1 Kolɛtenya 11 - Nouveau Testament bété de Gagnoa

¹ 'A 'didale- -ame, -see -ame 'nabhɛ 'e 'didale Klise -wɛ.

'Ŋwenea -nyɛ 'widia "bhaa 'na "me plasɛ bɔbɔzle

² -Nyɔsɔwanye, 'e bhɛle 'anye libhɔ za: "Naa-, 'a 'pɔ -ame "ku 'dle -godogodo, "ne -ye 'e -sloa 'anye -wɛ, 'a -gɛlele 'tee.

³ "Naa-, -ame, 'e 'yɔbhɔ -gbɔ 'a 'no -ɛne "me: -Ɔkɔkokɔko 'na "cifi -noɔ -lɔ Klise yɔ, "ne 'ŋɔnɔ 'na "cifi -noɔ -lɔ 'widi yɔ, "ne Lagɔ -noɔ -lɔ Klise 'na "cifi yɔ.

⁴ 'Widi 'na -ɔ 'bhubhɔ Lagɔ, "ne 'ɔnɛɛ -ɔ bhulɛle Lagɔ 'na 'tɔ "me kɛ wli bubɔ- ne, 'ɔnɛɛ "cifi 'ye 'ɔ "zo -lɔ 'plome.

⁵ -Mɔ, 'ŋɔnɔ 'na -ɔ bhubhɔ "ne 'ɔnɛɛ -ɔ bhulɛle Lagɔ 'na 'tɔ "me "mɔ 'wli -bhlele ne, 'ɔnɛɛ "cifi 'ye 'ɔ "zo -lɔ 'plome. 'Ɔ -ko sɛgbɛɛ 'ŋɔnɔ 'na -ɔ -tlu lɛ 'wli ne.

⁶ Zaa, 'ŋɔnɔ "mɔ 'wli -bhlele ne, 'ɔ tlu 'wli! "Ɛ 'ŋɔnɔ kɛ 'lelee -no -gbɔ "ɛ 'wlitluɛ -nyɛ 'nyikudiɛ "bhaa -lo 'zu "ku ne, -ɔ bhlele- 'wli.

⁷ "Naa-, 'nyɔkpɔ -noɔ -lɔ Lagɔ 'na didale yɔ, "ne 'ɔ -noɔ -lɔ Lagɔ 'na 'ŋlu yɔ. Zaa, 'ɔ -ka -la 'wli bubɔ-. "Ne 'ŋɔnɔ -noɔ -lɔ 'widi 'na 'ŋlu yɔ.

⁸ Zikpɛ 'na 'wlɛwlɛ dɛku, 'ŋɔnɔ 'na 'gbɛcewlɛkwɛ 'ye Lagɔ "ne "ku libhi- "ne 'ɔ kɛ 'widi -no, -mɔ, 'widi 'na 'gbɛcewlɛkwɛ 'ye 'ɔ libhi- -lɔ "ku "ne 'ɔ yi -lɔ 'ŋɔnɔ no.

⁹ "Ne Lagɔ "ne 'widi 'wlɛ- 'ŋɔnɔ za, -mɔ, Lagɔ 'wlɛ- 'ŋɔnɔ 'widi za.

¹⁰ 'Ɛza, "nɔgɔzilia 'na 'tɔ "me, 'ŋɔnɔ "kɛ -lɔ 'wli bhlele-. 'Ɛyi -wɛ gbɔ -lɔ -gbɔ 'ɔ -kɛ 'kamalenyɔ.

¹¹ Anyinɛnyɔ "me, 'ŋɔnɔ "mɔ -le, 'widi "ne -le, "ne 'widi "mɔ -le, 'ŋɔnɔ "ne -le.

¹² "Naa-, 'ŋɔnɔ, 'widi "me 'ye 'ɔ 'bhale -lɔ. "Ne 'ŋɔnɔ 'ɔ gbɔ -lɔ "ne 'widi yi -lɔ zikpɛ "ku, -ɛwɛ 'klekle Lagɔ "me 'ye 'ɛ 'bhale -lɔ.

¹³ 'Ayigɛsɛ 'nabhɛ 'a 'wolo- 'se "ku, 'ŋɔnɔ "mɔ 'wli -bhlele "ne 'ɔ kɛ Lagɔ bhubhɔ, 'ɛ 'nɛne bha?

