1 Kolɛtenya 12 - Nouveau Testament bété de Gagnoa

Zuzu Wlewle 'na -ye 'ɔ 'nyɛ -wɛ

¹ -Nyɔsɔwanye, 'anye -noɔ 'klecɛnya 'waa -wɛ, Zuzu Wlewle 'na -ye 'ɔ 'nyɛ -wɛ, 'e "ne 'yɔbhɔ -gbɔ 'a 'to- 'ɛnɛɛ yibhlele- -ku.

² Bhlɛme, 'a "ne nɛ Lagɔ -yi. 'A -yi sɛ -gbɔ gu -ɛ "ne 'di gbo -wɛ 'na 'pɛɛ -wɛ "ku 'ye 'a -ko -me nɛ -lɔ, 'a "ne nɛ 'bhɛle- "ne 'a "koa nɛ 'ayi kɔ 'tɔtɔle-.

³ Ɛza 'e no -lɔ -gbɔ 'a yibhlele- sɛ: Lagɔ-zuzu kɛ 'nyɔkpɔ 'kwɛle, 'ɔɔ -ka no -gbɔ: «Zezu, Anyinɛnyɔ -bholo "ku.» 'Ɛ "mɔ Zuzu Wlewle 'na 'kwɛlekwɛleɛ yɛ ne, 'nyɔkpɔ -ka no -gbɔ: «Zezu, Anyinɛnyɔ yɔ.»

⁴ Zuzu Wlewle -yle -bholo "ne 'ɔ 'nyɛ -lɔ -jɔlo -kwleyi.

⁵ "Kulɔbhɔsɛ "ne muɔnɔ, -mɔ, Anyinɛnyɔ -bhele -wɛ yɔ -lɔ.

⁶ Nonoli "ne -bhele yɛ, -mɔ, Lagɔ -bhele -wɛ gbɔ -lɔ "ne 'ɛ noɔ -lɔ -ɔkɔkokɔko za.

⁷ 'Ɔkɔkokɔko -yle -ye Zuzu Wlewle 'nyɛ -wɛ, -se 'ɔ "kɛ Zuzu Wlewle 'na 'bhɛloɛ 'nyakpa 'ylime tua, -se 'ɛ "kɛ Lagɔgligbɛ kwɛle-.

⁸ Zuzu Wlewle 'nyɛ -ɔne -jɔlo -se 'ɔ "kɛ "nanesɛ bhulɛ, "ne 'ɔ 'nyɛ -ɔwɛ -jɔlo -se 'ɔ "kɛ gbɔ -se 'nyakpa "kɛ Lagɔ yibhlele-.

⁹ "Ɛ Zuzu Wlewle -bhele -wɛ 'nyɛ 'lelee -ɔwɛ 'dlekukɛleɛ. "Ne -ɔwɛ Zuzu Wlewle gbɔ "ne 'ɔ 'yamalea 'gwizinya.

¹⁰ 'Nyɔkpɔ 'na -ɔwɛ 'bhɛle- 'ɔ "kɛ zɛzɛ "pɔ, -ɔwɛ 'bhɛle- -se 'ɔ "kɛ Lagɔ 'na 'tɔ "me bhulɛle-, -ɔwɛ -yi zuzu 'na "me -seseliasɛ. 'Ɔwɛ -yi gbo 'klekle 'na -ɛ "ne -yiɔ -wɛ 'na "me bhulɛlesɛ, "ne -ɔwɛ -yi 'ɛnɛɛ zɔsɛsɛ.

¹¹ -Mɛ -ɛwɛ 'klekle, Zuzu Wlewle -bhele -wɛ gbɔ -lɔ "ne "ɛ -li -wɛ 'wɔ noɔ -lɔ. Zuzu Wlewle 'dlile -lɔ -ɔkokɔkɔko -jɔlo -see 'ɔ -wa -wɛ.

'Klecɛnya 'klekle 'na ku -yle -bholo

¹² 'Nyɔkpɔ 'na ku -yle -bholo. -Mɔ, 'ɛ -ko "ɛ soɔ, "ne 'ɛ ku 'na 'cibhi zu. 'Ɛ zu "ɛ soɔ, -mɔ "ɛ 'cibhi -wɛ 'klekle "zo -lɔ ku -bholo. "Ɛ soɔ 'ye Klise -ko me -lɔ.

¹³ Zufonya, Glɛkenya, 'juyua, "ne -wa -yele kɔ -wɛ "bhaa "ne -a -yle -lɔ batɛme Zuzu Wlewle 'ɔyikɔ "me, "ne -a yi -lɔ ku -bholo -kpee "zo. "Ɛ Zuzu -bholo -wɛ 'na 'ŋuwli 'ye -a 'nɔmɔle- -lɔ 'gɔme 'klekle.

¹⁴ "Naa-, ku "ne 'se 'cibhɛ -bholo -kpee yɛ. 'Ɛnɛɛ 'cibhi zu.

¹⁵ Bho kɛ nɛ no -gbɔ: «-Ame, 'e "ne -kɛ sɔ yɛ, zaa, 'e "ne kɛ ku 'na 'cibhɛ yɛ.» -Mɔ 'ɛ -ko sɔbhɔ "ne 'ɛ -noɔ -me "ɛ ku 'na 'cibhɛ yɛ.

