1 Kolɛtenya 1 - Nouveau Testament bété de Gagnoa

Pɔle 'na bhɛleweli

¹ -Ame, Pɔle, -ɔ "zo- Zezu Kli 'na "kɔlepɔnyɔ -see Lagɔ 'yɛbhɛ -wɛ, 'e -nyɛ -a "nɔwli Sɔsetɛne "bhaa,

² -anye kɛle- lɛ Lagɔgligbɛ -ɛ -ko Kolɛte -wɛ "ku, "ne Lagɔ "zoa- 'wlewle Zezu Kli "me -wɛ, "ne -ye Lagɔ la -se 'wa "kɛ 'wlewle ko, "ne -wa "tule Anyinɛnyɔ Zezu Kli 'na 'tɔ "me moɔ 'klekle -wɛ "bhaa, -ɔ -noɔ 'wanɛɛ "Bhenyɔ "ne -anyɛɛ "Bhenyɔ yɔ -wɛ,

³ -a To Lagɔ "ne Anyinɛnyɔ Zezu Kli "pɔ 'anye 'ŋu, -se 'ɔ "nyɛ 'anye "kuwɛtɛ!

Pɔle bhɛle Lagɔ

⁴ 'E "ne 'diɔle- Lagɔ 'na 'bhɛlebhɛle -za 'anyɛɛ 'tɔ "me, -see 'ɔ -no 'anyɛɛ -li 'na -li 'wli Zezu Kli 'na 'tɔ "me -wɛ za.

⁵ "Naa-, 'ɔyi "me, Lagɔ 'nyɛ- 'anye -klɔgbɔ 'klekle, bhulɛweli 'klekle, "ne -li 'klekle 'na yibhlelesɛ.

⁶ 'Wa -sɛle 'anye Klise 'na 'de "ne 'a -cɛle 'dleku 'kwɛmetamaleɛ "me.

⁷ -Dɛme 'na dɛku, Lagɔ 'na -bɛɛ' "kɛ 'anye kɔ 'bɔ, 'anye -wa -wo Anyinɛnyɔ Zezu Kli 'na yiyiɛ -wɛ.

⁸ 'Ɔɔ "kɛ -lɔ 'anye 'kwɛme "tamalea- -kaa "ne 'ɛnɛɛ 'wlisɛledɛ "kɛ -lɔ ylɛ. -Se Anyinɛnyɔ Zezu Kli 'na yizle, 'nyɔkpɔ 'te "kɛ 'anye 'nuɔ sɔbhɔ.

⁹ Lagɔ -ɔ la- 'anye -gbɔ 'ɔ Yowli, Anyinɛnyɔ Zezu Kli "bhaa 'a "kɛ "ku kole -wɛ, 'ɔ "ne 'bhelia- weli kɔ.

Kolɛte 'na Lagɔgligbɛ -dliɔdliɔle "me

¹⁰ -Nyɔsɔwanye, 'e 'bhubhɔ 'anye Anyinɛnyɔ Zezu Kli 'na 'tɔ "me -gbɔ 'a bhulɛ- sɛbhele 'klekle. -Se 'a te "me 'dliɔdliɔle-! -Mɔ 'a kole "ku, -se 'a kɛle "wugɔŋo -bhele, 'ɛ -nyɛ 'dlepɔsɛbhele "bhaa.

¹¹ "Naa-, -nyɔsɔwanye, Kloe 'na -gligbɛ "ku 'na 'nyakpa -bhulɛle -ame -gbɔ 'a 'diɔle "me.

¹² Zaa, -ye -ɔkɔkokɔko bhulɛ ne lɛ: -Ɔwɛ bhulɛ 'ɔnɛɛ 'sɛ, "ne -ɔwɛ bhulɛ 'ɔnɛɛ 'sɛ. -Ɔwɛ nɛɛ: «-Ame, Pɔle -nɔ 'ye 'e -noɔ -lɔ.» "Ne -ɔwɛ nɛɛ: «-Ame, Apolɔse -nɔ 'ye 'e -noɔ -lɔ.» "Ne "sɔnɔ -wɛ nɛɛ: «-Ame, Sefase -nɔ 'ye 'e -noɔ -lɔ.» "Ne ɔnɛɛ -vinɔ -wɛ no -lɔ nɛɛ: «-Ame "neɛmɔ, Klise -nɔ 'ye 'e -noɔ -lɔ.»