¹⁴ -See Lagɔ 'wlɛ- 'nyɔkpɔ -wɛ 'tua 'anye 'ylime -gbɔ 'widi kɛ 'nyi 'na -ɛ tlo -wɛ 'wli -su, 'zu "ku 'ɛ -le -lɔ.

¹⁵ 'Ŋɔnɔ kɛ 'nyi 'na -ɛ tlo -wɛ 'wli -su, "ɛ -noɔ -lɔ 'ɔnɛɛ nanoɛ yɛ, "naa-, Anyinɛnyɔ 'nyɔ- "ɛ 'nyi -ɛ tlo -wɛ -se 'ɛ "kɛ 'ɔnɛɛ 'wli "ku 'wale-.

¹⁶ Zaa, 'nyɔkpɔ kɛ -no -gbɔ 'ɔ kɛ 'ɛnɛɛ weli "ku 'kpɛle- ne, -anye, 'ɛ "ne -kɛ 'anyɛɛ nosɛ yɛ, "ne Lagɔgligbɛ 'na dɛku, bhɔ -kɛ 'lelee!

-See Kolɛte 'na Lagɔgligbɛ "me 'na konya li 'wanɛɛ "kuzalilɛ -wɛ

¹⁷ -Ye 'e "kɛ 'anye bhulɛle- "ne nyɔ za 'e -ka 'anye 'kwɛme "tamalea -noɔ -lɔ -gbɔ 'a "kɛ 'wli "zo ne, 'ɛ "ne kɛ -gbɔ 'a "kɛ 'tee ko yɛ, -mɔ, "nyɛnye 'ye 'a zimalea -lɔ "ku 'anyɛɛ zikpɛ "me.

¹⁸ -Ye 'wa -bhulɛle -ame, "ne 'e 'cɛ 'dleku -noɔ -lɔ nɛɛ: 'A kɛ 'wli "zo-, "me 'dliɔdliɔleɛ -ko 'anye 'glɛme.

¹⁹ 'Ɛ -ŋwa sɔbhɔ, -ye "me 'dliɔdliɔleɛ -ko 'anye 'glɛme -wɛ, 'ɛ dɛku, 'a yi 'siɛ 'wolo- 'tee, "ne -a "kɛ -lɔ 'anyɛɛ 'glɛme 'na -wa -noɔ 'klecɛnya 'gbaa 'waa -wɛ yibhlele-.

²⁰ Zaa, 'a kɛ 'wli "zo ne, Anyinɛnyɔ 'na "kuzalilɛ 'na li za 'ye 'ɛ "ne -noɔ.

²¹ "Naa-, 'a kɛ 'wli "zo- -gbɔ 'a kɛ li ne, -ɔkɔkokɔko libhi 'ɔyigɛsɛ 'na lilɛ "ku "ne 'ɔ 'pulɔ lili -ku, lɔbhɔ 'na dɛku -bedia lilɛ 'lɔbhoa "ne ŋɔŋo lɔbhɔ -wawɛ.

²² 'Anye, 'a "ne bhɔ -bhudu 'na me 'a "kɛ lile- "ne me 'a "kɛ 'nɔmɔle -wɛ -ka 'a? -Mɔ, 'a "kɛ 'nyakpa 'na -wa "ne lili -bɛɛ' -kɛ -wɛ zu 'labha- Lagɔgligbɛ 'ye 'a -na bhɔ 'dii ziɛ- 'a? -See 'e "kɛ bhɔ 'anye bhulɛle-? 'E yi bhɔ soɔ 'anye 'bhɛle-. 'Bhɔ, 'ɛ kɛ -soɔ yɛ ne, 'e -ka 'anye 'bhɛle gou.

Pɔle -sloa -see 'wa kɛ Anyinɛnyɔ 'na "kuzalilɛ li -wɛ

²³ 'A -gɛ 'yli, gbagbɛ -ye Anyinɛnyɔ -sloa -ame, "ne 'e -sloa -me 'anye ne lɛ: "Ɛ 'sabo -wɛ "me -dee 'wa "kɛ Anyinɛnyɔ Zezu 'ple -ka me -wɛ, 'ɔ libhi- "fɔlɔ "ku.

