Tito 2 - Biblia Tetun Dili

Hanorin lia loos para ema bele moris loos

¹ Maibee Tito, o la bele hanesan mestri falsu sira. O tenki foo sai lia loos.

² Hatete ba katuas sira atu domina aan, i hatene aan, para ema bele respeita. Sira tenki hatene lia no fiar metin ba Maromak, hadomi ema seluk ho laran tomak, i pasiensia iha terus nia laran.

³ Nunee mos ho ferik sira. Hatete ba sira para moris nudar ema nebee hamtauk ba Maromak. Sira la bele konta aat ema, i la bele buka deit atu hemu tua. Maibee sira tenki hanorin buat nebee diak.

⁴ Ho nunee, sira hanorin ho hatudu ezemplu diak ba feto foin-sae sira para hadomi sira nia laen ho sira nia oan sira,

⁵ moris loos no laran moos, badinas hadia uma laran, laran diak, i rona ba sira nia lain. Se sira moris nunee, maka ema la hatete aat Maromak nia liafuan.

⁶ Nunee mos, foo hanoin bebeik ba mane foin-sae sira para domina sira nia aan iha buat hotu-hotu.

⁷ Tito, o tenki halo diak ba ema iha buat hotu-hotu, hodi sai ezemplu diak ba foin-sae sira. Hanorin ho laran; la bele hanorin oin ida, halo oin seluk.

⁸ Bainhira o hanorin, o tenki uza lia loos, para ema la bele foo sala ba o. Nunee ema sira nebee kontra o, sei moe, tanba sira la iha razaun atu hatete aat ita.

⁹ Hanorin atan sira para halo tuir sira nia patraun iha buat hotu-hotu. I buka halo haksolok patraun nia laran, la bele koalia hasoru nia,

¹⁰ i la bele naok nia sasaan. Maibee sira tenki onestu no foo laran ba sira nia patraun. Ho nunee ema seluk nebee haree atan sira nia moris nee, sei foo valor ba ita nia hanorin kona ba Nai Maromak, ita nia Salvador.

¹¹ Tanba Maromak hatudu ona Nia grasa ba ema hotu hodi hetan salvasaun.

¹² Nai Maromak nia grasa hanorin ita para soe tiha hahalok aat ho mundu nia hakarak aat sira nee hotu. Durante ita sei moris iha mundu, ita tenki hatene aan, onestu, i halo tuir Nai Maromak nia hakarak.

¹³ Agora ita hein hela ho laran metin Jesus Kristu atu fila fali mai ho naroman nabilan. Jesus mak ita nia Maromak Forsa teb-tebes, nebee salva ita.

¹⁴ Nia foo aan ba mate hodi hasai ita hosi buat aat hotu-hotu, i halo ita laran moos, para sai Nia povu rasik, nebee sempre hakarak halo buat diak.

¹⁵ Nee duni hanorin buat sira nee hotu ba sarani sira, i foo sai bebeik ba sira para halo tuir. See mak halo sala, o tenki hatete dehan, “Nee sala”. Keta husik ema la konsidera o, tanba o iha direitu atu koriji sira.