Tiago 3 - Biblia Tetun Dili

Kuidadu didiak ho o nia ibun

¹ Maun-alin doben sira, imi barak hakarak hanorin sarani sira. Maibee hanoin didiak lai, tanba imi hatene katak, ema nebee hanorin sarani sira, Maromak sei tesi sira nia lia todan liu duke ema seluk.

² Ita hotu halo sala oi-oin. Ema nebee la halo sala ho nia liafuan, ema nee moris loos, i nia bele domina nia aan tomak.

³ Ezemplu ida hosi kuda. Ita bele haruka kuda lao tuir ita nia hakarak, ho dada deit freiu kiik-oan iha kuda nia ibun.

⁴ Ezemplu seluk hosi roo. Ita bele halo roo boot ida fila baa-mai tuir ita nia hakarak, ho dulas deit volanti kiik-oan ida, maski anin boot.

⁵ Nunee mos ho ita nia ibun. Maski kiik-oan, maibee nia impaktu boot teb-tebes. Nee hanesan ahi funan kiik-oan ida bele haan hotu ai laran boot ida.

⁶ Ita bele kompara ibun hanesan ahi. Iha ita nia isin lolon, ita nia ibun nakonu ho buat aat, nebee estraga ita nia aan. Nee hanesan ibun lori ahi infernu nian hodi sunu motuk ita nia moris tomak.

⁷ Ema bele halo maus i domina animal fuik oi-oin, manu fuik, animal nebee dolar iha rai, ho ikan iha tasi.

⁸ Maibee la iha ema ida mak bele domina nia ibun. Tanba ibun nee aat, hanesan veneno nebee bele oho ema.

⁹ Ita uza ibun hodi hahii Nai Maromak, ita nia Aman. Ho ibun nee mos, ita foo malisan ba ema, maski Nai Maromak halo ema hanesan Nia Aan.

¹⁰ Hosi ita nia ibun sai liafuan diak ho aat. Maun-alin sira, la bele nunee!

¹¹ Bee matan ida la bele foo bee moos ho bee merak.

¹² Ai-figeira nunka foo fali ai-oliveira nia fuan. I ai-uvas nunka foo fali ai-figeira nia fuan. Nunee mos, bee matan meer la bele foo fali bee midar.

Matenek loloos mai hosi Maromak

¹³ Se imi balu matenek hodi hatene dalan nebee loos, i komprende saida mak diak, saida mak aat, imi tenki moris loos i halo buat diak ho haraik aan, hodi hatudu katak matenek nee mai hosi Nai Maromak.

¹⁴ Maibee se o laran moras ema seluk i buka diak deit ba o nia aan rasik, entaun la bele gaba aan dehan, “Hau ema matenek.” Foti aan hanesan nee, sala.

¹⁵ Matenek hanesan nee laos hosi Maromak. Maibee nee matenek tuir mundu nian, tuir ema nebee la konhese Maromak nia Espiritu Santu, i mai hosi diabu.

¹⁶ Tanba bainhira ema sei iha laran moras i buka diak deit ba nia interese privadu, nia sei halo rungu-ranga ho hahalok aat oi-oin.

¹⁷ Maibee matenek nebee mai hosi Maromak mak nee: moos, lori dame, laran maus, konsidera ema seluk, laran diak, foo fuan diak, gosta ajuda ema, la haree ba ema boot ka kiik, i la finjidu.

¹⁸ Toos nain nebee kuda fini, iha ikus nia hetan rezultadu diak, nunee mos ema nebee hatudu dalan ba dame, kleur-kleur sei haburas justisa.