ku 'na -gɛzɛ "fu -nɔ yɔ -lɔ. Mɔ, -gɛzɛ 'na -ye Zuzu Wlewle 'nyɛ zikpɛ -le, "nɔgɔ "me -nɔ yɔ -lɔ.

⁴⁵ Lagɔbɔgo "me -ye 'wa zɛle "me ne lɛ: «Ada, 'tɛkɛ 'nyɔkpɔ -fu -ɔ -yle zikpɛ yɔ -lɔ.» 'Bebhiɛle Ada, Zuzu Wlewle -ɔ 'nyɛ zikpɛ 'yiɔ- "ku.

⁴⁶ -Ɔ yi 'tɛ- -wɛ, 'ɔ "ne 'nyɔkpɔ -ye Zuzu Wlewle -ko "me -wɛ yɔ. -Mɔ, 'nyɔkpɔ -fu yɔ -lɔ. "Ne 'nyɔkpɔ -ye Zuzu Wlewle -ko "me -wɛ -yi -la -lɔ.

⁴⁷ Lagɔ no tɛtɛ 'nyɔkpɔ 'bhibhi "ku. Sɔbhɔ, 'na 'nyɔkpɔ -wɛ, 'bhibhi "me 'ye 'ɔ 'bhale -lɔ, -mɔ, 'nyɔkpɔ 'na "sɔnɔ -wɛ "nɔgɔ "me 'ye 'ɔ 'bhale -lɔ.

⁴⁸ 'Wanɛɛ -wa 'bhale 'bhibhi "me -wɛ -ko sɛgbɛɛ 'ye Lagɔ -no 'bhibhi "ku -wɛ. "Ne 'wanɛɛ -wa 'bhale "nɔgɔ "me -wɛ -ko sɛgbɛɛ -ɔ 'bhale "nɔgɔ "me.

⁴⁹ "Ɛ sɛbhele -wɛ, -anye, -a 'wlole- -dɛme 'nyakpa -ye -wa -no 'bhibhi "ku -wɛ. -Mɔ, lɔbhɔ "kɛ "me 'gwlɛ ne, -a 'yi 'lelee 'nyɔkpɔ -ɔ 'bhale "nɔgɔ "me -wɛ 'wlole.

⁵⁰ -Nyɔsɔwanye, 'ye 'e no -gbɔ 'e "kɛ bhulɛ ne lɛ: 'Ɛ -noɔ ku -nyɛ 'dlu "bhaa yɛ -wɛ -ka -kɛ Lagɔ 'na 'Kamalezikpɛ "me "mɔme. "Ne -ɛ "kɛ 'zu -wɛ "ne 'bhɛle "ne 'ɛ "kɛ zikpɛ 'na -ɛ -ka "kubhiɛ -wɛ yle -me.

⁵¹ 'E "kɛ 'anye gbɛklɛklɛ -ɛ zizɔ- "ku -wɛ 'na weli bhulɛle: -A -ka 'ce "ku 'klekle, -mɔ, -a 'yi 'ce kɔ 'bheliɔ-.

⁵² 'Gba 'bhle -wɛ "me 'ɛ 'yi -noɔ cuu, 'wa kɛ lɛglɛ 'gbo 'dia- 'bebhiɛle 'yli "me. Lɔbhɔ 'ye -glukonya "kɛ 'ce -lɔ gluzɔ 'wlo zikpɛ 'na -ɛ -ka "kubhiɛ "me, "ne -anye, -a "kɛ "ce -lɔ kɔ 'bheliɔ-.

⁵³ "Naa-, -anyɛɛ ku -ye -a -kɛ -wɛ zu -ɛ "kɛ -lɔ zu "bhuɔ "ne 'ɛ "kɛ -lɔ ku -lele -ɛ -ka zu -wɛ "me 'ylile-, "ne 'ɛ ku -ɛ "kɛ "ku ne, kɔ 'ye 'ɛ "kɛ -lɔ 'bheliɔ- "ne 'ɛ -ka 'ce -la "ku gou.

⁵⁴ -Sɔɔdɛku lɔbhɔ "kɛ 'ce 'ylɛ, -anyɛɛ ku -ɛ "kɛ zu -wɛ kɛ kɔ 'bheliɔ- ne, 'ɛ -ka 'ce -la zu-. "Ne 'ɛ ku -ɛ "kɛ "ku -wɛ kɛ kɔ 'bheliɔ-, 'ɛ -ka 'ce -la "ku. Lɔbhɔ kɛ -ce -ylɛ, Lagɔ 'na weli -ɛ 'kɛleɔ "bɔgo "me -wɛ "kɛ 'ce -lɔ 'yli 'wlole. 'Ɛ ne lɛ: «'Wa "lu -gazoɛ 'to "me, 'kwiɛ "ne -la -le.»

⁵⁵ «'Eee, 'gazoɛ, -neɛ' 'wliku 'toɛ -dee 'ɛ -ko bha? 'Eee, 'gazoɛ, -dee -neɛ' 'pɔpɔli -ɛ lɔbhɔ 'nyakpa -wɛ -ko bhɔ?»

⁵⁶ 'Kwiɛ 'na 'pɔpɔli -noɔ -lɔ 'nyinyonoli yɛ, "ne 'nyinyonoli 'na 'bhɛloɛ -noɔ -lɔ -Lɔ yɛ.

⁵⁷ Zaa, -a -ya 'bhɛle Lagɔ -ɔ gbɔ "ne -a -to 'wli "ku Anyinɛnyɔ Zezu Kli me -wɛ.

⁵⁸ -Nyɔsɔ -a -wale 'wanye, 'a -tamale "me, -se 'anyɛɛ 'dlekukɛleɛ 'te "kɛ "me yɔle-! 'A no libhɔ -godogodo, -se 'a lɔbhɔ Anyinɛnyɔ "ku 'tee. 'A yibhlele- sɛ -gbɔ, 'a "kɔ "ku lɔbhɔ ne, 'a -na "fu lɔbhɔ.