1 Kolɛtenya 13 - Nouveau Testament bété de Gagnoa

-Waleɛ

¹ 'E kɛ 'se 'nyakpa 'na gbo gbɔ -ce, "ne 'e kɛ 'se "nɔgɔzilia 'na gbo gbɔ -ce. -Mɔ, 'e "mɔ -alua -wa ne, 'gbogboŋu 'nasɛ 'ye 'e -ko -lɔ, sɛgbɛɛ 'leyi -ye 'wa 'gbɔtɔ "ne 'ɛ 'sɛ 'kple -wɛ.

² 'E yi "guɔkwɔmenyɔ "zo -ce, "ne 'e yi -ɛ zizɔ- "ku yibhlele- -ce, "ne 'e yi -li 'klekle 'nasɛ yibhlele- -ce. "Ne 'neɛ 'dlekukɛleɛ kɛ 'kpɔ- "ne 'ɛ kɛ 'se tlo 'bhulɛ "me -sɛ -ce, -mɔ, 'e "mɔ -alua -wa ne, 'e "ne -bɛɛ' "me -ko!

³ 'E 'bhɛle- 'e "kɛ 'neɛ -li 'klekle 'nyakpa 'na -ye ŋɔŋo lɔbhɔ -wɛ 'dlialea-, "ne 'e 'bhɛle- 'e "kɛ 'neɛ ku -kosu 'glɛ 'tle-. -Mɔ, 'e "mɔ 'nyakpa 'na 'ŋwɛnɛ "me -kɛ, 'e -cɛ -bɛɛ' "me ylele-!

⁴ -Waleɛ "ɛ 'piɛ "bhle 'dle, -waleɛ 'nyakpa 'ye 'ɛ lɔbhɔ -lɔ "ku. -Mɔ, 'ɛ "ne no lɔbhɔzo, "ne 'ɛ "ne zia- 'ɛyi "ku, "ne 'ɛ "ne bha.

⁵ -Waleɛ' no zu -li. 'Ɛ 'gugwale- 'ɛyi 'dle "me, "ne 'ɛ "ne "pɔ 'kɛle, "ne 'ɛ "ne 'kulɛ- 'kɛle.

⁶ -Ɛ "ne "me 'ŋwinɛle- -wɛ za, 'ɛ "ne 'vluvlule- "me 'ŋwɛnɛ za, -mɔ, -ɛ -ko gbɛklɛklɛ -wɛ za, 'ɛ 'vluvlule -lɔ "me 'ŋwɛnɛ za.

⁷ -Waleɛ 'tale weli -yi, 'ɛ -kɛ -li 'klekle 'dleku, 'ɛ tɛle- 'dle, "ne 'ɛ 'tɛ- 'dle "ku.

⁸ -Waleɛ' 'bhiɛ -la "ku. -Mɔ, weli -ye 'wa bhulɛ Lagɔ 'na 'tɔ "me -wɛ yi 'ce 'nɛnidɛ yle. "Ne gbo -ye 'wa "ne -yi "ne 'wa bhulɛle "me -wɛ yi 'ce "kubhiɛ, "ne -li 'na yibhleleɛ yi 'ce "kubhiɛ.

⁹ "Naa-, -a "ne -li 'klekle -yi, "ne weli -ye 'wa bhulɛle Lagɔ 'na 'tɔ "me -wɛ "ne "klo -ŋwɛne.

¹⁰ -Mɔ, 'ɛ kɛ 'ce "klo -ŋwɛne 'klekle ne, -ɛ "ne "klo -ŋwɛne -wɛ yi 'ce "kubhiɛ.

¹¹ -Sɔɔdɛku, 'e -noɔ nɛ yu yɔ -wɛ, yu 'nasɛ 'ye bhulɛ nɛ -lɔ, "ne 'e 'pɔ nɛ -lɔ yu 'nasɛ 'dle, "ne yu 'nasɛ 'e libhi nɛ -lɔ -li "ku. -Dɛmeda, 'e "ne no -la yua -li, 'e -zo -la 'nyɔkpɔ "yitɔ zɛ.

¹² -Dɛmeda, -a "ne 'ye -li 'ylime 'tee, -a -gɛ 'yli sɛgbɛɛ 'pepleyi -ɛ "ne 'ye 'siɛ -wɛ "me 'ye -a 'wolo, -mɔ, lɔbhɔ kɛ "me -gwlɛ ne, -a yi 'ce 'ylime 'ye 'klo -nyɛ 'klo "bhaa. -Dɛme ne, 'e "ne -li 'klekle -yi, -mɔ, lɔbhɔ kɛ "me -gwlɛ, 'e 'yi 'ce yibhlele-, -see Lagɔ -yi -ame -wɛ.

¹³ -Dɛmeda, -li ta -ko -lɔ lɔbhɔ 'yiɛ. 'Dlekukɛleɛ, 'dletɛleɛ, "ne 'ŋwɛnɛmekɛleɛ. -Mɔ, 'ɛyi ta -kpɔ 'glɛme 'na -ɛ 'kpɔ -wɛ -noɔ -lɔ 'ŋwɛnɛmekɛleɛ yɛ.