Roma 9 - Biblia Tetun Dili

Paulo laran susar tanba ema Israel barak lakohi fiar ba Jesus

¹ Agora, nudar Kristu nia ema, hau hatete lia loos ba imi, hau la bosok. Espiritu Santu mos hametin hau nia laran katak, buat nebee mak hau atu koalia nee loos.

² Loron-kalan hau tristi teb-tebes, no hau nia fuan-laran susar liu,

³ tanba hau nia maluk Israel sira nebee lakohi simu Kristu. Se karik Maromak bele foo malisan mai hau iha sira nia fatin hodi soe hau dook hosi Kristu para sira bele hetan salvasaun, hau prontu simu.

⁴ Tanba sira nee ema Israel, Maromak hili ona sira sai Nia oan. Nia hatudu Nia naroman nabilan ba sira. Nia halo promesa oi-oin ho sira i foo Nia lei ba sira. Nia hanorin sira oinsaa atu adora Nia, i promete buat barak ba sira.

⁵ Sira nia bei-ala sira naran boot. Tuir raan, Kristu nebee Maromak promete hori uluk atu haruka mai nee mos hosi sira nia jerasaun. Maibee Kristu nee mos Maromak, Nia boot liu buat hotu-hotu. Mai ita hahii Nia too tinan ba tinan. Amen.

⁶ Maski ema Israel barak seidauk simu Kristu, maibee keta hanoin dehan, Maromak la halo tuir Nia promesa. Tanba laos ema Israel hotu mak sai Maromak nia povu.

⁷ I laos ita nia bei-ala Abraão nia jerasaun hotu mak Maromak hili. Tanba Maromak dehan tiha ona ba Abraão, “Liu hosi Isac mak o sei hetan jerasaun nebee Hau promete ona.”

⁸ Nee dehan katak, hori uluk to agora laos ema hotu Abraão nia jerasaun tuir raan mak sai Maromak nia oan. Maibee hosi jerasaun nebee Maromak promete ba Abraão deit mak Maromak konsidera sai Nia oan duni.

⁹ Nia promesa mak nee: “Tinan oin Hau fila fali mai, o nia feen Sara iha ona oan mane ida.”

¹⁰ Nunee mos ho ita nia bei-ala Isac ho nia feen Rebeca, sira hetan oan mane kaduak.

^11-12 Molok labarik sira nee moris, sira seidauk halo buat diak ka buat aat, maibee Maromak hatete ona ba Rebeca, “Maun sei serbii ba nia alin.” Nee hatudu katak, bainhira Maromak hili ema ida, Nia la haree ba ema nee nia hahalok, maibee Nia hili tuir Nia planu rasik.

¹³ Iha Livru Sagradu, Maromak dehan kona ba oan kaduak nee, “Hau hadomi Jacó, maibee Esaú lae.”

¹⁴ Se nunee, ita atu dehan saida? Maromak tesi lia la loos ka? Lae!

¹⁵ Uluk Maromak foo hatene ba Moisés dehan, “Hau sei hatudu Hau nia domin ba ema nebee mak Hau hakarak hadomi. I Hau sei hatudu Hau nia laran diak ba ema nebee mak Hau rasik hili.”

¹⁶ Nunee, Maromak nia domin la depende ba ita ema nia hakarak ka ita nia esforsu rasik, maibee Maromak hadomi tanba deit Nia laran diak.

¹⁷ Iha Livru Sagradu, Maromak dehan ba Farao, liurai Ejitu, nunee: “Hau foti o sai liurai, tanba Hau hakarak uza o hodi hatudu Hau nia kbiit atu ema iha mundu tomak bele foti aas Hau nia naran.”

¹⁸ Nunee, se Maromak hakarak hatudu Nia domin ba ema nebee Nia hakarak, Nia halo deit. I se Nia hakarak halo ema ida nia fuan toos, nee konforme Nia.

Nai Maromak hirus ema balu i hadomi ema seluk, tuir Nia hakarak

¹⁹ Karik imi ida protesta mai hau dehan, “Se Maromak hakarak halo ita nunee, nusaa mak Nia foo sala nafatin mai ita? Ita ema atu kontra Nia hakarak la bele.”

²⁰ Maibee o nee see mak brani koalia kontra Maromak hanesan nee? O nee ema deit! Hanoin took, bainhira ema halo sanan rai, sanan nee la bele husu fali ba ema nee, “Nusaa mak o halo hau hanesan nee?”

²¹ Ema nebee halo sanan rai, nia iha direitu atu halo sanan tuir nia hakarak. Hosi rai mean kabuar ida, nia bele halo sanan rai oi-oin, balu diak nian, balu uza hodi tau foer deit.

²² Maromak mos iha direitu nunee. Nia hakarak hatudu sai Nia kbiit boot hodi fakar Nia hirus ba ema nebee mak Nia atu kastigu, sira nee mak merese atu Nia harahun. Maski Nia atu kastigu sira, maibee Nia sei aguenta hela ho pasiensia.

²³ Nia pasiensia lai ho sira nunee para hatudu ba ema hotu-hotu katak, Nia laran diak teb-tebes ba ita nebee mak Nia hadomi; ita nee mak Nia prepara antes tiha ona atu aban-bainrua Nia sei foti aas ita.

²⁴ Nia bolu ita nanis ona atu sai Nia povu. Nia laos bolu deit ema Judeu maibee Nia bolu mos ema hosi nasaun seluk.

²⁵ Uluk profeta Oséias hakerek Maromak nia liafuan kona ba ema nebee mak laos Judeu nunee: “Ema nebee uluk laos Hau nia povu, Hau sei bolu ‘Hau nia povu’, ema nebee uluk Hau la hadomi, Hau sei dehan ‘Hau hadomi imi.’ ”

²⁶ Nia mos hakerek nunee: “Iha fatin nebee mak uluk Maromak dehan ba sira, ‘Imi laos Hau nia povu’, iha fatin nee duni mak Maromak nebee Moris sei bolu sira ‘Hau nia oan’.”

²⁷ Maibee kona ba ema Israel, profeta Isaias halerik nunee: “Ema Israel sira barak teb-tebes hanesan rai henek iha tasi ibun, maibee ituan deit mak sei hetan salvasaun.

²⁸ Tanba too nia tempu, Nai Maromak sei foo kedas Nia kastigu mai mundu. Nia sei la demora.”

²⁹ Profeta Isaias mos foo hatene nanis ona kona ba ema Israel dehan, “Se uluk Nai Maromak Forsa Teb-tebes la husik ita nia povu balu moris karik, entaun ita mate mohu ona hanesan ema iha sidade Sodoma ho Gomora.”

Ema Israel nebee la fiar ba Jesus la hetan salvasaun

³⁰ Se nunee, ita atu dehan saida? Ema nebee laos Judeu, sira uluk la hakaas aan atu hetan lia loos. Too ikus Maromak simu sira tanba sira fiar ba Jesus Kristu.

³¹ Maibee ema Israel hakaas aan moris tuir lei atu sira bele hetan lia loos, i la konsege.

³² Tanba saa mak sira la konsege? Tanba sira buka diak malu fali ho Nia liu hosi sira nia hahalok rasik, laos liu hosi fiar. Nee hanesan sira sidi ba fatuk sidi nebee halo sira monu.

³³ Fatuk nee mak Jesus Kristu. Iha Livru Sagradu, Maromak koalia kona ba Jesus Kristu nunee: “Haree baa! Hau tau hela fatuk ida iha Siaun, iha sidade Jerusalem. Fatuk nee halo ema sidi, i halo sira monu. Maibee see mak fiar ba Jesus, sira sei la moe.”