Roma 11 - Biblia Tetun Dili

Maromak nia laran diak ba povu Israel

¹ Agora hau husu tan: Entaun Maromak fila kotuk ba Nia povu Israel ka? Lae liu! Hau rasik ema Israel, hau Abraão nia jerasaun, hosi suku Benjamim.

² Maromak nunka fila kotuk ba Nia povu. Sira nee Nia hili hori uluk kedas. Imi hatene saida mak hakerek iha Livru Sagradu kona ba profeta Elias bainhira nia kesar ema Israel ba Maromak dehan,

³ “Nai, ema oho hotu ona Ita Boot nia profeta sira, i halo rahun Ita Boot nia meza sakrífisiu. Hela deit hau mesak i ema atu oho tan hau!”

⁴ Maibee Maromak hataan dehan, “Laos o mesak! Hau salva hela Hau nia ema rihun hitu. Sira nee nunka hakneak adora estatua Baal.”

⁵ Nunee mos agora, sei iha ema Israel balu nebee tuir Maromak nafatin; sira nee Maromak hili ona tanba Nia grasa.

⁶ Nia hili sira tanba deit Nia grasa, laos tanba sira hahalok diak. Se Maromak hili ema bazeia ba sira nia hahalok diak, entaun bele dehan nee laos ona grasa.

⁷ Entaun oinsaa? Ema Israel hakaas aan atu diak malu ho Maromak, maibee barak la konsege. So ema sira nebee Maromak hili tiha ona mak hetan. Maibee ema Israel sira seluk sai ulun toos liu tan.

⁸ Iha Livru Sagradu hakerek ona kona ba ema sira nee dehan, “Hori uluk too agora Maromak halo sira nia neon sai beik, sira nia matan la haree, sira nia tilun la rona.”

⁹ Liurai David mos hakerek, “Husik atu sira halo festa haan-hemu, molok hakfodak sira monu tama ba lasu laran Husik sira nia rikusoin halo sira sidi i monu ba rai kuak.

¹⁰ Husik sira nia matan sai malahuk atu sira la bele haree. Husik sira lori todan, too sira nia kotuk bonko tinan ba tinan.”

Ema nebee laos Judeu mos bele hetan salvasaun

¹¹ Entaun hau husu nunee: Bainhira ema Judeu sira sidi fatuk, sira monu too la bele hamriik ka? Lae! Maibee tanba sira kontra Maromak, nee mak dalan nakloke ba ema nebee laos Judeu atu hetan salvasaun. Nee para ema Judeu sira bele laran moras ba sira.

¹² Entaun, se ema Judeu nia sala lori fali bensaun ba ema iha mundu tomak i sira nia frakeza lori bensaun ba nasaun sira seluk, saa tan aban-bainrua ema Judeu tomak fila fali ba Maromak! Nee lori bensaun liu tan!

¹³ Agora hau koalia ba imi nebee mak laos Judeu. Maromak foti hau sai apostolu hodi baa foo sai Nia Novidade Diak ba ema nebee laos Judeu, i hau foo aan tomak hodi halao serbisu boot nee.

¹⁴ Hau hein katak hau nia serbisu nee bele halo hau nia maluk Judeu sira laran moras hodi hakarak atu sira mos bele hetan bensaun nebee ema laos Judeu simu nee. Nunee sira balu bele hetan salvasaun.

¹⁵ Bainhira Maromak la simu ema Judeu, nee loke dalan atu ema iha mundu tomak bele diak malu ho Maromak. Saa tan aban-bainrua, Maromak simu fali sira, nee hanesan ema mate moris fali!

¹⁶ Hau foti ezemplu kona ba ema Judeu. Bainhira ema halo paun, sira oferese ida primeiru ba Maromak, nunee paun nee hotu sai Maromak nian nebee santu. Nunee mos, se ema oferese ai nia abut ba Maromak, ai huun nee tomak sai Maromak nian nebee santu.

¹⁷ Ita mos bele kompara ema Judeu ho ai oliveira nebee ema kuda iha toos laran. Maromak tesi sai tiha ona ai nee nia sanak balu. Maibee imi nebee mak laos Judeu, imi hanesan ai oliveira nebee mesak moris nia sanak nebee Maromak tesi hodi ba taka iha ai huun hakiak nee. Nunee imi mak sanak hosi ai huun nebee mesak moris no hetan moris hosi ai huun hakiak nee.

