1 Kolɛtenya 10 - Nouveau Testament bété de Gagnoa

Izlayɛleyua 'na -see 'wa 'nɔŋo- 'kɔsɛku ne lɛ

¹ -Nyɔsɔwanye, -ɛ -yle 'a 'to 'wa 'to 'wɔ Moyize 'na "tɛnye "me -wɛ, 'e 'yɔbhɔ -gbɔ 'e "kɛ lɔbhɔ 'anyɛɛ 'dle 'sibha-. 'Nɔgɔjatlɛ 'waloa- "ku 'klekle, "ne 'wa yi -lɔ jinyɛ -zɛle "to 'klekle.

² 'Moyize "bhaa 'na "kukoleɛ "me, 'wa -ylele -lɔ batɛme 'nɔgɔjatlɛ "me, "ne jinyɛ "me.

³ 'Wayi 'klekle, 'wa -li Lagɔ 'na lilɛ -bhele.

⁴ 'Wa 'nɔmɔ- Lagɔ 'na 'ŋu -bhele 'klekle. "Naa-, 'ŋu -ɛ 'bhale Lagɔ 'sɛku 'tiyi "me "ne 'ɛ -gɛloa nɛ -wɛ, 'wa 'nɔmɔ- -lɔ, "ɛ 'tiyi -wɛ Klise 'na zuzu yɛ nɛ -lɔ.

⁵ "Ɛ -ko sɔbhɔ, "ne 'wanɛɛ 'glɛme 'na 'kwleyi "ne -ɛ "kɛ Lagɔ -gɛ 'namale- -wɛ no, 'ɛnɛɛ za 'wa "kule- -lɔ 'kɔsɛku.

⁶ "Ɛ -li -wɛ 'wɔ -ylɛle "ɛ soɔ, -se 'a 'cɛ "ku 'wolo-, -se -anyɛɛ 'dle te -kɛ "nyɛnyenodɛ 'plele sɛgbɛɛ -a 'to 'wa 'to 'wɔ.

⁷ 'A te -kɛ gu -wɛ 'wɔ 'bɔbɔ-, -see 'wanɛɛ 'glɛme 'na -bedia 'sɛ- -wɛ. Lagɔbɔgo -bhulɛ nɛɛ: «'Nyakpa 'gli- -duku "ne 'wa yi -lɔ li, "ne 'wa yi -lɔ "nɔmɔ. 'Ɛ 'bha- lɛ -doɔ ne, 'nyakpa 'sɔ- "ku "ne 'wa yi -lɔ ye.»

⁸ -A te 'se -wa -li "tutu -wɛ 'na soɔ ko, -see 'wanɛɛ 'glɛme 'na -bedia sɛ- -wɛ. 'Ɛza, -wa "kule- 'kɔsɛku 'yli -bholo -kpee -wɛ -yle -lɔ -gɛmɛnɛ -wlulu -glo -bholo 'wlulu ta (23.000).

⁹ Zaa, 'a te 'se Klise vɔvɔ-, -see 'wanɛɛ 'glɛme 'na -bedia 'sɛ- 'awɔ -wɛ, "ne 'tɛbhea yua 'wɔ nimi "ne 'wa yi 'awɔ "ku -wɛ.

¹⁰ -A te 'se "me 'ŋuŋwɔŋuŋwɔle-, -see 'wanɛɛ 'glɛme 'na -bedia 'sɛ- 'awɔ -wɛ, "ne "nɔgɔzilɔ -ɔ 'lɔbhɔ 'nyakpa yua 'lɔbhɔ -wɛ.

¹¹ "Ɛ -li -wɛ 'wɔ -yle -a 'to 'wa 'to 'wɔ, -se -a 'cɛ "ku wolo -se -anyɛɛ 'dle te -kɛ "nyɛnyenodɛ 'plele. 'Wa kɛle- -se 'ɛ "kɛ -anye 'luɔ, -anye -wa -ko zikpɛ 'na "kubhiɛ "tɛnye "me -wɛ.

