Roma 10 - Biblia Tetun Dili

¹ Maun-alin sira, hau hakarak teb-tebes atu hau nia maluk ema Israel sira hetan salvasaun, i hau harohan bebeik atu Maromak salva sira.

² Hau hatete loloos, sira nia laran hakarak teb-tebes serbii Maromak, maibee sira la komprende didiak buat nebee loos.

³ Sira la komprende Maromak nia lia loos, maibee sira tuir fali sira nia dalan rasik. Nunee sira la simu lia loos hosi Maromak.

⁴ Kristu kumpri ona Moisés nia lei tomak. Nunee see-see deit mak fiar ba Kristu, Maromak deklara nia moris loos ona.

Salvasaun ba ema hotu nebee fiar

⁵ Iha Livru Sagradu, Moisés hakerek dehan, ema bele diak malu ho Maromak se sira halo tuir Maromak nia lei hotu-hotu. Nia hakerek nunee: “Ema nebee mak halo tuir Lei sira nee hotu, nia sei hetan moris.”

⁶ Maibee lia loos tanba fiar ba Jesus Kristu dehan nunee, “Keta hanoin iha imi nia laran dehan, see mak atu sae ba lalehan? (para lori Kristu tuun mai salva ita)

⁷ Ka husu see mak atu tuun ba iha matebian sira nia fatin? (hodi lori Kristu sae fali hosi mate)”

⁸ Lalika buka Nia iha fatin dook, tanba iha Livru Sagradu mos hakerek dehan, “Maromak nia liafuan besik loos imi, iha imi nia ibun, ho mos iha imi nia laran.” Liafuan nee mak ami baibain foo sai kona ba fiar.

⁹ Se o nia ibun foo sai dehan, “Jesus mak Nai”, i o fiar iha o nia fuan-laran katak, Maromak halo moris fali ona Jesus hosi mate, o sei hetan salvasaun.

¹⁰ Tanba imi nia fuan-laran fiar ba Kristu mak Maromak deklara katak imi moris loos ona iha Maromak nia futar oin. I tanba imi nia ibun foo sai dehan, “Jesus mak Nai” mak Maromak salva imi.

¹¹ Hanesan hakerek iha Livru Sagradu dehan, “See-see deit mak fiar ba Nia, sira sei la moe.”

¹² Atu ema Judeu ka laos Judeu, hanesan deit. Tanba ita hotu iha Nai ida deit, Nia mak Nai ba ema hotu-hotu, i Nia hatudu Nia laran diak teb-tebes ba see-see deit mak husu tulun ba Nia.

¹³ Hanesan hakerek ona iha Livru Sagradu dehan, “Ema see deit mak husu tulun ba Maromak, Nia sei salva sira.”

¹⁴ Maibee oinsaa mak ema bele husu tulun ba Nia se sira la fiar ba Nia? Oinsaa mak sira bele fiar ba Nia se sira nunka rona kona ba Nia? Oinsaa mak sira bele rona kona ba Nia se la iha ema ida mak baa foo sai ba sira?

¹⁵ I oinsaa mak ema bele baa foo sai ba sira kona ba Nia, se la iha ema ida mak haruka? Iha Livru Sagradu hakerek dehan, “Ema nebee lori Novidade Diak sira mai nee furak teb-tebes.”

¹⁶ Maski ema Israel rona Novidade Diak, maibee balu deit mak simu. Hanesan profeta Isaias dehan, “Nai, ema itoan deit mak fiar ba liafuan nebee mak ami foo sai.”

¹⁷ Nunee, ema bele fiar deit liu hosi rona Novidade Diak kona ba Kristu. I para rona, tenki iha ema ruma mai foo sai ba sira.

¹⁸ Entaun hau hakarak husu, ema Israel nunka rona kona ba Kristu ka? Sira rona tiha ona! Hanesan hakerek iha Livru Sagradu dehan, “Sira nia liafuan foo sai tiha ona iha mundu tomak, hosi rai ulun too rai ikun.”

¹⁹ Hau husu tan: Keta halo be ema Israel la komprende liafuan nebee mak sira rona nee? Sira komprende! Primeiru, Moisés hatoo Maromak nia liafuan ba ema Israel dehan, “Hau sei foo bensaun ba ema nebee laos Judeu, halo imi laran moras ba sira. Hau sei hatudu laran diak ba povu nebee beik, halo imi hirus.”

²⁰ Tuir mai, profeta Isaias brani hakerek Maromak nia liafuan kona ba ema nebee mak laos Judeu nunee: “Ema nebee la buka Hau, sira hetan ona Hau. Hau hatudu ona Hau nia Aan ba ema nebee mak la buka hatene kona ba Hau.”

²¹ Maibee kona ba ema Israel, Nia dehan, “Loron-kalan Hau lolon liman hodi simu sira, maibee sira ulun toos i fila kotuk mai Hau.”