¹⁶ ''Yukwli kɛ 'lelee no -gbɔ: «-Ame, 'e "ne -kɛ 'yli yɛ, zaa, 'e "ne -kɛ ku "me -ko -me.» -Mɔ 'ɛ -ko "ɛ soɔ, "ne "ɛ 'yli -noɔ -me -lɔ ku 'na 'cibhɛ yɛ.

¹⁷ Zaa, ku 'klekle kɛ nɛ 'yli yɛ, -see -a kɛ nɛ bhɔ gbo 'no 'a? "Ne ku 'klekle kɛ nɛ 'yukwli 'ɛyikɔ yɛ, 'de -a "kɛ nɛ bhɔ 'ŋoni "fɛle -a?

¹⁸ -Mɔ, -see Lagɔ 'yɔbhɔ -wɛ, sɔbhɔ 'ye 'ɔ "zo -lɔ "ɛ 'cibhi -wɛ 'wɔ ku "me 'bhlobhlo.

¹⁹ 'Ɛyi 'klekle kɛ nɛ 'cibhɛ -bholo yɛ, ku "ne la -le.

²⁰ Zaa, ku 'na 'cibhi zu, -mɔ, ku -bholo -kpee 'ye 'ɛ -yle -lɔ.

²¹ 'Yli -ka sɔ bhulɛle- -gbɔ: «'E "ne 'yɔbhɔ -eyi!» "Ne 'wli -ka 'bhowɔ bhulɛle- nɛɛ: «'E "ne 'yɔbhɔ 'anye!»

²² Zaagbɔ, ku 'na 'cibhi -ye -a 'wolo "ku -gbɔ 'ɛ "ne -bɛɛ' "me ko -wɛ, 'ɛyi 'ye -a 'yɔbhɔ -lɔ -tia.

²³ Ku 'na -dee -a "zo -tia "klokpɛ "me -wɛ 'ye -a -su -lɔ pɛtɛpɛtɛ. Ku 'na -dee -le -anye 'zu "ku -wɛ 'ye -a -su -lɔ 'tee.

²⁴ -Anyɛɛ ku 'na 'cibhi 'na -ye 'wa "kɛ "ku wolo -wɛ, -anyɛɛ gbo "ne "klo -ko, 'ɛza, Lagɔ -no -lɔ ku -se 'cibhɛ 'na -ye -a "ne "zo 'plome kpɛnyee -wɛ kɛ 'plome zoɔ kpɛnyee.

²⁵ Zaa, ku "ne "me 'dliɔdliɔle-. -Mɔ, Ku 'nabhɛ 'kwɛle 'ye 'ɛ 'kwɛlekwɛlele -lɔ.

²⁶ Ku 'na dɛ -bholo kɛ 'gbape, moɔ 'klekle 'gbape me -lɔ. Ku -cibhɛ nɛɛ -wɛ kɛ 'ŋwɛnɛ no, -ɛwɛ 'klekle nome 'ɛ nome -lɔ.

²⁷ 'Anye, Klise 'na ku 'ye 'a -noɔ -lɔ, "ne -ɔkɔkokɔko -noɔ -lɔ "ɛ Klise 'na ku -wɛ 'na 'cibhɛ yɔ.

²⁸ Lagɔgligbɛ "me 'na 'tɛtɛnoa -ye Lagɔ 'nyɛ 'glidɛ -wɛ 'pa- -lɔ "kɔlepɔnya, "sɔɔnoa 'pa -lɔ "guɔkwɔmenya, tanoa 'pa -lɔ -wa 'sloa Lagɔweli -wɛ. "Ne 'nyakpa 'na -wa "pɔ zɛzɛ -wɛ -ko -lɔ lɔbhɔ, 'Wayi 'ye -wa 'yamalea 'nyakpa -wɛ 'pe- -lɔ keyi. 'Nyakpa 'na -wa 'kwɛle 'walua -ko, 'nyakpa -wa sloa 'walua 'tee 'na -gwe 'dɛ 'pe- -lɔ lɔbhɔ, "ne 'nyakpa 'na -wa gbɔ gbo 'na -ɛ "ne -yiɔ -ko -me lɔbhɔ.

²⁹ 'Wayi 'klekle "ne "kɔlepɔnya 'waa, 'wa "ne "guɔkwɔmenya 'waa, 'wayi 'klekle -na 'sloa- "ne 'wayi 'klekle -na zɛzɛ "pɔ.

³⁰ 'Wayi 'klekle -na 'nyakpa yamalea-, 'wayi 'klekle -na gbo -ɛ "ne -yiɔ -wɛ gbɔ, "ne 'wayi 'klekle -na gbo zɔ -sɛ.

³¹ 'A tɛle- -jɔlo 'na -ɛ 'nɛne "ne -ɛ 'zi "ku -wɛ 'siɛ! -Mɔ, -dɛmeda, 'e "kɛ 'anye -gwe 'na -ɛ zi "ku -wɛ 'dɛ 'sloa-.