Roma 1 - Biblia Tetun Dili

Paulo hahuu nia surat

¹ Surat nee hosi hau, Paulo. Hau Kristu Jesus nia atan. Maromak mak hili hau sai Jesus nia apostolu no haketak hau hodi foo sai Nia Novidade Diak.

² Novidade Diak nee hori uluk kedas Maromak promete tiha ona liu hosi Nia profeta sira, i sira hakerek iha Livru Sagradu.

³ Novidade Diak nee koalia kona ba Maromak nia Oan Jesus Kristu, ita nia Nai. Nudar ema, Jesus moris mai hosi liurai David nia jerasaun.

⁴ Maibee Maromak hatudu momoos katak, Jesus nee mos Maromak nia Oan. Ita hatene nunee tanba Espiritu nebee mak iha Jesus nee santu teb-tebes, hanesan Maromak, i Espíritu nee mak halo Jesus moris fali hosi mate.

⁵ Maromak hatudu Nia grasa mai hau liu hosi Jesus too Nia hili hau sai apostolu. Nia hili hau para lori ema hosi nasaun hotu-hotu bele fiar ba Jesus i halo tuir Nia liafuan, atu nunee ema hotu-hotu bele foti aas Nia naran.

⁶ Nunee mos imi iha Roma, Maromak mos hili ona imi sai Jesus Kristu nia ema.

⁷ Hau haruka surat nee ba imi. Maromak hadomi imi, i hili ona imi sai Nia povu santu. Hau harohan para ita nia Aman Maromak ho mos ita nia Nai Jesus Kristu hatudu Sira nia grasa ba imi, no foo paz ho hakmatek ba imi.

Paulo hakarak baa vizita sarani sira iha Roma

⁸ Uluk nanain, hau foo agradese ba hau nia Maromak hodi Jesus Kristu nia naran tanba imi hotu fiar ba Jesus. Tanba ema iha fatin-fatin konta kona ba imi nia fiar nee.

⁹ Maromak rasik hatene katak hau harohan bebeik ba imi. Maromak nee mak hau serbii ho laran tomak hodi foo sai Novidade Diak kona ba Nia Oan.

¹⁰ Bainhira hau halo orasaun, hau sempre harohan ba imi. I hau mos husu hodi Maromak bele loke dalan mai hau hodi baa vizita imi.

¹¹ Hau hakarak teb-tebes atu baa vizita imi, para hau bele fahe ba imi kbiit espiritual nebee hau hetan hosi Maromak. Nunee imi nia fiar bele metin liu tan.

¹² Hau hakarak atu hau nia fiar bele haforsa imi, i imi nia fiar mos bele haforsa hau.

¹³ Maun-alin sira, hau hakarak para imi hatene katak, dala barak ona hau halo planu atu baa vizita imi, maibee too agora hau la konsege baa. I se hau karik, hau sei haree ema barak sei fiar nafatin ba Kristu, hanesan mos iha fatin sira seluk. Ho nunee, hau nia serbisu nee iha rezultadu diak.

¹⁴ Hau iha obrigasaun atu foo sai Novidade Diak ba ema hotu-hotu: atu ema gregu ka laos ema gregu, atu ema matenek ka ema beik.

¹⁵ Tanba nee mak hau hakarak baa foo sai mos Novidade Diak ba imi iha Roma.

Novidade Diak nee iha kbiit hodi salva ema

¹⁶ Hau la moe foo sai Novidade Diak nee. Tanba Novidade Diak nee iha kbiit hosi Maromak hodi salva see-see deit mak fiar, primeiru ema Judeu sira, depois ema hosi nasaun sira seluk.

¹⁷ Tanba Novidade Diak nee foo sai Nai Maromak nia lia loos. Maromak nia lia loos nee mak nee: liu hosi fiar ba Nai Maromak maka Nia simu ita, hanesan hakerek ona iha Livru Sagradu nebee dehan, "Ema nebee moris loos, sei moris hosi fiar."

Nai Maromak hirus ema nebee la fiar Nia

¹⁸ Maromak iha lalehan hatudu sai katak, Nia hirus teb-tebes ema nebee moris iha sala no ema nebee hahalok aat. Sira nia hahalok aat nee taka ema seluk nia matan atu la bele haree dalan loos.

¹⁹ Tuir loloos buat nebee ita ema bele hatene kona ba Maromak, ema aat sira nee mos hatene, tanba Maromak hatudu momoos ona ba sira.

²⁰ Tanba desde Maromak halo lalehan ho rai, ita ema bele hatene klaru katak Nia nee Maromak i Nia kbiit rohan laek, maski ita nia matan la haree. Nunee la iha razaun ida ba sira atu dehan katak sira la hatene Maromak, tanba sira bele hatene liu hosi buat nebee mak Nia halo tiha ona nee.

²¹ Maski sira konhese Maromak, maibee sira lakohi foti aas Nia naran nudar Maromak, i lakohi foo agradese ba Nia. Sira nia hanoin la loos ona, sira nia neon mos nakukun tiha.

²² Sira foti aan dehan, sira ema matenek, afinal sira sai beik-teen.

²³ Sira la adora Maromak ida nebee forsa teb-tebes i moris rohan laek. Maibee sira adora fali estatua nebee ema mak halo hanesan: ema, manu fuik, animal ain haat ho animal nebee dolar. Afinal buat sira nee hotu sei mate.

²⁴ Nee mak Maromak husik tiha liman para sira moris tuir deit sira nia hakarak aat oi-oin nebee iha ona sira nia laran. Sira mos foo sira nia isin lolon ba malu hodi halo relasaun seksual nebee la normal.

²⁵ Sira troka tiha lia loos hosi Maromak ho buat nebee falsu. Sira la adora Maromak Kriador nebee halo buat hotu-hotu, maibee sira adora fali Maromak nia kriasaun. Tuir loloos Maromak nee mak ita tenki hahii too tinan ba tinan. Amen.

²⁶ Tanba nee mak Maromak husik tiha liman para sira bele halo sala foer saida deit tuir sira nia hakarak. Too sira nia feen sira mos la toba ho sira nia laen hanesan baibain, maibee sira halo fali relasaun seksual ho feto maluk.

²⁷ Nunee mos laen sira husik tiha relasaun seksual ho sira nia feen, hodi kaan fali sira nia mane maluk, too mane ho mane halo fali relasaun seksual ba malu nebee aat liu. Tanba nee sira hetan ona kastigu tuir sira nia hahalok aat nee.

²⁸ Ema sira nee despreza atu konhese kona ba Maromak. Nee mak Maromak husik tiha liman para sira hanoin mak buat aat deit, i halo buat nebee tuir loloos la bele halo.

²⁹ Sira nia moris nakonu ho buat aat. Sira halo aat oi-oin, sira kaan-teen sasaan, i gosta odi ema. Sira laran moras ema, hanoin deit atu oho, gosta istori malu, bosok-teen, i laran aat. Sira gosta konta ema nia vida,

³⁰ i hatete aat ema seluk. Sira odi Maromak, malkriadu, foti aan i halo aan. Sira hanoin aat hela deit, i gosta kontra sira nia inan-aman.

³¹ Sira lakohi atu hatene saida mak loos, i la halo tuir buat nebee mak sira promete. Sira la iha domin, i la iha karidade.

³² Maski sira hatene ona Maromak nia lei nebee dehan, ema nebee halo buat aat nunee, merese hetan kastigu mate, maibee sira halo nafatin buat aat sira nee. Laos nee deit, maibee sira gosta atu ema seluk mos halo tuir buat sira nee.