Tiago 4 - Biblia Tetun Dili

Hakruuk ba Maromak

¹ Tanba saida mak imi istori malu bebeik, too baku malu? Tanba imi kaan buat oi-oin deit, halo imi nia laran la hakmatek.

² Buat nebee imi kaan, imi la hetan. Nunee imi laran moras malu, istori malu, baku malu, too atu oho malu. Imi la hetan buat ida tanba imi la husu ba Nai Maromak.

³ Se imi husu ba Maromak mos, imi la simu buat ida, tanba imi nia objetivu sala. Imi husu diak ba imi nia aan rasik deit.

⁴ Hei! Imi sira nebee fila kotuk ba Maromak. Imi hanesan feen ka laen nebee la foo laran ba malu. Imi la hatene katak se imi hadomi moris tuir mundu nian, imi sai Nai Maromak nia inimigu? Nunee see deit mak hakarak halo belun no moris tuir mundu nian, sei sai Maromak nia inimigu.

⁵ Nee mak Nai Maromak nia Liafuan hatete, “Maromak nia Espiritu nebee Nia tau iha ita nia laran, hakarak ita foo laran tomak ba Maromak deit. Se lae, Nia laran moras no hirus.”

⁶ Maski nunee, Nai Maromak sei hatudu Nia grasa boot liu tan ba ita. Tuir Livru Sagradu hatete: “Maromak kontra ema nebee foti aan, maibee Nia hatudu Nia laran diak ba ema nebee haraik aan.”

⁷ Tanba nee, hakruuk ba Maromak. Tuba rai nafatin kontra Satanás, maka Satanás sei halai hosi imi.

⁸ Hakbesik aan ba Nai Maromak maka Nia mos sei hakbesik aan ba imi. Imi nebee moris iha sala nia laran, halo loos ona imi nia moris. I imi nebee laran rurua, foo ona imi nia laran tomak ba Maromak.

⁹ Imi laran susar ona baa, hodi tanis halerik tanba imi nia sala. Lalika hamnasa ona, tanis fali baa! Lalika kontenti ona, tristi fali baa.

¹⁰ Imi tenki haraik aan iha Nai Maromak nia oin, maka Nia sei foti sae imi.

La bele hatete aat ema

¹¹ Maun-alin sira, la bele hatete aat ema. Se o hatete aat o nia maluk sarani ida, i foo sala bebeik ba nia, entaun o hatete aat Nai Maromak nia lei nebee haruka ita hadomi malu, hodi dehan lei nee la diak. Se o foo sala ba Nai Maromak nia lei nunee, entaun o laos ona ema nebee tuir Nia lei, maibee o foti aan hanesan fali juis hodi tesi lia ba lei nee.

¹² Maromak deit mak halo lei, i Nia deit mak iha direitu atu tesi ema nia lia. So Nia deit mak bele salva ema, ho foo kastigu ba ema. Maibee see mak o hodi julga ema seluk?!

La bele gaba aan

¹³ Rona mai! Imi la bele dehan, “Ohin ka aban ami atu baa iha sidade nebaa. Ami sei hela iha nebaa tinan ida hodi kontratu manaan osan.”

¹⁴ Imi la hatene saida mak atu mosu aban! Ita ema nia moris hanesan abu-abu nebee ema haree lalais deit, depois lakon tiha.

¹⁵ Tuir loos imi tenki dehan, “Se Nai Maromak hakarak, ami sei moris, maka ami sei halo ida nee ka halo ida nebaa.”

¹⁶ Maibee imi gaba aan hodi hanoin katak planu hotu-hotu iha imi nia liman laran. Foti aan hanesan nee sala.

¹⁷ Hanoin didiak! Se ita hatene buat diak nebee ita tenki halo, maibee ita la halo, nee sala ona.