Roma 12 - Biblia Tetun Dili

Entrega imi nia aan tomak ba Maromak

¹ Maun-alin sira, tanba Maromak hatudu ona Nia laran diak mai ita, nunee hau husu ba imi para entrega imi nia aan tomak ba Nia, hanesan sakrífisiu ida nebee sei moris, sakrífisiu ida nebee moos i halo haksolok Maromak nia laran. Ida nee mak dehan imi adora Maromak loloos.

² La bele halo tuir ema iha mundu nee nia hahalok. Maibee husik Maromak halo foun imi nia hanoin hodi muda imi nia laran. Nunee imi bele hatene loloos Maromak nia hakarak ba imi. Maromak nia hakarak nee buat nebee diak, loos i halo Nia laran haksolok.

³ Tanba Maromak hatudu Nia grasa mai hau too Nia hili hau sai apostolu, hau hatete ba imi ida-idak: la bele hanoin buat nebee aas liu dukee loloos nian. Diak liu imi hatene kbiit nebee Maromak foo tiha ona ba imi ida-idak tanba imi nia fiar, atu nunee imi bele hatene imi nia aan.

⁴ Hau foo ezemplu ida hosi ema nia isin lolon. Isin lolon ida iha membru oi-oin, i membru ida-idak nia knaar la hanesan.

⁵ Nunee mos ita sarani sira. Ita barak, maibee tanba ita laran ida ho Kristu, ita hamutuk hanesan isin lolon ida deit.

⁶ Maromak foo kbiit ba ita ida-idak, tuir Nia grasa. Kbiit nebee ita simu nee la hanesan. Ema nebee mak simu kbiit hodi foo tutan Maromak nia lia menon, nia tenki foo sai ho loloos, la bele aumenta no la bele hamenus.

⁷ Ema nebee simu kbiit hodi serbii ema seluk, nia tenki serbii duni. Ema nebee simu kbiit hodi hanorin, nia tenki hanorin.

⁸ Ema nebee simu kbiit hodi hametin ema nia laran, nia tenki halo nunee. Ema nebee simu kbiit hodi foo tulun ba ema seluk ho buat nebee mak nia iha, nia tenki foo ho laran. Ema nebee simu kbiit hodi sai lideransa, nia tenki sai lideransa nebee badinas. Ema nebee mak simu kbiit hodi ajuda ema seluk nebee susar, nia tenki ajuda ho laran haksolok.

Moris iha domin

⁹ Hatudu imi nia domin loloos ba ema seluk, la bele finji. Odi buat nebee aat, kaer metin buat nebee diak.

¹⁰ Hadomi malu hanesan maun-alin. Hatudu uluk respeitu ba malu.

¹¹ La bele baruk, maibee foo aan nafatin hodi serbii Nai Jesus ho laran tomak.

¹² Imi tenki haksolok tanba imi laran metin ba Maromak. Aguenta ho pasiensia iha terus laran. Halo orasaun bebeik.

¹³ Uza buat nebee imi iha hodi ajuda Maromak nia ema sira nebee presiza. Simu ema seluk iha imi nia uma ho laran tomak.

¹⁴ Se iha ema ruma halo terus imi, husu ba Maromak foo bensaun ba sira. Tenki husu bensaun, la bele husu atu Maromak foo malisan.

¹⁵ Se iha ema ruma kontenti, kontenti hamutuk ho sira. I se iha ema ruma tanis, tanis hamutuk ho sira.

¹⁶ Imi tenki moris neon ida, laran ida. La bele foti aan, maibee hamaluk ho ema kiik. La bele konsidera o nia aan dehan, o mesak mak hatene deit.

¹⁷ Se ema ruma halo buat aat ba imi, la bele halo aat fali ba ema nee. Hakaas aan hodi halo buat diak ba ema hotu.

¹⁸ Buka dame ho ema hotu.

¹⁹ Maluk doben sira, la bele halo aat ba ema nebee halo aat imi. Husik atu Maromak mak tesi sira nia lia. Tanba iha Livru Sagradu hakerek ona, “Maromak dehan, ‘Hau mak iha direitu atu vinga ema, I Hau mak bele foo kastigu ema nebee halo aat ba imi.’ ”

²⁰ Maibee imi tenki moris tuir liafuan nebee dehan, “Se o nia inimigu hamlaha, foo hahaan ba nia. Se nia hamrook, foo nia hemu. Se o halo nunee, maka nia sei moe no mos respeitu imi.”

²¹ Entaun keta husik buat aat manaan imi. Maibee halo bebeik buat diak, atu nunee imi bele manaan buat aat.