Roma 8 - Biblia Tetun Dili

Moris tuir Maromak nia Espiritu

¹ Ema nebee laran ida ho Kristu Jesus, Maromak la kastigu tan nia ona.

² Tanba uluk sala ukun ita, lori ita ba mate, maibee agora liu hosi Kristu Jesus, Maromak nia Espiritu hasai tiha ona ita hosi sala nia ukun hodi lori ita ba moris.

³ Ukun fuan sira la bele hasai ita hosi sala nia ukun, tanba ita ema sala nain la iha kbiit atu halo tuir lei nee hotu. Maibee Maromak bele hasai ita liu hosi Nia haruka Nia Oan rasik mai iha mundu para sai ema kriatura nudar ema sala nain, i mate hanesan sakrífisiu ida hodi halakon sala iha ita nia laran.

⁴ Maromak halo nunee atu loke dalan ba ita para bele halo tuir Nia hakarak nebee hakerek tiha ona iha Nia lei. Ita bele halo tuir tanba ita moris tuir Maromak nia Espiritu, laos ona tuir ita nia hakarak.

⁵ Ema sira nebee moris tuir sira nia hakarak, sira so hanoin buat aat deit. Maibee ema nebee moris tuir Maromak nia Espiritu, sira so hanoin buat nebee Espiritu nia hakarak.

⁶ Se o nia hakarak domina o nia hanoin, maka o sei mate tinan ba tinan. Maibee se Maromak nia Espiritu mak domina o nia hanoin, nunee o sei moris i o nia laran sei hakmatek.

⁷ Ita ema nia hakarak sempre sai inimigu ho Maromak, tanba nia la hakruuk ba Maromak nia lei, i nee la bele duni.

⁸ Se o moris tuir o nia hakarak, o la bele halo haksolok Maromak.

⁹ Maibee imi laos nunee. Imi la moris tuir imi nia hakarak, maibee moris tuir Espiritu, tanba Maromak nia Espiritu hela iha imi nia laran. See mak la iha Kristu nia Espiritu, ema nee laos Kristu ninian.

¹⁰ Imi nia isin lolon sei mate tanba imi nia sala. Maibee agora Kristu moris iha imi nia laran, nunee imi nia klamar sei moris nafatin, tanba Maromak deklara ita moris loos ona iha Nia futar oin.

¹¹ Maromak nia Espiritu mak halo Jesus Kristu moris fali hosi mate. Agora Nia Espiritu hela iha imi. Nunee bainhira imi mate, Maromak mos sei halo imi nia isin lolon moris fali, liu hosi Nia Espiritu nebee hela iha imi nia laran.

Espiritu Santu halo ita hatene katak ita Maromak nia oan

¹² Nee duni maun-alin sira, ita iha obrigasaun, maibee ita nia obrigasaun nee laos atu moris tuir ita ema nia hakarak.

¹³ Tanba se imi moris tuir imi nia hakarak, imi sei mate tinan ba tinan. Maibee se imi hamate hahalok aat hodi Espiritu Santu nia kbiit, imi sei hetan moris.

¹⁴ Tanba ema nebee moris tuir dalan nebee Maromak nia Espiritu hatudu ba nia, ema nee mak Maromak nia oan.

¹⁵ Espiritu nebee ita simu nee, laos halo ita sai fali hanesan atan nebee moris iha tauk nia laran. Maibee Espiritu nee halo ita hatene katak ita nee Maromak nia oan. Nee mak ita brani bolu Maromak “Apaa”.

¹⁶ Espiritu nee rasik hametin ita nia laran katak ita Maromak nia oan.

¹⁷ Se ita sai ona Maromak nia oan, nee dehan katak aban-bainrua ita sei simu eransa rikusoin nebee mak Maromak rai hela ba Nia oan sira, hanesan mos Kristu simu. Naran katak ita mos hola parte iha Kristu nia terus, para aban-bainrua Maromak bele foti aas ita hanesan mos Nia foti aas Kristu.

Aban-bainrua Nai Maromak sei foti aas ita

¹⁸ Hau hanoin terus nebee ita hetan agora la kompara ho naroman nabilan nian nebee Maromak sei hatudu sai mai ita iha aban-bainrua.

¹⁹ Maromak nia kriasaun hotu-hotu hein hela atu haree Maromak hatudu sai see-see loos mak Nia oan duni.

²⁰ Maromak halo mundu ho buat hotu-hotu iha nia laran para halo tuir Nia hakarak. Maibee la konsege, tanba Maromak mak desidi nunee, laos tanba mundu rasik mak lakoi. Bele nunee mos, mundu nee sei iha esperansa.

