Mateus 4 - Biblia Tetun Dili

Satanás koko Nai Jesus

¹ Liu tiha nee, Maromak nia Espiritu lori Jesus ba iha rai fuik maran atu diabu koko Nia.

² Iha nebaa Jesus jejun durante loron haat-nulu, kalan haat-nulu, too Nia hamlaha atu mate.

³ Depois diabu tenta nain mai koko Jesus. Diabu dehan, “Se O Maromak nia Oan duni, haruka fatuk sira nee sai paun.”

⁴ Maibee Jesus hataan, “Iha Livru Sagradu hakerek, ‘Ema kriatura laos moris hosi paun deit, maibee ema presiza mos Maromak nia liafuan no moris tuir Maromak nia hakarak.’ ”

⁵ Depois diabu lori Jesus ba iha Jerusalém, Maromak nia sidade santa. Diabu lori Nia baa hamriik iha uma kreda boot nia tutun,

⁶ i dehan, “Se O Maromak nia Oan duni, soe aan tuun ba rai. Tanba iha Livru Sagradu hakerek dehan, ‘Maromak sei haruka Nia anju sira mai kuidadu O.’ ‘Sira sei kaer O Nia liman, atu O nia ain la kona fatuk.’ ”

⁷ Maibee Jesus hataan dehan, “Iha Livru Sagradu mos dehan, ‘La bele koko Maromak, o nia Nai.’ ”

⁸ Depois diabu lori tan Jesus ba iha foho ida aas teb-tebes nia tutun, i hatudu ba Jesus reinu hotu-hotu iha mundu tomak ho sira nia rikusoin hotu.

⁹ Diabu dehan ba Jesus, “Buat sira nee hotu hau sei foo ba O, naran katak O hakneak hodi adora hau.’ ”

¹⁰ Maibee Jesus hataan fali dehan, “Satanás, sai hosi nee! Tanba iha Livru Sagradu hakerek nunee, ‘O tenki adora Nai, o nia Maromak, i serbii mak Nia deit.’

¹¹ Depois diabu husik tiha Jesus, i anju sira mai serbii Nia.

Nai Jesus komesa foo sai Novidade Diak

¹² Iha loron ida, Jesus rona katak ema kaer tiha João Sarani Nain hodi baa dadur iha komarka. Nunee Jesus husik tiha provinsia Judeia hodi baa fali iha provinsia Galileia.

¹³ Too iha nebaa, Nia baa uluk iha Nia aldeia Nazaré, depois baa hela iha sidade Kafarnaum. Sidade nee iha tasi Galileia nia sorin, iha rai Zebulón ho Naftali.

¹⁴ Nunee Jesus halo tuir saida mak Maromak nia profeta Isaias hakerek nanis ona dehan,

¹⁵ “Rai Zebulón ho rai Naftali, besik tasi Galileia, iha mota Jordaun nia sorin baa, rai Galileia, laos ema Judeu nia hela fatin.

¹⁶ Iha rai nee, uluk ema moris iha nakukun laran, maibee agora sira hetan ona naroman boot. Iha sira nia rain, uluk nakukun atu lori sira ba mate tinan ba tinan, maibee agora Naroman mosu ona hodi leno sira.”

¹⁷ Iha tempu nebaa, Jesus foo sai ba ema dehan, “Husik ona imi nia sala, tanba Maromak nia tempu hodi ukun besik ona.”

Nai Jesus bolu peskador nain haat para tuir Nia

¹⁸ Iha loron ida Jesus lao hela iha tasi ibun Galileia nian. Nia haree peskador nain rua soe hela dai iha tasi. Sira nain rua nee maun-alin, maun naran Simão, ema mos bolu nia Pedro. Alin naran André.

¹⁹ Jesus dehan ba sira, “Mai tuir Hau! Imi uluk buka ikan, maibee agora Hau sei hanorin imi atu buka ema hodi tuir Maromak.”

²⁰ Sira mos husik kedas sira nia dai hodi tuir Jesus.

²¹ Jesus lao nafatin, Nia haree tan ema nain rua, Tiago ho nia alin João. Sira nain rua hadia hela redi iha roo laran hamutuk ho sira nia aman Zebedeu. Jesus bolu tan sira nain rua atu tuir Nia.

²² Tiago ho João mos husik kedas sira nia aman ho sira nia roo hodi tuir Jesus.

Nai Jesus hanorin ema barak no kura sira nia moras

²³ Jesus lao iha provinsia Galileia tomak hodi hanorin iha ema Judeu sira nia uma kreda. Nia foo sai Novidade Diak kona ba oinsaa Maromak ukun nudar Liurai. I Nia mos kura ema nebee iha moras oi-oin.

²⁴ Buat nebee Jesus halo, ema konta iha nebee ba nebee too iha provinsia Síria tomak. Ema barak mai lori sira nia maluk nebee iha moras oi-oin, balu espiritu aat tama iha laran, balu moras bibi maten, liman-ain mate ho moras selu-seluk tan. I Jesus kura tiha moras sira nee hotu.

²⁵ Ema barak teb-tebes mak tuir Jesus. Iha ema hosi Galileia, hosi rai Dekapolis, hosi sidade Jerusalém ho provinsia Judeia, balu tan mai hosi mota Jordaun nia sorin balu.