Mateus 3 - Biblia Tetun Dili

João Sarani Nain prepara dalan ba Nai Jesus

¹ Molok Jesus hahuu Nia knaar, João Sarani Nain komesa hanorin ema iha rai fuik maran iha rai Judeia.

² Nia foo sai dehan, “Husik ona imi nia sala, tanba Maromak nia tempu hodi ukun besik ona.”

³ Uluk liu Maromak nia profeta Isaias hakerek ona kona ba João dehan, “Iha ema ida foo sai ho lian makaas iha rai fuik maran dehan, ‘Imi tenki hadia dalan para simu ita nia Nai. Halo loos tiha dalan para Nia hodi lao.’ ”

⁴ João nia hena halo hosi kuda kamelu nia fulun, i nia sintu halo hosi animal nia kulit. Nia hahaan mak gafanhotu ho bani been.

⁵ Ema barak mai hosi fatin oi-oin atu haree João. Sira mai hosi sidade Jerusalém, hosi provinsia Judeia tomak ho mos hosi aldeia sira nebee besik iha mota Jordaun.

⁶ Sira foo sai sira nia sala, i João foo sarani sira iha mota Jordaun.

⁷ Iha mos ema barak mai hosi grupu relijiaun Farizeu ho Saduseu atu João foo sarani sira. Maibee bainhira João haree sira, nia siak sira dehan, “He! Imi hanesan samea nebee fila lia tuun-sae! Maromak sei kastigu imi tanba imi nia hahalok aat. Karik ema bosok imi dehan imi bele sarani para sees aan hosi kastigu nee.

⁸ Importante mak imi tenki muda imi nia hahalok hodi hatudu katak imi husik duni imi nia sala.

⁹ I lalika hanoin dehan, imi loos ona tanba deit imi Abraão nia jerasaun. Lae! Hau hatete ba imi: fatuk sira nee mos, Maromak bele halo sai Abraão nia jerasaun.

¹⁰ Maromak hanesan toos nain nebee kaer hela baliu atu tesi ona ai huun too abut. Ai huun hotu-hotu nebee la foo fuan diak, Nia sei tesi tiha hodi soe ba ahi laran.

¹¹ Hau foo sarani imi ho bee deit para hatudu katak imi husik ona imi nia sala. Maibee la kleur tan, Ema ida boot liu hau sei mai. Atu kore deit Nia sandalias talin mos, hau la serve. Nia nee sei sarani imi ho Espiritu Santu no ho ahi.

¹² Nia hanesan natar nain nebee prontu ona atu haketak hare isin ho hare kulit sira nee. Hotu tiha, hare isin Nia sei rai didiak iha armazen, maibee hare kulit nia soe tiha ba ahi ida nebee nunka mate.”

João foo sarani Nai Jesus

¹³ Iha tempu nebaa Jesus mai hosi rai Galileia ba iha mota Jordaun para João foo sarani Nia.

¹⁴ Maibee João lakohi. Nia dehan, “Tuir loloos Ita Boot mak foo sarani hau. Nusaa mak Ita Boot mai fali iha hau?”

¹⁵ Jesus hataan, “Husik baa, agora nee ita mak foo sarani Hau para halo tuir Maromak nia hakarak hotu.” João mos simu.

¹⁶ Sarani tiha hotu Jesus sai kedas hosi mota nee. Derepenti lalehan nakloke, i Nia haree Maromak nia Espiritu hanesan manu pombu tuun ba iha Nia.

¹⁷ Depois lian ida hosi lalehan hatete, “Ida nee mak Hau nia Oan Doben. Nia halo Hau nia laran haksolok teb-tebes.”