²¹ Maski agora dadauk buat hotu-hotu tenki rahun ka mate, maibee aban-bainrua buat sira nee la rahun i la mate tan, tanba Maromak sei foo liberdade ba buat hotu-hotu, hanesan mos Nia foo ba Nia oan sira. I liberdade nee furak teb-tebes.

²² Ita hatene katak hori uluk liu too agora nee, mundu ho buat hotu nebee mak Maromak halo, hotu-hotu halerik hanesan feto ida nebee mak kanotak moras atu tuur ahi.

²³ Laos mundu deit mak halerik. Maibee ita nebee simu ona Maromak nia Espiritu mos halerik hodi hein atu simu tan direitu tomak nudar Maromak nia oan, nee dehan katak ita nia isin lolon livre ona, mate la ukun tan.

²⁴ Tanba komesa ita foin simu salvasaun, ita hein ho laran metin atu Maromak foo buat nee mai ita. Maibee se buat nebee ita hetan ona, ita sei la hein tan. Tanba ema la hein tan buat nebee mak nia hetan ona.

²⁵ Maibee se ita seidauk hetan, ita hein ho pasiensia nafatin.

²⁶ Nunee mos, Maromak nia Espiritu tulun ita, tanba ita ema fraku. Ita la hatene saida mak ita atu husu ba Maromak liu hosi ita nia orasaun. Maibee Maromak nia Espiritu rasik harohan ba Maromak iha ita nia fatin. Maski ita halerik deit no la hatene saida mak ita atu koalia.

²⁷ Maromak hatene ita nia fuan-laran, Nia mos hatene Nia Espiritu nia hanoin. Bainhira Espiritu harohan ba Maromak nia povu santu sira, buat nebee Nia husu sempre tuir Maromak nia hakarak.

²⁸ Ita hatene katak, ba ita nebee hadomi Maromak, saida mak akontese iha ita nia moris, Maromak uza buat sira nee hotu ba ita nia diak. Maromak bolu ona ita sai Nia ema, tuir Nia planu rasik.

²⁹ Tanba hosi hahuu fofoun, Maromak konhese ona ita i hili ita para sai hanesan Oan Jesus Kristu nia imajen. Ho nunee Jesus mak Oan boot hosi maun alin sira hotu.

³⁰ Ita nebee Maromak desidi ona hosi hahuu, Nia hili sai Nia ema. Ita nebee Nia bolu ona nee, Nia simu hodi deklara katak ita moris loos ona iha Maromak nia prezensa. I ita nebee Nia simu ona, Nia mos foti aas.

La iha buat ida mak bele haketak ita hosi Kristu nia domin

³¹ Nunee, ita atu dehan tan saida kona ba buat sira nee? Se Maromak hamutuk ho ita, see mak bele kontra ita?

³² Maromak laran luak teb-tebes, too Nia foo Nia Oan rasik para mate iha ita hotu nia fatin. Hosi nee ita bele hatene katak, Nia sei foo tan mai ita buat hotu-hotu nebee diak.

³³ Se Maromak mak hili ita, see mak brani foo sala mai ita iha Maromak nia futar oin? Maromak mak deklara katak ita moris loos ona.

³⁴ Entaun see mak foo kastigu mai ita? La iha! Tanba Kristu Jesus mate ona ba ita, maibee laos nee deit, Nia moris fila fali ona, i agora Nia tuur iha Maromak nia sorin loos hodi defende ita.

³⁵ See mak bele haketak ita hosi Kristu nia domin? La iha! Bele ita hetan problema ka susar oi-oin, bele ita hetan terus tanba tuir Kristu, bele ita hetan hamlaha ka la iha hena para hatais, bele ita iha situasaun perigu nia laran ka ema atu oho ita ho surik, maibee buat sira nee hotu sei la haketak Kristu nia domin iha ita.

³⁶ Nee hanesan hakerek tiha ona iha Livru Sagradu dehan, “Maromak, loron-kalan ema buka dalan atu oho ami tanba ami tuir Ita Boot. Sira haree ami hanesan bibi malae nebee mak sira atu oho.”

³⁷ Maski ita hetan susar nunee, ita manaan liu dook ona, tanba Kristu hadomi teb-tebes ita.

³⁸ Hau fiar metin katak la iha buat ida mak bele haketak ita hosi Maromak nia domin. Atu mate ka moris, atu anju ka autoridade nebee kaer ukun, atu buat nebee mosu agora ka buat nebee mosu aban-bainrua, atu forsa saida deit,

³⁹ atu buat iha loro leten ka iha rai, atu buat selu-seluk nebee Maromak halo, la iha ida mak bele haketak ita hosi Maromak nia domin nebee Nia hatudu ona mai ita liu hosi ita nia Nai Kristu Jesus.