¹³ 'A 'pɔ bhɔ 'dle -gbɔ Klise "me 'ye 'ɔ 'dliɔdliɔle- bha? -Ame Pɔle 'wa -kole bhɔ klowa "klo 'anyɛɛ 'tɔ "me -a? Pɔle 'na 'tɔ "me 'wa 'nyɛ- bhɔ 'anye batɛme -a?

¹⁴ 'E bhɛle Lagɔ, -see 'e "ne -kɛ 'anyɛɛ 'glɛme 'na -bholo batɛme 'nyɛ-, 'ɛ "mɔ -kɛ Klisepuse -nyɛ Gayuse "bhaa 'waa.

¹⁵ Zaa, 'nyɔkpɔ -ka no -gbɔ 'neɛ 'tɔ "me 'wa 'nyɛɔ -lɔ batɛme.

¹⁶ 'Diɛɛ, 'e 'nyɛ- Setefanase 'na -bhudu "me 'na 'nyakpa batɛme. 'Ɛ 'bhale- lɛ doɔ, 'e "ne 'dleku -kɛ -gbɔ 'e 'nyɛ 'nyɔkpɔ 'na -vinɔ batɛme.

¹⁷ "Naa-, Klise "ne -ame 'lebhe- -gbɔ 'e yi -se 'e "kɛ batɛme 'nyɛ, -mɔ, 'ɔ 'lebhe- -ame -gbɔ 'e -sɛle 'Denaade -glɔnya. -Se 'e te -kɛ dodo ne "ku 'na 'nyakpa 'na "nanesɛ "ku 'libhi. -Se Klise 'na klowa -ye 'ɔ "kule- "klo -wɛ te -kɛ "fu to.

Zezu -noɔ -lɔ Lagɔ 'na 'ylimeyamaleɛ yɔ

¹⁸ "Naa-, klowa 'na weli, 'nyakpa 'na -wa -bhli 'kwlɛ -wɛ 'na dɛku "kukwɛ yɛ -lɔ. -Mɔ, -anye -ye Lagɔ 'fuɔ- -wɛ 'na dɛku, Lagɔ 'na 'bhɛloɛ yɛ -lɔ.

¹⁹ Zaa, Lagɔbɔgo "me, sɛne 'ye 'ɛ kɛleɔ- -lɔ nɛɛ: «'E yi "nanenya 'na "nanoɛ "ku 'bhia-, "ne 'e yi -wa -yɛ 'ylime -wɛ 'na 'ylimeyamaleɛ "ku 'bhia-.»

²⁰ -Dee 'ylimeyamalenyɔ -ko bhɔ? -Dee Lagɔ 'na -Lɔslonyɔ -ko bhɔ? -Dee weliyibhlelenyɔ -ko bhɔ? Lagɔ -tua 'ylime -gbɔ zikpɛ ne "ku 'na 'ylimeyamaleɛ "kukwɛ yɛ -lɔ.

²¹ "Naa-, zikpɛ ne "ku 'na 'nyakpa -nyɛ 'wanɛɛ 'ylimeyamaleɛ "bhaa "ne Lagɔ 'na 'ylimeyamaleɛ yibhlele-. 'Ɛza, Lagɔ -ylɛle -lɔ 'Denaade -ye 'wa la "kukwɛ -wɛ "me -se 'ɔ "kɛ -wa -kɛ 'dleku -wɛ 'fuɔ.

²² Zufonya 'yɔbhɔ -gbɔ 'wa 'pɔ 'loa zɛzɛ 'yliku, "ne glɛkenya 'tɛle -lɔ 'ylimeyamaleɛ 'siɛ.

