Mateus 7 - Biblia Tetun Dili

La bele foo sala ba ema

¹ Jesus hanorin nafatin Nia eskolanti sira dehan, “La bele foo sala ba ema, atu nunee Maromak la foo sala ba o.

² Imi tetu ema nia sala oinsaa, Maromak mos sei tetu imi nunee. I sasukat nebee imi uza ba ema seluk, Maromak sei uza fali sasukat nee ba imi.

³ Nusaa mak o haree ai-luruk iha ema seluk nia matan, maibee ai kabelak nebee taka o nia matan rasik, o la senti?

⁴ Oinsaa mak o brani dehan ba o nia maluk: ‘Mai hau hasai tiha ai-luruk nee hosi o nia matan.’ Afinal iha ai kabelak ida taka hela o nia matan rasik.

⁵ Imi ema laran makerek, nebee koalia oin ida, hahalok oin seluk! Hasai tiha uluk ai kabelak iha o nia matan rasik, mak foin o haree moos hodi hasai ai-luruk hosi o nia maluk nia matan.

⁶ Buat nebee Maromak nian, la bele foo ba ema nebee lakohi rona. Nee hanesan imi foo fali ba asu, ka foo murak-mean ba fahi. Se imi halo nunee, fahi sei sama baa-mai, i asu sei fila hodi ataka imi.”

Harohan bebeik ba Nai Maromak

⁷ “Husu bebeik ba Maromak, maka Nia sei foo. Buka bebeik, maka imi sei hetan. Tuku bebeik odamatan, maka odamatan sei nakloke ba imi.”

⁸ Tanba see mak husu bebeik ba Maromak, nia sei simu. See mak buka bebeik, nia sei hetan. See mak tuku bebeik odamatan, Maromak sei loke ba nia.

⁹ Imi nudar aman, bainhira imi nia oan husu paun, imi foo fali fatuk ka?

¹⁰ Se nia husu ikan, imi foo fali samea ka? Nunka!

¹¹ Maski imi ema aat, maibee imi hatene foo buat diak ba imi nia oan sira. Saa tan imi nia Aman iha lalehan! Bainhira imi husu, Nia sei foo buat diak teb-tebes ba imi.”

¹² “Saida deit mak o hakarak atu ema seluk halo ba o, o mos tenki halo hanesan nee ba ema seluk. Ida nee mak Moisés nia lei ho hanorin hosi profeta sira nia livru hori uluk kedas.”

Odamatan baa lalehan nian kloot

¹³ “Atu tama ba moris rohan-laek, tenki liu hosi odamatan kloot. Tanba odamatan luan lori ba infernu, nia dalan mos fasil atu ema liu, i ema barak mak tama liu hosi odamatan nee.

¹⁴ Maibee odamatan atu tama ba moris rohan-laek nee kloot, dalan nee mos susar, i ema ituan deit mak hetan odamatan nee.”

La bele tuir ema nebee hanorin sala

¹⁵ “Kuidadu ho ema nebee bosok dehan, sira Maromak nia profeta. Sira finji maus hanesan bibi malae, maibee tuir loloos sira nee hanesan asu fuik.

¹⁶ Imi sei hatene sira hosi sira nia hahalok, hanesan ita hatene ai huun ida hosi nia fuan. Ai tarak nunka foo fuan fali uvas ka ai fuan figeira.

¹⁷ Ai huun nebee diak sei foo fuan nebee diak. I ai huun nebee la diak sei foo fuan nebee aat.

¹⁸ Ai huun diak la bele foo fuan nebee mak aat. I ai huun nebee aat la bele foo fuan diak.

¹⁹ Ai nebee mak la foo fuan diak, sei tesi tiha hodi soe ba ahi.

²⁰ Nunee mos ho profeta falsu sira, imi bele konhese sira hosi sira nia hahalok.”

Se bolu Jesus ‘Nai’, tenki moris tuir Maromak nia hakarak

²¹ “Ema barak bolu Hau dehan: ‘Nai, Nai!’ Maibee laos sira hotu-hotu mak sei tama ba Maromak nia reinu. So sira nebee moris tuir Hau nia Aman iha lalehan nia hakarak mak bele tama.

²² Iha loron ikus bainhira Maromak tesi ema hotu-hotu nia lia, ema barak sei mai dehan, ‘Nai, Nai, ami uluk foo tutan Maromak nia lia tatoli hodi Nai nia naran. Ami mos temi Ita Boot nia naran hodi duni sai diabu hosi ema, i halo milagre oi-oin hodi Ita Boot nia naran.’

²³ Maibee Hau sei koalia mo-moos ba sira dehan: ‘Hau nunka konhese imi! Imi ema aat, sai hosi nee!’ ”

Ema matenek ho ema beik harii uma

²⁴ “Ema nebee rona Hau nia liafuan nee i halo tuir, nia hanesan ema matenek ida nebee harii nia uma iha fatuk leten.

²⁵ Depois udan boot mai, mota tuun, anin boot mos huu makaas uma nee. Maibee uma nee la monu, tanba harii metin iha fatuk leten.

²⁶ Ema nebee rona Hau nia liafuan maibee la halo tuir, nia hanesan ema beik ida nebee harii nia uma iha rai henek leten.

²⁷ Depois udan boot mai, mota tuun, anin boot mos huu makaas uma nee. I uma nee naksobu tiha too rai.”

Nai Jesus hanorin ho kbiit

²⁸ Bainhira Jesus hanorin tiha hotu, ema barak nebee rona Nia nee admira,

²⁹ tanba Nia hanorin ho kbiit, la hanesan mestri relijiaun sira nia hanorin.