Roma 14 - Biblia Tetun Dili

La bele julga ba o nia maluk sarani

¹ Simu didiak sarani sira nebee fiar seidauk metin, i la bele diskuti malu ho sira kona ba sira nia fiar nunee.

² Ema sarani balu fiar katak ita bele haan saida deit, hanesan modo tahan ka naan. Balu nia fiar seidauk metin, sira haan modo tahan deit, tanba sira hanoin dehan naan nee lulik ba sira.

³ Ema nebee haan saida deit, nia la bele hatuun ema nebee la haan naan. Nunee mos, ema nebee la haan naan, la bele foo sala ba ema nebee haan naan nee, tanba Maromak simu tiha ona nia.

⁴ Imi nee see, hodi foo sala ba patraun seluk nia atan? Maromak deit mak bele tesi sira nia lia dehan, sira nee hamriik ka monu. I Nia mak bele tulun sira para sira hamriik.

⁵ Nunee mos, iha ema balu konsidera katak, loron balu boot liu loron seluk. Maibee iha ema seluk dehan, loron hotu-hotu hanesan deit iha Maromak nia oin. Ema ida-idak tenki desidi rasik kona ba loron boot nee.

⁶ Ema nebee konsidera liu loron balu deit, nia halo nunee atu hatudu nia respeitu ba ita nia Nai. I ema nebee haan naan, nia haan naan atu hatudu respeitu ba ita nia Nai, tanba nia foo agradese ba Maromak. Nunee mos ba ema nebee la haan naan, nia mos halo nunee atu hatudu respeitu ba ita nia Nai, i nia mos foo agradese ba Maromak.

⁷ Tanba ita moris, laos moris deit ba ita nia aan. Ita mate mos laos mate ba ita nia aan deit.

⁸ Bainhira ita sei moris, ita moris ba ita nia Nai. I bainhira ita mate mos, ita mate ba ita nia Nai. Nunee atu ita moris ka ita mate, ita nafatin Nai Maromak ninian.

⁹ Tanba nee duni mak Kristu mate i moris fila fali, atu Nia bele sai Nai ba ema sira nebee mate tiha ona no mos ba ema nebee sei moris.

¹⁰ Se nunee nusaa mak imi foo sala ba imi nia maluk sarani? Nusaa mak imi hatuun sira? Afinal ita hotu-hotu sei hamriik iha Maromak nia futar oin para Nia tesi ita nia lia,

¹¹ hanesan hakerek iha Livru Sagradu dehan, “Nai Maromak dehan, ‘Hau, Maromak nebee Moris, jura katak, ema hotu-hotu sei hakneak mai Hau, ema hotu-hotu sei foti aas Hau nia naran.’ ”

¹² Nunee ita ida-idak tenki responsabiliza ita nia aan iha Maromak nia oin.

La bele halo o nia maluk sidi

¹³ Tanba nee, la bele foo sala ba malu tan. Maibee kuidadu didiak para imi la bele halo imi nia maluk sarani sidi ka monu ba sala.

¹⁴ Tanba hau laran ida ho Nai Jesus, hau fiar metin katak, la iha buat ida mak bele hafoer ema atu la adora Maromak. Maibee se ema ida hanoin katak buat ida bele hafoer nia hodi la adora Maromak tan, ba ema nee buat nee foer duni.

¹⁵ Se o haan hahaan ruma iha o nia maluk sarani ida nia oin nebee nia la bele haan, entaun o halo nia fuan moras. Bainhira o halo nunee, o la hatudu domin ba nia. La bele estraga fali o nia maluk tanba deit o hakarak haan hahaan sira nee. Tanba Kristu mos mate ba nia.

¹⁶ Keta halo be buat diak nebee o halo nee, ema seluk bele hatete aat fali o.

¹⁷ Tanba iha Maromak nia reinu, haan no hemu nee, laos importante. Ida nebee importante mak ita moris tuir Maromak nia hakarak, i Nia hakarak mak ita moris iha lia loos, dame, i laran haksolok, tanba Espiritu Santu hela iha ita.

¹⁸ Ema nebee serbii Kristu hanesan nee, nia halo haksolok Maromak nia laran, i ema seluk mos respeita nia.

¹⁹ Tanba nee, ita hotu tenki hakaas aan tulun malu hodi moris iha dame nia laran, i foo korajen ba malu.

²⁰ La bele estraga Maromak nia serbisu tanba deit problema haan-hemu. Hahaan saida deit bele haan. Maibee se o haan hahaan ruma nebee halo o nia maluk sidi, o sala.

²¹ Diak liu ita la bele haan naan ka hemu tua ka halo saida deit nebee halo ita nia maluk sarani sidi ka monu ba sala.

²² Se o fiar katak buat nebee o halo nee loos hela, i senti nee la sala ida, nee hanesan bensaun ida hosi Maromak. Diak liu Maromak deit mak hatene o nia hanoin kona ba buat sira nee.

²³ Maibee se o haan hahaan ruma ho laran rurua, i o hanoin hahaan nee keta Maromak bandu karik, entaun o sala ona, tanba o la halo tuir saida mak o rasik fiar. Tanba ema nebee la tuir buat nebee nia rasik fiar, nia halo sala.