Tiago 1 - Biblia Tetun Dili

Tiago hahuu nia surat

¹ Hau Tiago, Nai Maromak ho Nai Jesus Kristu nia atan. Kumprimentus ba imi ema Judeu sira nebee tuir Nai Jesus nebee namkari iha fatin-fatin.

Bainhira hasoru susar, haksolok nafatin

² Maun-alin sira, bainhira imi hasoru susar oi-oin, haksolok nafatin ba.

³ Tanba imi hatene katak, se imi aguenta iha terus ho tentasaun nia laran, i laran metin nafatin ba Maromak, maka imi sei kontinua metin liu tan.

⁴ Imi tenki kontinua metin nafatin too imi sai ema nebee diak, la iha frakeza ida, i prontu atu hasoru saida deit.

Se ita husu buat ruma ba Maromak, la bele husu ho laran rurua

⁵ Se iha imi ruma presiza matenek, husu ba Maromak maka Nia sei foo. Tan Maromak sei foo ba ema hotu-hotu ho laran luak.

⁶ Maibee bainhira imi husu ba Nia, imi tenki husu ho fiar, la bele laran rurua. Tan see mak husu ho laran rurua, nia hanesan laloran nebee baku baa-mai bainhira anin boot.

⁷ Ema nebee fasil nakdoko hanesan nee, lalika hanoin nia atu simu buat ruma hosi Maromak.

⁸ Tanba ema nebee laran rurua, nia moris sei la hakmatek.

Ema kiak ho ema riku

⁹ Ema kiak nebee fiar ona ba Nai Jesus, nia tenki haksolok, tanba Maromak foti aas nia.

¹⁰ I ema riku nebee fiar ona ba Nai Jesus, bainhira Maromak halo nia haraik aan, nia mos tenki haksolok. Tanba ema riku sei la dura, hanesan ai funan nebee la kleur namlaik ona.

¹¹ Ai funan bele kapaas, maibee too bailoro, funan kapaas nee namlaik i maran too lakon tiha deit. Nunee mos ho ema riku. Bainhira nia sei fadigadu hela ho nia riku, nia mate, la lori buat ida.

Tentasaun nunka mai hosi Maromak

¹² Maromak foo bensaun boot ba ema nebee aguenta ho pasiensia bainhira hasoru susar oi-oin. Bainhira nia manaan, Maromak sei foo koroa ida ba nia. Koroa nee mak moris nebee Maromak promete ona atu foo ba ema nebee hadomi Nia.

¹³ Hanoin didiak. Se ema ruma hasoru tentasaun nebee dada nia ba halo sala, nia la bele dehan, “Tentasaun nee mai hosi Nai Maromak.” La iha buat aat ida mak bele dada Nai Maromak monu ba sala, i Maromak mos nunka dada ema ida monu ba sala.

¹⁴ Maibee, tentasaun sai hosi ema ida-idak nia hakarak nebee aat, nee mak rasta ita monu ba lasu.

¹⁵ Hanoin aat mak dada ita ba halo sala. I bainhira ita halo sala nafatin, maka sala nee sei lori ita ba mate.

¹⁶ Maun-alin doben sira, keta husik ema bosok imi!

¹⁷ Prezenti diak ho grasa hotu-hotu nebee ita simu, mai hosi Nai Maromak. Nia mak halo loro matan, fulan ho fitun sira. Buat sira nee muda bebeik. Maibee Nai Maromak nunka muda.

¹⁸ Nai Maromak hakarak halo ita sai Nia oan. Nee mak Nia foo Nia Liafuan Loos mai ita para ita bele hetan moris foun. I hosi buat hotu-hotu nebee Nia halo iha mundu nee, Nia hili ona ita nudar oan primeiru.

Rona i halo tuir Maromak nia Liafuan

¹⁹ Maun-alin doben sira nebee hau hadomi, imi tenki prontu hodi rona ema seluk, keta ansi koalia, i keta hirus lalais.

²⁰ Tanba ema nebee hirus ona, la halao Nai Maromak nia lia loos.

²¹ Nee duni, imi tenki soe tiha imi nia hahalok aat sira hotu, i haraik aan hodi simu Maromak nia Liafuan, nebee Nia kuda iha imi nia fuan-laran. Liafuan nee iha kbiit hodi salva imi.

²² Nai Maromak nia Liafuan nee, imi tenki halo tuir, la bele rona deit! Se lae, imi bosok imi nia aan rasik.

²³ Bainhira ema rona ona Liafuan nee, maibee la halo tuir, nee hanesan nia fihir nia aan iha lalenok.

²⁴ Nia foin fila kotuk, nia haluha kedas nia oin nee oinsaa.

²⁵ Maibee imi tenki buka hatene didiak Nai Maromak nia Ukun Fuan hotu, nebee liberta ita, i tenki halo tuir Liafuan nee. La bele rona hosi tilun karuk, sai fali hosi tilun kuana. Se imi halo tuir Maromak nia Liafuan, maka Nia sei foo bensaun haksolok ba imi iha buat saida deit mak imi halo.

²⁶ Se imi dehan imi badinas tuir Maromak, maibee la kuidadu ho imi nia ibun, imi bosok imi nia aan rasik. Tuir Maromak hanesan nee la iha folin.

²⁷ Tuir Maromak nebee loos i la iha sala mak hanesan nee: ajuda feto faluk ho oan kiak sira nebee terus, i kuidadu aan atu la bele husik mundu nia hakarak dada ita ba hahalok aat.