Roma 5 - Biblia Tetun Dili

Ita dame malu ho Maromak tanba ita fiar ba Kristu

¹ Maromak deklara ita moris loos ona tanba ita fiar ba Kristu. Liu hosi ita nia Nai Jesus Kristu mak agora ita moris dame malu ona ho Maromak.

² Kristu mos halo ita hatene Maromak nia grasa iha ita nia moris agora, tanba ita fiar. Ita nia laran mos haksolok, tanba ita laran metin katak, aban-banrua Maromak sei foti ita hodi senti Nia naroman nabilan.

³ Laos nee deit, maibee ita nia laran mos haksolok iha terus laran, tanba ita hatene katak, hosi terus nee ita aprende atu aguenta liu tan.

⁴ Se ita aguenta iha terus laran, nee halo ita nia laran metin liu tan. Ita nia laran metin nee halo ita fiar nafatin ba Maromak nia promesa.

⁵ Ita nia laran metin nee la halo ita lakon esperansa, tanba Maromak foo ona Nia Espiritu Santu mai ita, nunee ita hatene Maromak nia domin boot teb-tebes mai ita.

⁶ Iha tempu nebee mak ita nia fiar sei fraku i la iha kbiit atu salva aan, iha tempu nee mak Kristu mate iha ita nia fatin tuir tempu nebee Maromak desidi.

⁷ Ita ema atu mate troka ema ida nebee moris loos, susar. Se iha ema nebee laran diak teb-tebes, karik iha ema brani mate ba nia.

⁸ Maibee Maromak hatudu Nia domin boot mai ita liu hosi Kristu mate iha ita nia fatin, bainhira ita sei moris hela iha sala nia laran.

⁹ Agora, Maromak deklara ita moris loos ona tanba Kristu nia raan fakar too mate ba ita. Nunee ita hatene ona katak, Kristu sei salva ita bainhira Maromak fakar Nia hirus.

¹⁰ Uluk, bainhira ita sei inimigu ho Maromak, Nia halo ita dame malu ho Nia liu hosi Nia Oan nia mate. Saa tan agora ita dame malu ona, konserteza ita sei hetan salvasaun tanba Nia Oan moris fila fali.

¹¹ Laos nee deit, maibee agora ita mos haksolok tanba Maromak hatudu Nia laran diak liu hosi ita nia Nai Jesus Kristu, tanba Kristu nee mak halo ita dame malu ho Maromak.

Adão nia sala lori ita ba mate, Kristu nia mate lori ita ba moris

¹² Hori uluk liu, sala tama iha mundu liu hosi ema ida, ema nee mak Adão. I sala nee lori nia ba mate. Ho nunee, ema hotu-hotu iha mundu mos mate, tanba ema hotu-hotu mos halo sala.

¹³ Bainhira Maromak seidauk foo Nia lei ba Moisés, ema iha mundu nee halo ona sala. Maibee tanba seidauk iha lei, ema nia sala seidauk sura.

¹⁴ Maski nunee, hosi tempu Adão too tempu Moisés nian, mate ukun ona ema hotu-hotu. Laos deit ema nebee kontra Maromak nia orden hanesan Adão mak mate, maibee ema nebee halo sala selu-seluk mos mate hotu. Adão nee ita bele kompara ho Ema ida nebee atu mai, nee mak Kristu.

¹⁵ Maibee Maromak nia grasa la hanesan Adão nia sala. Adão nee ema ida deit, maibee tanba nia kontra Maromak nia orden, entaun ema hotu-hotu tenki mate. Jesus Kristu mos Ema ida deit. I liu hosi Nia, Maromak hatudu momoos nia grasa ba ema hotu.

¹⁶ Ida nebee Nai Maromak foo mai ita nee, la hanesan ho buat nebee ita hetan hosi Adão nia sala. Bainhira ema ida nee halo sala, Maromak foo justisa dehan ita ema tenki hetan kastigu. Maibee agora ita ema halo sala barak liu ona. Maski nunee, Maromak hatudu nia grasa mai ita hodi deklara katak ita moris loos ona.

¹⁷ Tanba ema ida nia sala, nunee mate ukun ema hotu-hotu. Maibee agora Ema ida seluk, Jesus Kristu, halo mudansa boot liu tan. Nia hatudu Nia laran diak teb-tebes mai ita too Nia simu ita hodi deklara katak ita moris loos ona. Nunee Nia lori ita ba moris rohan-laek hodi foti ita kaer ukun hamutuk ho Nia.

¹⁸ Nunee, ema ida halo sala, loke dalan ba ema hotu-hotu simu kastigu hosi Maromak. I Ema ida seluk halo buat nebee loos, loke dalan ba ema hotu hodi diak malu fali ho Maromak no hetan moris loos.

¹⁹ Ema ida lakohi halo tuir Maromak nia liafuan, halo ema hotu-hotu sai ema sala nain. Ema Ida seluk halo tuir Maromak nia liafuan, nunee halo ema barak sai moris loos iha Maromak nia oin.

²⁰ Maromak foo Nia lei ba Moisés para ema hotu-hotu bele hatene loloos, sala nee saida. Maibee bainhira ema nia sala aumenta, Maromak mos hatudu liu tan Nia grasa.

²¹ Bainhira sala domina ema hotu-hotu, konsekuensia mak lori sira ba mate. Maibee agora Maromak nia grasa domina ita, too Maromak mos simu fali ita, i lori ita ba moris rohan-laek liu hosi ita nia Nai Jesus Kristu.