²³ -Mɔ, -anye, Klise -ye 'wa -kole klowa "klo 'na 'de 'ye -a 'sɛ -lɔ -gbɔ 'ɔ -noɔ -lɔ 'Fuɔnyɔ yɔ. "Ɛ weli -wɛ 'ye zufonya "ne -lɔ "ku 'ŋunu-, "ne -wa "ne zufonya 'wa -wɛ -no -lɔ -gbɔ "kukwɛ weli yɛ.

²⁴ -Mɔ, -ye Lagɔ -tɔ -wɛ, 'wa -noɔ zufonya 'wa 'oo, "ne 'wa "ne zufonya 'wa 'oo, 'wanɛɛ dɛku, Klise -noɔ -lɔ Lagɔ 'na 'bhɛloɛ "ne 'ɔnɛɛ 'ylimeyamaleɛ yɔ.

²⁵ "Naa-, Lagɔ 'na "kukwɛ -yɛ 'ylime, "ne 'ɛ -zi 'nyakpa 'na 'ylimeyamaleɛ "ku, "ne Lagɔ 'na 'kwɛmeyɔleɛ 'tɛ- "me, "ne 'ɛ -zi 'nyakpa 'na 'kwɛmetamaleɛ "ku.

²⁶ -Nyɔsɔwanye, 'anye -ye Lagɔ la- -wɛ, 'a 'wolo 'se -ye -a -noɔ -wɛ "ku. 'Anye 'glɛme 'ylimeyamalenya "ne -zu, -wa -kɛ 'bhɛloɛ "ne -zu, "ne -wa 'bhale klɔgbɔ -gligbɛ "ku -wɛ "ne -zu.

²⁷ -Mɔ, -ye zikpɛ ne "ku 'na 'nyakpa la "kukwɛ -li -wɛ 'ye Lagɔ libhi- -lɔ "ku "ne 'ɔ yi -lɔ 'ylimeyamalenya zu 'labha-. "Ne -ye zikpɛ ne "ku 'na -li -ye 'nyakpa no -gbɔ -ɛ "ne "me 'tɛ- -wɛ 'ye 'ɔ libhi- -lɔ "ku "ne 'ɔ yi -lɔ -ɛ 'tɛ- "me -wɛ zu 'labha-.

²⁸ Dodo ne "ku 'na 'nyakpa -wa "ne -bɛɛ' "me -ko, "ne -ye 'wa ziɛ 'nyɛze -wɛ, "ne -wa "ne -bɛɛ' "me -ko 'kplokplo -wɛ, 'wayi 'ye Lagɔ -tɔ -lɔ -se 'ɔ "kɛ -wa -kɛ kɔ -wɛ 'ylime tua -gbɔ 'wanɛɛ 'kɔkɛleɛ "ne -bɛɛ' "me -ko gou.

²⁹ Lagɔ -no 'ɛ soɔ, -se 'nyɔkpɔ te -kɛ 'ɔyi "ku zia Lagɔ 'yliku.

³⁰ "Naa-, 'ɔ gbɔ -lɔ "ne Klise Zezu "bhaa -a yi -lɔ "ku 'kole-, "ne Klise yi -lɔ -anyɛɛ dɛku 'ylimeyamaleɛ -ɛ 'bhale Lagɔ "me -wɛ "zo. "Ne 'ɔyi "me, Lagɔ yi -lɔ -anye "meŋwinɛlenya "zoa-, "ne -a yi -lɔ 'wlewle ko, "ne 'ɔ yi -lɔ -anye 'nyinyonoli 'na 'galu 'yli -sɛ.

³¹ 'Ɛza, sɛne 'ye 'ɛ kɛleɔ- -lɔ Lagɔbɔgo "me: 'Nyɔkpɔ "kɛ no -gbɔ 'ɔ "kɛ 'ɔyi "ku zia ne, Anyinɛnyɔ "me 'ye 'ɔ -na ziale- -kɛ 'ɔyi "ku.