¹² 'Ɛza, -ɔ no -gbɔ "me 'ye 'ɔ 'tɛ- 'dlekukɛleɛ "me -wɛ "kɛ -lɔ 'ɔyi "ku 'luɔle- -se 'ɔ te -kɛ 'nyinyonoli "me 'bhlile-.

¹³ Sata 'na -see 'ɔ 'bea- 'anye "me -wɛ sɔbhɔ 'ye 'ɔ 'bea me -lɔ 'nyakpa 'klekle "me. "Naa-, Lagɔ 'bha- 'ɔnɛɛ weli "ku, zaa, 'ɔɔ -kɛ 'anye "yi 'tale- "ne Sata "kɛ 'anye "me 'bea "ne 'ɛ "kɛ lɔbhɔ 'ple, Sata "kɛ 'anye "me 'bea ne, Lagɔ yi 'anye 'kwɛmetamaleɛ 'nyɛ, "ne 'a -ka "mebeamɔ 'bhlile-. "Ne 'a yi nu 'po.

'Klecɛnya te -kɛ gu bɔbɔ

¹⁴ -Nyɔsɔwanye, 'a 'ylialea- 'ayi gu -wɛ 'wɔ 'na bɔbɔbɔbɔbɛɛ "guɔ gou!

¹⁵ 'E bhulɛle 'anye -see 'wa bhulɛle 'ylimeyamalenya -wɛ. 'Ayigɛsɛ, 'a 'glole- "ɛ -ye 'e -bhulɛle 'anye ne 'dle.

¹⁶ -Sɔɔdɛku, -a li Lagɔ 'na lilɛ -wɛ 'Leyli 'slɔ nyɔ za -a 'bhɛle Lagɔ "ne -a "nɔmɔ -wɛ "ɛ -na bhɔ gbɔ "ne Klise 'na dlu "bhaa -a "ne bhɔ "ku -kole. "Ne "fɔlɔ -ye -a 'didile "me "ne -a li -wɛ "ɛ -na bhɔ gbɔ "ne Zezu 'na ku "bhaa -a "ne bhɔ "ku -kole.

¹⁷ -See "fɔlɔ -yle -bholo "ne -a lile 'gɔme -wɛ, sɔbhɔ -anyɛɛ ku -yle me 'lele -lɔ -bholo. "Naa-, "fɔlɔ -bholo -wɛ 'ye -a li -lɔ zɛ.

¹⁸ 'A 'wolo- 'se izlayɛleyua "ku. -Wa -li bɔbɔledɛ "me 'na nɛmɛ -ye 'wa -bɔbɔle -wɛ, 'wa -nyɛ Lagɔ "bhaa 'wa -kole "ku.

¹⁹ -Se 'e no bhɔ -gbɔ 'e "kɛ lɛ 'a? Sɛne 'e no bhɔ -gbɔ nɛmɛ -ye 'wa -bɔbɔle gu -wɛ -ko bhɔ -bɛɛ' "me 'a? -Mɔ, "ɛ gu -wɛ 'wɔ -ko bhɔ -bɛɛ' "me 'a?

²⁰ 'Bhɔ! -Mɔ, sɛne 'e no -lɔ -gbɔ "ɛ bɔbɔli -wɛ, zuzu -nyɛnyea 'wa 'je -lɔ kɔ, -mɔ, Lagɔ 'wa -nɛ kɔ 'je. Zaa, 'e "ne 'yɔbhɔ -gbɔ 'a -nyɛ zuzu -nyɛnyea "bhaa -kole "ku.

²¹ "Naa-, 'a "ne 'bhɛle- "ne 'a "kɛ Anyinɛnyɔ 'na 'leyli 'slɔ "me "nɔmɔle, "ne 'a "kɛ zuzu -nyɛnyea 'na 'slɔ "me "nɔmɔle. 'A "ne 'bhɛle- "ne 'a "kɛ Anyinɛnyɔ 'na lilɛ li, "ne 'a "kɛ 'lelee zuzu -nyɛnyea 'na lilɛ li.

²² Lɔbhɔ 'na dɛku, Anyinɛnyɔ 'ye 'a 'yɔbhɔ bhɔ -gbɔ 'ɔ no lɔbhɔzo? -A 'tɛ- bhɔ "me "ne 'a 'zu "ku -a?

