Roma 7 - Biblia Tetun Dili

Ita livre hosi lei hodi moris tuir Espiritu Santu

¹ Maun-alin sira, imi sira nebee hatene lei, hatene katak lei nee so vale ba ema bainhira ema nee sei moris.

² Hau foti ezemplu hosi lei kazamentu nian. Tuir lei nee dehan, feto nebee kaben ona la bele husik nia laen durante nia laen sei moris. Maibee se nia laen mate ona, feto nee livre hosi lei kazamentu.

³ I se nia laen sei moris hela mak nia hola fali mane seluk, feto nee halo sala adulteriu. Maibee se nia laen mate tiha ona, nia livre ona hosi lei kazamentu. Nia kaben fali ho ema seluk la sala.

⁴ Maun-alin sira, agora ita laos moris iha lei nia okos. Tanba kona ba lei, ita hanesan mate tiha ona hamutuk ho Kristu. Maibee ita sai fali atan ba Ema seluk ida, Ema nee mak Kristu. Nia moris fali ona hosi mate, para ita bele serbii Maromak.

⁵ Uluk ita nia hakarak aat sei domina ita, lei foo hanoin mai ita atu la bele halo sala. Maibee, bainhira ita hatene tuir tiha lei nee, ita nia hakarak kontra liu tan lei nee, too ita halo sala oi-oin, i sala nee lori ita ba mate tinan ba tinan.

⁶ Maibee agora ita livre ona hosi lei, tanba kona ba lei ita hanesan mate tiha ona. Nunee agora ita bele serbii Maromak laos tuir dalan uluk nian mak halo tuir deit lei nebee hakerek iha livru. Maibee ita serbii Nia liu hosi dalan foun, dalan nee mak Maromak nia Espiritu.

Maromak nia lei hatudu sai ita nia sala

⁷ Se nunee, agora ita atu dehan saida? Maromak nia lei nee sala ka? Lae liu! Tanba liu hosi lei nee mak foin hau hatene, sala nee saida. Por ezemplu, iha lei ida dehan, “La bele kaan ema nia sasaan.” Hosi lei ida nee mak foin hau komprende katak, kaan sasaan nee sala ida.

⁸ Maibee sala iha nanis ona iha hau nia laran, nunee bainhira lei nee bandu atu la bele kaan ema nia sasaan, nee halo hau kaan buat oi-oin deit. Se la iha lei nebee bandu, sala mos la iha kbiit atu domina ema.

⁹ Uluk hau seidauk hatene Maromak nia lei. Maibee, bainhira hau aprende lei nee, sala komesa buras iha hau nia moris,

¹⁰ halo hau hanesan mate haketak aan hosi Maromak. Uluk hau hanoin dehan, Maromak nia lei bele lori hau ba moris rohan-laek, afinal lori hau ba mate.

¹¹ Tanba sala nebee iha hau nia laran nee, uza fali lei nee hodi lohi hau i hamate hau.

¹² Entaun Maromak nia lei nee santu, i buat hotu-hotu iha lei nia laran mos santu, loos ho diak.

¹³ Se nunee, lei nebee diak nee mak hamate hau ka? Lae! Sala nebee iha hau nia laran mak uza fali lei nee hodi hamate hau. Nunee mak foin hau bele hatene katak, hau nia hahalok aat nee sala duni i Maromak hakribit teb-tebes.

Lei ho sala kontra malu iha ita nia laran

¹⁴ Ita hatene katak, lei nee mai hosi Maromak. Maibee hau ema kriatura nebee moris tuir deit hau nia hakarak, i sala kesi metin hau hanesan fali nia atan.

¹⁵ Hau la komprende saida mak hau halo. Buat nebee hau hakarak halo, hau la halo. Buat nebee hau odi, ida nee mak hau halo fali.

¹⁶ Maibee se hau hatene katak buat nebee hau halo nee sala, nee hatudu katak hau konkorda dehan Maromak nia lei nee diak.

¹⁷ Se nunee, laos ona hau mak halo sala, maibee sala nebee iha hau nia laran mak halo.

¹⁸ Hau hatene katak, nudar ema kriatura la iha buat diak ida iha hau nia laran. Tanba hau hakarak duni halo buat nebee diak maibee la konsege.

¹⁹ Buat diak nebee hau hakarak halo, hau la halo. Buat aat nebee mak hau lakohi halo, nee mak hau halo fali.

²⁰ Nunee se hau baibain halo buat nebee mak hau lakohi atu halo, nee hatudu katak laos ona hau, maibee sala nebee iha hau nia laran mak halo.

²¹ Entaun buat nebee hau haree iha hau nia moris mak nee: Bainhira hau hakarak halo buat diak, buat aat iha hau nia laran sempre kontra.

²² Hau nia laran haksolok teb-tebes ho Maromak nia lei,

²³ hau nia neon mos konkorda ho lei nee. Maski nunee, maibee hau haree katak sala mak serbisu fali iha hau nia aan hodi kontra lei nee. Sala nee kesi metin hau hanesan dadur ida.

²⁴ Hau susar ona! See mak bele hasai hau hosi kbiit aat nebee iha hau nia laran, ida nebee lori hau ba mate tinan ba tinan?

²⁵ Ita agradese ba Maromak! Tanba liu hosi Jesus Kristu, ita nia Nai, Maromak salva hau. Entaun realidade mak nee: hau nia neon hakarak teb-tebes sai atan ba Maromak nia lei, maibee nudar ema sala nain hau halo sala bebeik.