Tito 1 - Biblia Tetun Dili

Paulo hahuu nia surat

¹ Tito mak hau hadomi. Surat nee hosi hau, Paulo, Nai Maromak nia atan ho Jesus Kristu nia apostolu. Nai Maromak haruka hau tau matan ba ema sira nebee Nia hili ona hodi sai Nia povu, para sira bele fiar metin liu tan ba Nia. Maromak mos haruka hau hanorin lia loos ba sira atu sira hatene moris tuir Nia hakarak.

² Nunee, sira bele laran metin ba moris rohan laek nebee Nai Maromak promete nanis ona, molok Nia halo mundu nee, i Nia nunka bosok.

³ Too ona tempu nebee Nai Maromak desidi, Nia foo sai dehan, Nia hakarak salva ema sala nain sira para moris hamutuk ho Nia. Nunee Nia mos foo orden mai hau atu baa foo sai Novidade Diak nee.

⁴ Tito, o hanesan hau nia oan rasik, tanba ita nain rua fiar ba Jesus Kristu. Hau hatoo hau nia kumprimentos ba o hodi grasa no paz hosi Aman Maromak no Jesus Kristu ita nia salvador hamutuk ho o.

Kritéria ba presbiteru no diakonu sira

⁵ Iha tempu liu ba nee, hau husik hela o iha rai Kreta, para halo buat nebee seidauk remata iha nebaa, i foti presbiteru sira hodi toma konta sarani sira iha sidade ida-idak, tuir buat nebee mak hau hatete tiha ona ba o.

⁶ Ema nebee atu sai presbiteru tenki tuir kriteria hanesan tuir mai nee: La iha ema ida hatudu lima ba nia moris. Nia tenki feen ida deit no foo laran ba nia. Nia oan sira mos tenki fiar ba Jesus Kristu. Sira tenki rona ba inan-aman no la bele moris arbiru hanesan ema nakar-teen.

⁷ Tanba nudar presbiteru nebee toma konta Maromak nia serbisu maka nia tenki moris loos para ema la hatudu liman ba nia. La bele foti aan. La bele hirus-door, lanu-teen, baku-door, i la onestu ho osan.

⁸ Nia hakarak simu bainaka iha uma ho laran tomak, i gosta halo buat nebee diak. Tenki ema hatene lia, sempre halo loos ka justu, laran moos i domina aan.

⁹ Nia tenki kaer metin Nai Maromak nia liafuan nebee loos, tuir uluk ita hanorin ona ba nia. Nunee nia bele hanorin tutan lia loos ba ema seluk i tulun ema hodi halo tuir Maromak nia hakarak, i koriji ema nebee hanorin kontra lia loos.

Tito tenki kontra ema nebee hanorin la loos

¹⁰ Tanba iha ona ema barak kontra hanorin nebee loos, liu-liu ema Judeu nebee tuir ona Kristu maibee dehan, atu hetan salvasaun, tenki sunat. Sira koalia nar-naran deit hodi bosok ema.

¹¹ Ema sira hanesan nee, bandu tiha para la bele hanorin tan. Tanba sira halo uma kain barak dook hosi lia loos, i sira so buka manaan osan deit, nebee halo moe deit.

¹² Uluk matan-dook ida hosi sira nia rai Kreta koalia kona ba nia ema rasik dehan, “Ema Kreta sira mesak bosok-teen, animal siak, baruk-teen, kaan teen.”

¹³ Ema Kreta sira nee hahalok nunee duni! Tanba nee, o tenki koalia makaas ba sira katak sira sala, para sira bele soe tiha liafuan falsu hodi fiar metin ba lia loos.

¹⁴ Nunee sira la bele rona tan ema Judeu sira nia ai-knanoik, i la bele tuir tan regra hosi ema sira nebee fila kotuk ba lia loos.

¹⁵ Ba ema nebee laran moos, buat hotu-hotu diak. Maibee ba ema nebee aat i la fiar ba Nai Jesus, la iha buat ida mak diak, tanba sira nia hanoin aat ona i sira la hatene ona saida mak diak, saida mak aat.

¹⁶ Mestri falsu sira nee dehan sira konhese Maromak, maibee sira nia hahalok hatudu katak sira la konhese Nia. Sira koalia oin ida, hahalok oin seluk. Ema sira nee hahalok aat. Sira lakohi halo tuir Nai Maromak nia hakarak, i sira la iha kapasidade hodi halo buat diak ida.