'A 'kwa- Lagɔ 'ŋlu 'anyɛɛ nonoli 'klekle "me

²³ -Bedia nɛɛ: «-Li 'klekle yi noɔ.» 'Diɛɛ, -mɔ, 'ɛyi 'klekle "ne 'ɛ -na -anye -li 'na -li 'wli no. -A yi -li 'klekle no, -mɔ, 'ɛyi 'klekle -gba "kɛ -anyɛɛ 'dlekukɛleɛ "ku zimalea-.

²⁴ 'Nyɔkpɔ 'ɔ te 'ɔyi 'dle "me 'gugwɔle-, -mɔ, 'ɔ "pɔ me 'lelee 'ɔlua "ku 'dle.

²⁵ -Li 'klekle -ɛ -ko 'pɔloku -wɛ, 'ɛ kɛ 'se nɛmɛ yɛ -ce, 'dlebhɛ te 'anye lɔbhɔ, -mɔ 'a 'li.

²⁶ "Naa-, sɛne Lagɔbɔgo no -lɔ nɛɛ: Dodo, "ne -ɛ -ko "ɛ dodo ne "ku 'klekle -wɛ, Anyinɛnyɔ 'bhe- -lɔ.

²⁷ 'Nyɔkpɔ -ɔ "ne Lagɔ 'dleku -kɛ -wɛ "kɛ 'anye lilɛ "ku lale-, 'a 'ŋunu 'ɔnɛɛ laweli "ku, -se -ye 'ɔ "kɛ 'anye kɔ 'je 'klekle -wɛ, 'a li, -mɔ 'a te lo 'yɔbhɔ, -se 'dlebhɛ te 'anye lɔbhɔ.

²⁸ -Mɔ, 'a -gba 'a "kɛ li, "ne 'nyɔkpɔ "kɛ 'anye 'yukwli 'fete "me -sɛ -gbɔ gubɔbɔlenɛmɛ yɛ, 'a te li. -Ɔ -sɛ 'anye 'yukwli 'fete "me za, -se 'dlebhɛ te 'anye 'lɔbhɔ.

²⁹ 'E kɛ 'dlebhɛ 'na weli bhulɛ ne, 'anyɛɛ 'dlebhɛ 'na weli 'ye 'e -na bhulɛ, -mɔ, 'ɔce -nɛ 'ye 'e bhulɛ -lɔ. Sɔɔbɛɛza, 'ɔnɛɛ 'dlebhɛ 'na weli "kɛ bhɔ gbɔ "ne -ye 'e 'yɔbhɔ -gbɔ 'e "kɛ no -wɛ, 'e 'cɛ no 'a?

³⁰ 'E kɛ Lagɔ bhɛle- lilɛ -ye 'e li -wɛ za ne, sɔɔbɛɛza, 'wa "kɛ bhɔ 'neɛ 'tɔ nyimɔ lilɛ -ye 'e li -wɛ za 'a?

³¹ Zaa, 'a kɛ li, "ne 'a kɛ "nɔmɔ, "ne -bɛɛ' 'na -ye 'a "kɛ no, 'a 'nole- 'ɛyi 'klekle Lagɔ 'na 'ŋlukwɛɛ "me.

³² 'A te 'nyɔkpɔ 'nyinyonoli "me 'sile 'anyɛɛ nonoli 'klekle "me zufonya, glɛkenya "ne Lagɔgligbɛ 'nabhɛ.

³³ 'A 'no- 'neɛ -ye 'e -no -wɛ! Sɛko -wɛ, 'neɛ nonoli "me, 'e 'tɔtɔle kɔ -se 'e "kɛ 'wayi 'klekle -gɛ 'namale-. 'E -na -kɛ no -gbɔ 'e "kɛ 'ayi 'dle "me 'gugwɔle-. -Mɔ, 'nyakpa -kwleyia -nɛ 'ye 'e "zo -lɔ 'wli, -se 'wa "kɛ -kɛ 'po.