Roma 13 - Biblia Tetun Dili

Hakruuk ba ukun nain sira

¹ Ita hotu tenki hakruuk ba ukun nain sira, tanba ukun nain sira hotu-hotu nee mai hosi Maromak. La iha governu ida ke la mai hosi Maromak.

² Nunee, ema nebee kontra ukun nain, nia kontra saida mak Maromak desidi ona. Hosi nia hahalok nee, nia sei hetan kastigu.

³ Ema nebee halo buat loos, nia sei la tauk nai ulun sira, so ema nebee halo buat aat mak tauk. Entaun se imi lakohi moris iha tauk nia laran, diak liu halo buat nebee loos, para sira bele gaba imi.

⁴ Tanba ukun nain sira nee Maromak nia atan para halo diak ba imi. Maibee se imi halo buat aat, imi tenki tauk, tanba sira iha kbiit hodi kastigu imi. Sira nee Maromak nia atan, Nia haruka sira kastigu ema nebee mak halo aat.

⁵ Nunee imi tenki hakruuk ba ukun nain sira, laos deit tanba imi lakohi atu simu kastigu, maibee tanba imi hatene katak hahalok nee mak loos.

⁶ Nunee mos imi tenki selu taxa, tanba ukun nain sira nee serbii Maromak, i foo sira nia aan hodi ukun imi.

⁷ Entaun foo ba ukun nain sira tuir imi nia obrigasaun. Selu taxa no impostu ba governu tuir imi nia obrigasaun. Foo respeitu no gava ema nebee merese atu simu.

Hadomi ema seluk hanesan halo tuir ona ukun fuan hotu

⁸ Selu o nia tusan sira hotu para o la bele moris ho tusan. Tanba ita iha tusan ida deit mak hadomi malu. See mak hadomi ema seluk, nia halo tuir ona Maromak nia ukun fuan hotu.

⁹ Maromak nia ukun fuan dehan, “La bele halo iha relasaun seksual ho ema nebee laos o nia feen ka laen, la bele oho ema, la bele naok, la bele kaan ema nia sasaan.” Ukun fuan hirak nee ho ukun fuan sira seluk nia huun mak nee: “O tenki hadomi ema seluk hanesan o hadomi o nia aan rasik.”

¹⁰ Ema nebee hadomi ema seluk, la halo aat ba nia. Nunee se ita hadomi ema seluk, nee dehan katak ita halo tuir Maromak nia lei hotu.

La kleur tan Kristu fila mai ona

¹¹ Imi tenki halo buat sira nee hotu tanba imi komprende tempu too ona para imi hadeer. Tanba loron nebee Maromak atu salva ita besik dadauk ona, laos hanesan uluk bainhira ita foin fiar ba Kristu.

¹² Kalan boot liu ona, rai besik loron ona. Tanba nee, ita tenki soe tiha hahalok nakukun nian hodi uza fali ekipamentu funu naroman nian.

¹³ Mai ita moris loos, hanesan ema nebee moris iha naroman. La bele festa hela deit, haan-hemu too lanu arbiru tuun-sae. La bele halo seksu arbiru no nebee la iha moral. La bele istori malu, i la bele laran moras ema.

¹⁴ Maibee imi tenki moris hanesan Nai Jesus Kristu nia moris. I la bele hanoin tan atu halo tuir imi nia hakarak aat.