¹⁸ Maibee la bele foti aan dehan, imi mak diak liu fali sanak nebee Maromak tesi soe tiha ona nee! Keta haluha, imi nee ai sanak deit! Laos sanak mak hametin ai huun. Maibee ai nee nia huun mak halo metin nia sanak.

¹⁹ Karik imi ida dehan, “Maromak tesi sai tiha ai sanak balu para Nia bele taka fali hau iha sira nia fatin.”

²⁰ Loos duni, maibee keta haluha katak, Maromak soe tiha ona ai sanak sira nee tanba sira lakohi fiar ba Kristu. I o troka fali sira tanba o fiar. Entaun la bele foti aan. Diak liu o halo tuir!

²¹ Tanba ai sanak orijinal mos Nia bele tesi sai tiha, saa tan imi!

²² Nunee ita haree katak, Maromak laran diak, maibee Nia mos foo kastigu ba ema nebee monu ba sala. Maibee ba imi nebee laos Judeu, Maromak hatudu Nia laran diak, naran katak imi la fila kotuk ba Nia. Se imi fila kotuk ba Nia, mak Nia mos sei tesi sai tiha imi hosi ai huun.

²³ Nunee mos se ema Judeu sira nebee desidi fiar ba Kristu, Maromak sei taka fila fali sira ba ai huun orijinal nee, tanba Nia iha kbiit hodi halo buat nee.

²⁴ Tuir loloos ai sanak hosi ai oliveira nebee mesak moris nee la bele taka ba iha ai oliveira nebee ema kuda iha toos, maibee Maromak bele halo nunee. Saa tan ai sanak nebee Nia uluk tesi tiha ona hosi ai oliveira nebee ema kuda nee. Nia iha kbiit atu taka fila fali ba iha nia huun rasik.

Maromak sei hatudu Nia laran diak ba ema Israel

²⁵ Maun-alin sira, hau hakarak atu imi hatene Maromak nia planu nebee uluk segredu hela, para imi la bele foti aan. Nia planu mak nee: agora dadauk ema Israel barak sei ulun toos hasoru Maromak. Sira sei ulun toos too Maromak hili ona ema seluk tama hotu ba Maromak nia povu, foin sira fiar ba Nia.

²⁶ Nunee, Maromak sei salva ema Israel hotu, hanesan hakerek tiha ona iha Livru Sagradu, “Iha Salvador ida sei mai hosi Siaun, Nia sei halo Jacó nia jerasaun hakribit sira nia hahalok aat hasoru Hau.

²⁷ Hau nia promesa ba sira mak nee: Hau sei hamoos sira nia sala hotu.”

²⁸ Tanba ema Judeu la simu Novidade Diak, entaun sira sai inimigu ba Maromak, nee loke dalan ba imi nebee laos Judeu atu bele simu salvasaun. Maski nunee, Maromak hadomi nafatin sira, tanba uluk kedas Nia hili sira nia bei-ala sira.

²⁹ Tanba bainhira Maromak foo Nia grasa, Nia nunka foti fila fali. I bainhira Nia bolu ema ida sai Ninian, Nia nunka nega fali.

³⁰ Imi nebee laos Judeu, uluk lakohi rona ba Maromak. Maski nunee, agora Maromak hatudu Nia laran diak ba imi, tanba durante nee ema Judeu lakohi rona ba Maromak.

³¹ Maski ema Judeu agora nafatin lakohi rona ba Maromak, Nia sei hatudu Nia laran diak ba sira, tanba Nia hatudu ona ba imi.

³² Nunee, Maromak haree em Judeu hanesan mos Nia haree ema nebee laos Judeu, tanba sira hotu la moris tuir Maromak nia hakarak. Sira moris hanesan dadur hela iha sala nia laran i la hatene dalan oinsaa atu sai. Nia husik sira nunee para Nia hatudu Nia laran diak ba ema hotu.

Hahii ba Maromak

³³ Nai Maromak nia matenek klean liu, Nia komprende hosi huun too rohan. La iha ema ida mak bele komprende Nia desizaun, la iha ema ida mak bele hanoin hetan Nia dalan.

³⁴ See mak bele hatene Maromak nia hanoin? See mak iha kbiit hodi foo konselhu ba Nia?

³⁵ See mak iha buat ruma hodi foo ba Maromak para Maromak tenki foo fali ba nia?

³⁶ Tanba buat hotu-hotu iha lalehan ho rai mai hosi Nia i ba Nia, i sei iha nafatin tanba Nia, Buat hotu-hotu iha hodi hahii Nia. Mai ita foti aas Nia naran too tinan ba tinan. Amen.