Tito 3 - Biblia Tetun Dili

Moris nudar kristaun

¹ Foo hanoin fali ba sarani sira para halo tuir estadu nia lei sira no ema nebee kaer ukun, i sempre prontu atu halo serbisu ho diak.

² La bele hatete aat ema i la bele istori malu. Hatudu laran maus ho laran diak ba ema hotu.

³ Tanba uluk, bainhira ita seidauk konhese Nai Jesus, ita beik-teen hela no moris iha sala nia laran. Ita lakohi rona Nai Maromak, lao sala dalan i hakarak halo aat saida deit. Ita nia moris nakonu ho hanoin aat, laran moras ema, i odi malu.

⁴ Maski ita nia hahalok aat nunee mos, Maromak ita nia Salvador hatudu Nia laran diak ho domin mai ita.

⁵ Nia salva ita, laos tanba ita nia hahalok diak, maibee tanba Nia hadomi ita. Nia hamoos tiha ona ita nia sala i halo ita moris foun fali, liu hosi nia Espiritu Santu.

⁶ Tanba Jesus Kristu salva ona ita, Nai Maromak foo Nia Espiritu Santu hotu mai ita.

⁷ Tanba Jesus nia grasa, mak Nia deklara dehan, “Ema nee moris loos ona”. Nunee ita sai Nia oan no hetan direitu hodi simu moris rohan laek. Ida nee mak ita nia rikusoin.

⁸ Liafuan sira nee loos duni. Buat nebee hau hanorin nee diak, i iha folin boot ba ema hotu. Nee duni hau husu atu o foo sai fila-fila buat sira nee ba ema sira nebee fiar ba Maromak, atu sira hotu-hotu hakaas aan halo diak ba ema.

⁹ Hadook aan hosi diskusaun sira nebee la huun la dikin. Lalikan diskute malu kona ba ida-idak nia huun, ka haksesuk malu kona ba lei relijiaun Judeu nian. Buat sira nee hotu la iha folin ida, so halo lakon tempu deit.

¹⁰ Se iha ema ruma nebee hanorin la hanesan Maromak nia liafuan nebee halo sarani sira fahe malu, foo hanoin makaas ba nia too dala rua. Se nia halo nafatin nunee, husik tiha nia.

¹¹ Ema hanesan lao sala dalan ona, i nia hahalok rasik mak kastigu nia aan rasik.

Paulo taka nia surat

¹² Hau atu haruka Artemas ka Tíkiku baa hasoru o iha rai Kreta. Bainhira nia too iha nebaa, hakaas aan baa lalais hasoru hau iha sidade Nikópolis. Tan hau desidi ona atu hela iha nebaa durante tempu rai malirin.

¹³ Hakaas aan hodi ajuda advogadu Zenas ho nia kolega Apolo, nebee atu halo viajen, para sira la bele falta buat ida iha dalan.

¹⁴ Ita nia maluk sarani sira tenki aprende hakaas aan halo diak ba ema, hodi ajuda ema nebee presiza duni. Ho nunee sarani sira nia moris sei hetan fuan.

¹⁵ Tito, ami hotu iha nee hatoo ami nia kumprimentus ba o. Hatoo mos kumprimentus ba ita nia maluk sarani sira nebee hadomi ami. Grasa hosi Nai Jesus Kristu hamutuk ho imi hotu. Hosi hau, Paulo