²⁴ "Ne 'ɔ yi -lɔ Lagɔ bhɛle-, "ne 'ɔ yi -lɔ "ɛ "fɔlɔ -wɛ "me 'didile-. 'Ɔ nɛɛ: «-Ɛne, 'neɛ ku yɛ -lɔ, 'ɛɛ -noɔ -me 'anye -nɛ yɛ. 'A kɛ soɔ no ne, 'a "pɔ -ame "ku 'dle.»

²⁵ 'Wa -li lɛ "bhuɔ ne, "ɛ sɛbhele -wɛ Anyinɛnyɔ yi -lɔ 'leylislɔ "ku 'libhi "ne 'ɔ yi -lɔ no nɛɛ: «"Ɛ 'leylislɔ ne, Lagɔ 'na 'mɛneleslɔ lelee yɛ -lɔ, sɛko -wɛ 'neɛ 'dlu slu- 'siɛ 'anyɛɛ za. Zaa, -see 'a 'nɛmɛ 'ce 'yiɛ -wɛ, 'a "pɔ 'ce -ame "ku 'dle.»

²⁶ "Naa-, -see -a li 'ce "ɛ "fɔlɔ 'yiɛ "ne -a 'nɔmɔle 'ce 'leylislɔ "me -wɛ, Anyinɛnyɔ 'na 'kwiɛ 'na 'de 'ye -a sɛ 'ce -lɔ -kaa 'ɔnɛɛ yiyiɛ.

²⁷ Zaa, -ɔ "ne Anyinɛnyɔ 'na "fɔlɔ 'na li -sɛ -kɛ, "ne -ɔ "ne 'leylislɔ "me 'na 'nɔmɔle -sɛ -kɛ, "ne -ɔ no -wɛ, Anyinɛnyɔ 'na dlu -nyɛ 'ɔnɛɛ ku "bhaa 'na 'gbo -ko keyi.

²⁸ 'Ɛnɛɛ za, -ɔkɔkokɔko "kɛ -lɔ 'ɔnɛɛ zikpɛ 'na -see 'ɔ -su "ku -wɛ "me 'wlole- -vlee, 'ɔ -gba "kɛ "fɔlɔ li, "ne 'ɔ -gba "kɛ no 'nɔmɔ, 'ɔ "kɛ -da li -se 'ɔ "kɛ -da 'nɔmɔ.

²⁹ "Naa-, -ɔ li "ne -ɔ 'nɔmɔ "ne 'ɔɔ' yibhlele- -gbɔ "ɛ "fɔlɔ -wɛ Anyinɛnyɔ 'na ku yɛ -wɛ, "ne 'ɔ li "ne 'ɔ 'nɔmɔ, sɔbhɔ 'na nyɔ -wɛ Lagɔ 'na 'kɛle 'ye 'ɔ lale -lɔ 'ɔyi "ku.

³⁰ 'Ɛza, 'gbapegbapenya "ne 'gwizinya -zu -lɔ 'anye 'glɛme, "ne -vu 'ya -lɔ "ku.

³¹ -A -kɛ -anyɛɛ -kosɛ "me 'wlole ne, Lagɔ -ka -anye 'gbobhlele-.

³² -Mɔ, Anyinɛnyɔ -kɛ -anye 'gbobhlele ne, -a "kɛ "me 'je za yɛ -lɔ, -se Lagɔ te -kɛ -anye -jiɛ "me 'pɔ zikpɛ -konya 'nasɛ.

³³ Zaa, -nyɔsɔwanye, 'a "kɛ 'wli "zo- -gba 'a "kɛ Anyinɛnyɔ 'na "kuzaliliɛ li ne, 'a 'nonole- "ku "me.

³⁴ 'Nyɔkpɔ ŋɔŋo kɔ 'lɔbhɔ ne, 'ɔ li 'ɔnɛɛ sueme, 'ɛ dɛku, 'a kɛ 'wli "zo ne, "ne Lagɔ -ka -lɔ 'anye 'gbobhlele-, weli 'na -ɛ 'to "bhle -wɛ 'na dɛku -zle 'e -kɛ 'ce -yi, 'e 'cɛ 'bhle.